Mahabharata · Chapter 5.171

pāñcālarājasya suto rājanparapurañjayaḥ /
śikhaṇḍī rathamukhyo me mataḥ pārthasya bhārata //

eṣa yotsyati sangrāme nāśayanpūrvasaṃsthitam /
paraṃ yaśo viprathayaṃstava senāsu bhārata //

etasya bahulāḥ senāḥ pāñcālāśca prabhadrakāḥ /
tenāsau rathavaṃśena mahatkarma kariṣyati //

dhṛṣṭadyumnaśca senānīḥ sarvasenāsu bhārata /
mato me'tiratho rājandroṇaśiṣyo mahārathaḥ //

eṣa yotsyati sangrāme sūdayanvai parānraṇe /
bhagavāniva sankruddhaḥ pinākī yugasankṣaye //

etasya tadrathānīkaṃ kathayanti raṇapriyāḥ /
bahutvātsāgaraprakhyaṃ devānāmiva saṃyuge //

kṣatradharmā tu rājendra mato me'rdharatho nṛpa /
dhṛṣṭadyumnasya tanayo bālyānnātikṛtaśramaḥ //

śiśupālasuto vīraścedirājo mahārathaḥ /
dhṛṣṭaketurmaheṣvāsaḥ sambandhī pāṇḍavasya ha //

eṣa cedipatiḥ śūraḥ saha putreṇa bhārata /
mahārathānāṃ sukaraṃ mahatkarma kariṣyati //

kṣatradharmarato mahyaṃ mataḥ parapurañjayaḥ /
kṣatradevastu rājendra pāṇḍaveṣu rathottamaḥ //

jayantaścāmitaujāśca satyajicca mahārathaḥ /
mahārathā mahātmānaḥ sarve pāñcālasattamāḥ //

yotsyante samare tāta saṃrabdhā iva kuñjarāḥ /
ajo bhojaśca vikrāntau pāṇḍavārthe mahārathau //

yotsyete balinau śūrau paraṃ śaktyā yatiṣyataḥ /
śīghrāstrāścitrayoddhāraḥ kṛtino dṛḍhavikramāḥ //

kekayāḥ pañca rājendra bhrātaro dṛḍhavikramāḥ /
sarve caiva rathodārāḥ sarve lohitakadhvajāḥ //

kāśikaḥ sukumāraśca nīlo yaścāparo nṛpa /
sūryadattaśca śaṅkhaśca madirāśvaśca nāmataḥ //

sarva eva rathodārāḥ sarve cāhavalakṣaṇāḥ /
sarvāstraviduṣaḥ sarve mahātmāno matā mama //

vārdhakṣemirmahārāja mato mama mahārathaḥ /
citrāyughaśca nṛpatirmato me rathasattamaḥ //

sa hi saṅgrāmaśobhī ca bhaktaścāpi kirīṭinaḥ . cekitānaḥ satyadhṛtiḥ pāṇḍavānāṃ mahārathau /
dvāvimau puruṣavyāghrau rathodārau matau mama //

vyāghradattaśca rājendra candrasenaśca bhārata /
matau mama rathodārau pāṇḍavānāṃ na saṃśayaḥ //

senābinduśca rājendra krodhahantā ca nāmataḥ /
yaḥ samo vāsudevena bhīmasenena vā vibho //

sa yotsyati hi vikramya samare tava sainikaiḥ /
māṃ ca droṇaṃ kṛpaṃ caiva yathā sammanyate bhavān //

tathā sa samaraślāghī mantavyo rathasattamaḥ /
kāśyaḥ paramaśīghrāstraḥ ślāghanīyo narottamaḥ //

ratha ekaguṇo mahyaṃ jñeyaḥ parapurañjayaḥ /
ayaṃ ca yudhi vikrānto mantavyoṣṭaguṇo rathaḥ //

satyajitsamaraślāghī drupadasyātmajo yuvā /
gataḥ so'tirathatvaṃ hi dhṛṣṭadyumnena sammitaḥ //

pāṇḍavānāṃ yaśaskāmaḥ paraṃ karma kariṣyati /
anuraktāśca śūraśca ratho'yamaparo mahān //

pāṇḍyarājo mahāvīryaḥ pāṇḍavānāṃ dhurandharaḥ /
dṛḍhadhanvā maheṣvāsaḥ pāṇḍavānāṃ mahārathaḥ //

śreṇimānkauravaśreṣṭha vasudānaśca pārthivaḥ /
ubhāvetāvatirathau matau parapurañjayau //