Mahabharata · Chapter 5.174
tato'haṃ bharataśreṣṭha mātaraṃ vīramātaram /
abhigamyopasangṛhya dāśeyīmidamabruvam //
imāḥ kāśipateḥ kanyā mayā nirjitya pārthivān /
vicitravīryasya kṛte vīryaśulkā hṛtā iti //
tato mūrdhanyupāghrāya paryaśrunayanā nṛpa /
āha satyavatī hṛṣṭā diṣṭyā putra jitaṃ tvayā //
satyavatyāstvanumate vivāhe samupasthite /
uvāca vākyaṃ savrīḍā jyeṣṭhā kāśipateḥ sutā //
bhīṣma tvamasi dharmajñaḥ sarvaśāstraviśāradaḥ /
śrutvā ca vacanaṃ dharmyaṃ mahyaṃ kartumihārhasi //
mayā sālvapattiḥ pūrvaṃ manasā'bhivṛto varaḥ /
tena cāsmi vṛtā pūrvaṃ rahasyavidite pituḥ //
kathaṃ māmanyakāmāṃ tvaṃ rājadharmamatītya vai /
vāsayethā gṛhe bhīṣma kauravaḥ sanviśeṣataḥ //
etadbuddhyā viniścitya manasā bharatarṣabha /
yatkṣamaṃ te mahābāho tadihārabdhumarhasi //
sa māṃ pratīkṣate vyaktaṃ sālvarājo viśāmpate /
tasmānmāṃ tvaṃ kuruśreṣṭha samanujñātumarhasi //
kṛpāṃ kuru mahābāho mayi dharmabhṛtāṃ vara /
tvaṃ hi satyavrato vīra pṛthivyāmiti naḥ śrutam //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0