Mahabharata · Chapter 5.172

rocamāno mahārāja pāṇḍavānāṃ mahārathaḥ /
yotsyate'maravatsaṃkhye parasainyeṣu bhārata //

purujitkṛntibhojaśca maheṣvāso mahābalaḥ /
mātulo bhīmasenasya sa ca me'tiratho mataḥ //

eṣa vīro maheṣvāsaḥ kṛtī ca nipuṇaśca ha /
citrayodhī ca śaktaśca mato me rathapuṅgavaḥ //

sa yotsyati hi vikramya maghavāniva dānavaiḥ /
yodhā ye cāsya vikhyātāḥ sarve yuddhaviśāradāḥ //

bhāgineyakṛte vīraḥ sa kariṣyati sangare /
sumahatkarma pāṇḍūnāṃ sthitaḥ priyahite rataḥ //

bhaimasenirmahārāja haiḍimbo rākṣaseśvaraḥ /
mato me bahumāyāvī rathayūthapayūthapaḥ //

yotsyate samare tāta māyāvī samarapriyaḥ /
ye cāsya rākṣasā vīrāḥ sacivā vaśavartinaḥ //

ete cānye ca bahavo nānājanapadeśvarāḥ /
sametāḥ pāṇḍavasyārthe vāsudevapurogamāḥ //

ete prādhānyato rājanpāṇḍavasya mahātmanaḥ /
rathāścātirathāścaiva ye cānye'rdhaṃrathā nṛpa //

neṣyanti samare senāṃ bhīmāṃ yaudhiṣṭhirīṃ nṛpa /
mahendreṇeva vīreṇa pālyamānāṃ kirīṭinā //

tairahaṃ samare vīra māyāvidbhirjayaiṣibhiḥ /
yotsyāmi jayamākāṅkṣannatha vā nidhanaṃ raṇe //

vāsudevaṃ ca pārthaṃ ca cakragāṇḍīvadhāriṇau /
sandhyāgatāvivārkendū sabheṣyete rathottamau //

yaṃ caiva te rathodārāḥ pāṇḍuputrasya sainikāḥ /
saha sainyānahaṃ tāṃśca pratīyāṃ raṇamūrdhani //

ete rathāścātirathāśca tubhyaṃ yathāpradhānaṃ nṛpa kīrtitā mayā /
tathā pare ye'rdharathāśca keci- ttathaiṃva teṣāmapi kauravendra //

arjunaṃ vāsudevaṃ ca ye cānye tatra pārthivāḥ /
sarvāṃstānvārayiṣyāmi yāvaddrakṣyāmi bhārata //

pāñcālyaṃ tu mahābāho nāhaṃ hanyāṃ śikhaṇḍinam /
udyateṣamatho dṛṣṭvā pratiyudhyantamāhave //

lokastaṃ veda yadahaṃ pituḥ priyacikīrṣayā /
prāptaṃ rājyaṃ parityajya brahmacaryavrate sthitaḥ //

citrāṅgadaṃ kauravāṇāmādhipatye'bhyaṣecayam /
vicitravīryaṃ ca śiśuṃ yauvarājye'bhyaṣecayam //

devavratatvaṃ vijñāpya pṛthivīṃ sarvarājasu /
naiva hanyāṃ striyaṃ jātu na strīpūrvaṃ kadācana //

sa hi strīpūrvako rājañśikhaṇḍī yadi te śrutaḥ /
kanyā bhūtvā pumāñcāto na yotsye tena bhārata //

sarvāṃstvanyānhaniṣyāmi pārthivānbharatarṣabha /
yānsameṣyāmi samare na tu kuntīsutānnṛpa //