Mahabharata · Chapter 5.167

śakunirmātulaste'sau ratha eko narādhipa /
prayujya pāṇḍavairvairaṃ yotsyate nātra saṃśayaḥ //

etasya senā durdharṣā samare pratiyāyinaḥ /
vikṛtāyudhabhūyiṣṭhā vāyuvegasamā jave //

droṇaputro maheṣvāsaḥ sarvānevātidhanvinaḥ /
samare citrayodhī ca dṛḍhāstraśca mahārathaḥ //

etasya hi mahārāja yathā gāṇḍīvadhanvanaḥ /
śarāsanavinirmuktāḥ saṃsaktā yānti sāyakāḥ //

naiṣa śakyo mayā vīraḥ saṃkhyātuṃ rathasattamaḥ /
nirdahedapi lokāṃstrīnicchanneṣa mahārathaḥ //

krodhastejaśca tapasā sambhṛtośramavāsinām /
droṇenānugṛhītaśca divyairastrairudāradhīḥ //

doṣastvasya mahāneko yenaiva bharatarṣabha /
na me ratho nātiratho mataḥ pārthivasattama //

jīvitaṃ priyamatyarthamāyuṣkāmaḥ sadā dvijaḥ /
na hyasya sadṛśaḥ kaścidubhayoḥ senayorapi //

hanyādekarathenaiva devānāmapi vāhinīm /
vapuṣmāṃstalaghoṣeṇa sphoṭayedapi parvatān //

asaṃkhyeyaguṇo vīraḥ prahantā dāruṇadyutiḥ /
daṇḍapāṇirivāsahyaḥ kālavatpracariṣyati //

yugāntāgnisamaḥ krodhātsiṃhagrīvo mahādyutiḥ /
eṣa bhārata yuddhasya pṛṣṭhaṃ saṃśayamiṣyati //

pitā tvasya mahātejā vṛddho'pi yuvabhirvaraḥ /
raṇe karma mahatkartā atra me nāsti saṃśayaḥ //

astravegānilodbhūtaḥ senākakṣendhanotthitaḥ /
pāṇḍuputrasya sainyāni pradhakṣyati raṇe dhṛtaḥ //

rathayūthapayūthānāṃ yūthapo'ya nararṣabhaḥ /
bharadvājātmajaḥ kartā karma tīvraṃ hitaṃ tava //

sarvamūrdhābhiṣiktānāmācāryaḥ sthaviro guruḥ /
gacchedantaṃ sṛñjayānāṃ priyastvasya dhanañjayaḥ //

naiṣa jātu maheṣvāsaḥ pārthamakliṣṭakāriṇam /
hanyādācāryakaṃ dīptaṃ saṃsmṛtya guṇanirjitam //

ślāghate yaṃ sadā vīra pārthasya guṇavistaraiḥ /
putrādabhyadhikaṃ cainaṃ bhāradvājo'nupaśyati //

hanyādekarathenaiva devagandharvamānuṣān /
ekībhūtānapi raṇe divyairastraiḥ pratāpavān //

pauravo rājaśārdūlastava rājanmahārathaḥ /
mato mama rathodāraḥ paravīrarathārujaḥ //

svena sainyena mahatā pratapañśatruvāhinīm /
pradhakṣyati sa pāñcālānkakṣamagnigatiryathā //

satyaśravā rathastveko rājaputro bṛhadbalaḥ /
tava rājanripubale kālavatpracariṣyati //

etasya yodhā rājendra vicitrakavacāyudhāḥ /
vicariṣyanti saṅ्grāme ninghantaḥ śāstravāṃstava //

vṛṣaseno rathaste'gryaḥ karṇaputro mahārathaḥ /
pradhakṣyati ripūṇāṃ te balaṃ tu balināṃ varaḥ //

jaghasandho mahātejā rājanrathavarastava /
tyakṣyate samare prāṇānmādhavaḥ paravīrahā //

eṣa yotsyati saṅgrāme gajaskandhaviśāradaḥ /
rathena vā māhabāhuḥ kṣapayañśatruvāhinīm //

ratha eṣa mahārāja mato me rājasattama /
tvadarthe tyakṣyate prāṇānsahasainyo mahāraṇe //

eṣa vikrāntayodhī ca citrayodhī ca sangare /
vītabhīścāpi te rājañśatrubhiḥ saha yotsyate //

bāhlīko'tirathaścaiva samare cānivartanaḥ /
mama rājanmato yuddhe śūro vaivasvatopamaḥ //

na hyeṣa samaraṃ prāpya nivarteta kathañcana /
yathā satatago rājansa hi hanyātparānraṇe //

senāpatirmahārāja satyavāṃste mahārathaḥ /
raṇeṣvadbhutakarmā ca rathī pararathārujaḥ //

etasya samaraṃ dṛṣṭvā na vyathāsti kathañcana /
utsmayannutpatatyeṣa parānrathapathe sthitān //

eṣa cāriṣu vikrāntaḥ karma satpuruṣocitam /
kartā vimarde sumahattvadarthe puruṣottamaḥ //

alambuso rākṣasendraḥ krūrakarmā mahārathaḥ /
haniṣyati parānrājanpūrvavairamanusmaran //

eṣa rākṣasasainyānaṃ sarveṣāṃ rathasattamaḥ /
māyāvī dṛḍhavairaśca samare vicariṣyati //

prāgjyotiṣādhipo vīro bhagadattaḥ pratāpavān /
gajāṅkuśadharaśreṣṭho rathe caiva viśāradaḥ //

etena yuddhamabhavatpurā gāṇḍīvadhanvanaḥ /
divasānsubahūnrājannubhayorjayagṛddhinoḥ //

tataḥ sakhāyaṃ gāndhāre mānayanpākaśāsanam /
akarotsaṃvidaṃ tena pāṇḍavena mahātmanā //

eṣa yotsyati saṅgrāme gajaskandhaviśāradaḥ /
airāvatagato rājā devānāmiva vāsavaḥ //