મહાભારત · અધ્યાય 5.170

દ્રૌપદેયા મહારાજ સર્વે પઞ્ચ મહારથાઃ ।
વૈરાટિરુત્તરશ્ચૈવ રથોદારો મતો મમ ॥

અભિમન્યુર્મહાબાહૂ રથયૂથમયૂથપઃ ।
સમઃ પાર્થેન સમરે વાસુદેવેન ચારિહા ॥

લઘ્વસ્ત્રશ્ચિત્રયોધી ચ મનસ્વી ચ દૃઢવ્રતઃ ।
સંસ્મરન્વૈ પરિક્લેશં સ્વપિતુર્વિક્રમિષ્યતિ ॥

સાત્યકિર્માધવઃ શૂરો રથયૂથપયૂથપઃ ।
એષ વૃષ્ણિપ્રવીરાણામમર્ષી જિતસાધ્વસઃ ॥

ઉત્તમૌજાસ્તથા રાજન્રથોદારો મતો મમ ।
યુધામન્યુશ્ચ વિક્રાન્તો રથોદારો મતો મમ ॥

એતેષાં બહુસાહસ્રા રથા નાગા હયાસ્તથા ।
યોત્સ્યન્તે તે તનૂસ્ત્યક્ત્વા કુન્તીપુત્રપ્રિયેપ્સયા ॥

પાણ્ડવૈઃ સહ રાજેન્દ્ર તવ સેનાસુ ભારત ।
અગ્નિમારુતવદ્રાજન્નાહ્વયન્તઃ પરસ્પરમ્ ॥

અજેયૌ સમરે વૃદ્ધૌ વિરાટદ્રુપદૌ તથા ।
મહારથૌ મહાવીર્યૌ મતૌ મે પુરુષર્ષભૌ ॥

વયોવૃદ્ધાવપિ હિ તૌ ક્ષત્રધર્મપરાયણૌ ।
યતિષ્યેતે પરં શક્ત્યા સ્થિતૌ વીરગતે પથિ ॥

સમ્બન્ધિકેન રાજેન્દ્ર તૌ તુ વીર્યબલાન્વયાત્ ।
આર્યવૃત્તૌ મહેષ્વાસૌ સ્નેહવીર્યસિતાવુભૌ ॥

કારણં પ્રાપ્ય તુ નરાઃ સર્વ એવ મહાભુજાઃ ।
શૂરા વા કાતરા વાપિ ભવન્તિ કુરુપુઙ્ગવ ॥

એકાયનગતાવેતૌ પાર્થિવૌ દૃઢધન્વિનૌ ।
પ્રાણાંસ્ત્યક્ત્વા પરં શક્ત્યા ઘટ્ટિતારૌ પરન્તપ ॥

પૃથગક્ષૌહિણીભ્યાં તાવુભૌ સંયતિ દારુણૌ ।
સમ્બન્ધિભાવં રક્ષન્તૌ મહત્કર્મ કરિષ્યતઃ ॥

લોકવીરૌ મહેષ્વાસૌ ત્યક્તાત્માનૌ ચ ભારત ।
પ્રત્યયં પરિરક્ષન્તૌ મહત્કર્મ કરિષ્યતઃ ॥