Mahabharata · Chapter 5.170
draupadeyā mahārāja sarve pañca mahārathāḥ /
vairāṭiruttaraścaiva rathodāro mato mama //
abhimanyurmahābāhū rathayūthamayūthapaḥ /
samaḥ pārthena samare vāsudevena cārihā //
laghvastraścitrayodhī ca manasvī ca dṛḍhavrataḥ /
saṃsmaranvai parikleśaṃ svapiturvikramiṣyati //
sātyakirmādhavaḥ śūro rathayūthapayūthapaḥ /
eṣa vṛṣṇipravīrāṇāmamarṣī jitasādhvasaḥ //
uttamaujāstathā rājanrathodāro mato mama /
yudhāmanyuśca vikrānto rathodāro mato mama //
eteṣāṃ bahusāhasrā rathā nāgā hayāstathā /
yotsyante te tanūstyaktvā kuntīputrapriyepsayā //
pāṇḍavaiḥ saha rājendra tava senāsu bhārata /
agnimārutavadrājannāhvayantaḥ parasparam //
ajeyau samare vṛddhau virāṭadrupadau tathā /
mahārathau mahāvīryau matau me puruṣarṣabhau //
vayovṛddhāvapi hi tau kṣatradharmaparāyaṇau /
yatiṣyete paraṃ śaktyā sthitau vīragate pathi //
sambandhikena rājendra tau tu vīryabalānvayāt /
āryavṛttau maheṣvāsau snehavīryasitāvubhau //
kāraṇaṃ prāpya tu narāḥ sarva eva mahābhujāḥ /
śūrā vā kātarā vāpi bhavanti kurupuṅgava //
ekāyanagatāvetau pārthivau dṛḍhadhanvinau /
prāṇāṃstyaktvā paraṃ śaktyā ghaṭṭitārau parantapa //
pṛthagakṣauhiṇībhyāṃ tāvubhau saṃyati dāruṇau /
sambandhibhāvaṃ rakṣantau mahatkarma kariṣyataḥ //
lokavīrau maheṣvāsau tyaktātmānau ca bhārata /
pratyayaṃ parirakṣantau mahatkarma kariṣyataḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0