Mahabharata · Chapter 5.173

kimarthaṃ bharataśreṣṭha naiva hanyāḥ śikhaṇḍinam /
udyateṣumatho dṛṣṭvā samareṣvātatāyinam //

pūrvamuktvā mahābāho pāñcālānsaha somakaiḥ /
haniṣyāmīti gāṅgeya tanme brūhi pitāmaha //
bhīṣma uvāca /

śrṛṇu duryodhana kathāṃ sahaibhirvasudhādhipaiḥ /
yadarthaṃ yudhi samprekṣya nāhaṃ hanyāṃ śikhaṇḍinam //

mahārājo mama pitā śāntanurlokaviśrutaḥ /
diṣṭāntamāpa dharmātmā samaye bharatarṣabha //

tato'haṃ bharataśreṣṭha pratijñāṃ paripālayan /
citrāṅgadaṃ bhrātaraṃ vai mahārājye'bhyapecayam //

tasmiṃśca nidhanaṃ prāpte satyavatyā mate sthitaḥ /
vicitravīryaṃ rājānamabhyaṣiñcaṃ yathāvidhi //

mayā'bhiṣikto rājendra yavīyānapi dharmataḥ /
vicitravīryo dharmātmā māmeva samudaikṣata //

tasya dārakriyāṃ tāta cikīrṣurahamapyuta /
anurūpādiva kulādityeva ca mano dadhe //

tathā'śrauṣaṃ mahābāho tisraḥ kanyāḥ svayaṃvare . rūpeṇāpratimāḥ sarvāḥ kāśirājasutāstadā /
ambāṃ caivāmbikāṃ caiva tathaivāmbālikāmapi //

rājānaśca samāhūtāḥ pṛthivyāṃ bharatarṣabha /
ambā jyeṣṭhābhavattāsāmambikā tvatha madhyamā //

ambālikā ca rājendra rājakanyā yavīyasī /
so'hamekarathenaiva gataḥ kāśipateḥ purīm //

apaśyaṃ tā mahābāho tisraḥ kanyāḥ svalaṅkṛtāḥ /
rājñaścaiva samāhūtānpārthivānpṛthivīpate //

tato'haṃ tānnṛpānsarvānāhūya samare sthitān /
rathamāropayāñcakre kanyāstā bharatarṣabha //

vīryaśulkāśca tā jñātvā samāropya rathaṃ tadā / avocaṃ pārthivānsarvānahaṃ tatra samāgatān /
bhīṣmaḥ śāntanavaḥ kanyā haratīti punaḥpunaḥ //

te yatadhvaṃ paraṃ śaktyā sarve mokṣāya pārthivāḥ /
prasahya hi harāmyeṣa miṣatāṃ vo nararṣabhāḥ //

tataste pṛthivīpālāḥ samutpaturudāyudhāḥ /
yogo yoga iti kruddhāḥ sārathīnabhyacodayan //

te rathairgasaṅkāśairgajaiśca gajayodhinaḥ /
puṣṭaiśvāśvairmahīpālāḥ samutpeturudāyudhāḥ //

tataste māṃ mahīpālāḥ sarva eva viśāṃ pate /
rathavrātena mahatā sarvataḥ paryavārayan //

tānahaṃ śaravarṣeṇa samantātparyavārayam /
sarvānnṛpāṃścāpyajayaṃ devarāḍiva dānavān //

apātayaṃ śarairdīptaiḥ prahasanbharatarṣabha /
teṣāmāpatatāṃ citrāndhvajānhemapariṣkṛtān //

ekaikena hi bāṇena bhūmau pātitavānaham /
hayāṃsteṣāṃ gajāṃścaiva sārathīṃścāpyahaṃ raṇe //

te nivṛttāśca bhagnāśca dṛṣṭvā tallāghavaṃ mama / 5-173-22bpraṇipetuśca sarve vai praśaśaṃsuśca pārthivāḥ //

tata ādāya tāḥ kanyā nṛpatīṃśca visṛjya tān / athā'haṃ hāstinapuramāyāṃ jitvā mahīkṣitaḥ //

tato'haṃ tāśca kanyā vai bhrāturarthāya bhārata /
tacca karma mahābāho satyavatyai nyavedayam //