Mahabharata · Chapter 5.179

tamahaṃ smayanniva raṇe pratyabhāṣaṃ vyavasthitam /
bhūmiṣṭhaṃ notsahe yoddhuṃ bhavantaṃ rathamāsthitaḥ //

āroha syandanaṃ vīra kavacaṃ ca mahābhuja /
badhāna samare rāma yadi yoddhuṃ mayecchasi //

tato māmabravīdrāmaḥ smayamāno raṇājire /
ratho me medinī bhīṣma vāhā vedāḥ sadaśvavat //

sūtaśca mātariśvā vai kavacaṃ vedamātaraḥ /
susaṃvīto raṇe tābhiryotsye'haṃ kurunandana //

evaṃ bruvāṇo gāndhāre rāmo māṃ satyavikramaḥ /
śaravrātena mahatā sarvataḥ pratyavārayat //

tato'paśyaṃ jāmadagnyaṃ rathamadhye vyavasthitam /
sarvāyudhavare śrīmatyadbhutopamadarśane //

manasā vihite puṇye vistīrṇe nagaropabhe /
divyāśvayuji sannadve kāñcanena vibhūṣite //

kavacena mahābāho somārkakṛtalakṣmaṇā /
dhanurdharo baddhatūṇo baddhagodhāṅgulitravān //

sārathyaṃ kṛtavāṃstatra yuyutsorakutavraṇaḥ /
sakhā vedavidatyantaṃ dayito bhārgavasya ha //

āhvayānaḥ sa māṃ yuddhe mano harṣayatīva me /
punaḥ punarabhikrośannabhiyāhīti bhārgavaḥ //

tamādityamivodyantamanādhṛṣyaṃ mahābalam /
kṣatriyāntakaraṃ rāmamekamekaḥ samāsadūm //

tato'haṃ bāṇapāteṣu triṣu vāhānnigṛhya vai /
avatīrya dhanurnyasya padātirṛṣisattamam //

abhyāgacchaṃ tadā rāmamarciṣyandvijasattamam /
abhivādya cainaṃ vidhivadabruvaṃ vākyamuttamam //

yotsye tvayā raṇe rāma sadṛśenādhikena vā /
guruṇā dharmaśīlena jayamāśāsva me vibho //
rāma uvāca /

evametatkuruśreṣṭha kartavyaṃ bhūtimicchatā /
dharmo hyeṣa mahābāho viśiṣṭaiḥ saha yudhyatām //

śapeyaṃ tvāṃ nacedevamāgacchethā viśāmpate /
yudhyasva tvaṃ raṇe yatto dhairyamālambya kaurava //

na tu te jayamāśāse tvāṃ vijetumahaṃ sthitaḥ /
gaccha yudhyasva dharmeṇa prīto'smi caritena te //

tato'haṃ taṃ namaskṛtya rathamāruhya satvaraḥ /
prādhmāpayaṃ raṇe śaṅkhaṃ punarhemapariṣkṛtam //

tato yuddhaṃ samabhavanmama tasya ca bhārata /
divasānsubahūnrājanparasparajigīṣayā //

sa me tasminraṇe pūrvaṃ prāharatkaṅkhapatribhiḥ /
vaṣṭyā śataiśca navabhiḥ śarāṇāṃ nataṣarvaṇām //

catvārastena me vāhāḥ sūtaścaiva viśāmpate /
pratiruddhāstathaivāhaṃ samare daṃśitaḥ sthitaḥ //

namaskṛtya ca devebhyo brāhmaṇebhyo viśeṣataḥ /
tamahaṃ smayanniva raṇe pratyabhāṣaṃ vyavasthitam //

ācāryatā mānitā me nirmaryāde hyapi tvayi /
bhūyaśca śṛṇu me brahmansampadaṃ dharmasangrahe //

ye te vedāḥ śarīrasthā // yacca te mahat /
tapaśca te mahattaptaṃ na tebhyaḥ praharāmyaham //

prahare kṣatradharmasya yaṃ tvaṃ rāma samāśritaḥ /
brāhmaṇaḥ kṣatriyatvaṃ hi yāti śastrasamudyamāt //

paśya me dhanuṣo vīryaṃ paśya bāhvorbalaṃ mama /
eṣa te kārmuka vīra chinadmi niśiteṣuṇā //

tasyāhaṃ niśitaṃ bhallaṃ cikṣepa bharatarṣabha /
tenāsya dhanuṣaḥ koṭiṃ chitvā bhūmāvapātayam //

tathaiva ca pṛṣatkānāṃ śatāni nataparvaṇām . cikṣepa kaṅkapatrāṇāṃ jāmadagnyarathaṃ prati /

kāye viṣaktāstu tadā vāyunā samudīritāḥ /
celuḥ kṣaranto rudhiraṃ nāgā iva ca te śarāḥ //

kṣatajokṣitasarvāṅgaḥ kṣaransa rudhiraṃ raṇe /
babhau rāmastathā rājanpraphulla iva kiṃśukaḥ //

hemantānte'śoka iva raktastabakamaṇḍitaḥ /
babhau rāmastathā rājanpraphulla iva kiṃśukaḥ //

tato'nyaddhanurādāya rāmaḥ krodhasamanvitaḥ /
hemapuṅkhānsuniśitāñśarāṃstānhi vavarṣa saḥ //

te samāsādya māṃ raudrā bahudhā marmabhedinaḥ /
akampayanmahāvegāḥ sarpānalaviṣopamāḥ //

tamahaṃ samavaṣṭabhya punarātmānamāhave /
śatasaṃkhyaiḥ śaraiḥ kruddhastadā rāmamavākiram //

sa tairagnyarkasaṅkāśaiḥ śarairāśīviṣopamaiḥ /
śitairabhyardito rāmo mandacetā ivābhavat //

tato'haṃ kṛpayā'viṣṭo vinindyātmānamātmanā /
dhigdhigityabruvaṃ yuddhaṃ kṣatradharmaṃ ca bhārata //

asakṛccābruvaṃ rājañśokavegapariplutaḥ /
aho bata kṛtaṃ pāpaṃ mayedaṃ kṣatradharmaṃ ca bhārata //

gururdvijātirdharmātmā yadevaṃ pīḍitaḥ śaraiḥ /
tato na prāharaṃ bhūyo jāmadagnyāya bhārata //

athāvatāpya pṛthivīṃ pūṣā divasamankṣaye /
jagāmāstaṃ sahasrāṃśustato yuddhamupāramat //