Mahabharata · Chapter 5.169

ete rathāstavākhyātāstathaivātirathā nṛpa /
ye cāpyardharathā rājanpāṇḍavānāmataḥ śrṛṇu //

yadi kautūhalaṃ te'dya pāṇḍavānāṃ bale nṛpa /
rathasaṃkhyāṃ śṛṇuṣva tvaṃ sahaibhirvasudhādhipaiḥ //

svayaṃ rājā rathodāraḥ pāṇḍavaḥ kuntanandanaḥ /
agnivatsamare tāta cariṣyati na saṃśayaḥ //

bhīmasenastu rājendra ratho'ṣṭaguṇasammitaḥ /
na tasyāsti samo yuddhe gadayā sāyakairapi //

nāgāyutabalo mānī tejasā na sa mānuṣaḥ /
mādrīputro ca rathinau dvāveva puruṣarṣabhau //

aśvināviva rūpeṇa tejasā ca samanvitau /
ete camūmukhagatāḥ smarantaḥ kleśamuttamam //

rudravatpracariṣyanti tatra me nāsti saṃśayaḥ /
sarva eva mahātmānaḥ sālastambhā ivodgatāḥ //

prādeśenādhikāḥ pumbhiranyaiste ca pramāṇataḥ /
siṃhasaṃhananāḥ sarve pāṇḍuputrā mahābalāḥ //

caritabrahmacaryāśca sarve tāta tapasvinaḥ /
hrīmantaḥ puruṣavyāghrā vyāghrā iva balotkaṭāḥ //

jave prahāre sammarde sarva evātimānuṣāḥ /
sarvairjitā mahīpālā digjaye bharatarṣabha //

na caiṣāṃ puruṣāḥ kecidāyudhāni gadāḥ śarān /
viṣahanti sadā kartumadhijyānyapi kaurava //

udyantuṃ vā gadā gurvīḥ śarānvā kṣeptumāhave /
jave lakṣyasya haraṇe bhojye pāṃsuvikarṣaṇe //

bālairapi bhavantastaiḥ sarva eva viśeṣitāḥ /
etatsainyaṃ samāsādya sarva eva balotkaṭāḥ //

vidhvaṃsayiṣyanti raṇe mā sma taiḥ saha sangamaḥ /
ekaikaśasta sammarde hanyuḥ sarvānmahīkṣitaḥ //

pratyakṣaṃ tava rājendra rājasūye yathābhavat /
draupadyāśca parikleśaṃ dyūte ca paruṣā giraḥ //

te smarantaśca saṅgrāme cariṣyanti ca rudravat /
lohitākṣo guḍākeśo nārāyaṇasahāyavān //

ubhoyoḥ senayorvīro ratho nāstīti tādṛśaḥ /
na hi deveṣu vā pūrvaṃ manuṣyeṣūrageṣu ca //

rākṣaseṣvatha yakṣeṣu nareṣu kuta eva tu /
bhūtotha vā bhaviṣyo vā rathaḥ kaścinmayā śrutaḥ //

samāyukto mahārāja rathaḥ pārthasya dhīmataḥ /
vāsudevaśca saṃyantā yoddhā caiva dhanañjayaḥ //

gāṇḍīvaṃ ca dhanurdivyaṃ te cāśvā vātaraṃhasaḥ /
abhedyaṃ kavacaṃ divyamakṣayyau ca maheṣudhī //

astragrāmaśca māhendro raudraḥ kaubera evaca /
yāmyaśca vāruṇaścaiva gadāścograpradarśanāḥ //

vajrādīni ca mukhyāni nānāpraharaṇāni ca /
dānavānāṃ sahasrāṇi hiraṇyapuravāsinām //

hatānyekarathenājau kastasya sadṛśo rathaḥ /
eṣa hanyāddhi saṃrambhī balavānsatyavikramaḥ //

tava senāṃ mahābāhuḥ svāṃ caiva paripālayan /
ahaṃ cainaṃ pratyudiyāmācāryo vā dhanañjayam //

na tṛtīyo'sti rājendra senayorubhayorapi /
ya enaṃ śaravarṣāṇi varṣantamudiyādrathī //

jīmūta iva gharmānte mahāvātasamīritaḥ . samāyuktastu kaunteyo vāsudevasahāyavān /
taruṇaśca kṛtī caiva jīrṇāvāvāmubhāvapi //
vaiśampāyana uvāca /

etacchrutvā tu bhīṣmasya rājñāṃ dadhvaṃsire tadā /
kāñcanāṅgadinaḥ pīnā bhujāścandanarūṣitāḥ //

manobhiḥ saha saṃvegaiḥ saṃsmṛtya ca purātanam /
sāmarthyaṃ pāṇḍaveyānāṃ yathā pratyakṣadarśanāt //