Mahabharata · Chapter 5.166

sudakṣiṇastu kāmbhojo ratha ekaguṇo mataḥ /
tavārthasiddhimākāṅkṣanyotsyate samare paraiḥ //

etasya rathasiṃhasya tavārthe rājasattama /
parākramaṃ yathendrasya drakṣyanti kuravo yudhi //

etasya rathavaṃśe hi tigmavegaprahāriṇaḥ /
kāmbhojānāṃ mahārāja śalabhānāmivāyatiḥ //

nīlo māhiṣyatīvāsī nīlavarmā rathastava /
rathavaṃśena kadanaṃ śatrūṇāṃ vai kariṣyati //

kṛtavairaḥ purā caiva sahadevena māriṣa /
yotsyate satataṃ rājaṃstavārthe kurunandana //

vindānuvindāvāvantyau sammatau rathasattamau /
kṛtinau samare tāta dṛḍhavīryaparākramau //

etau tau puruṣavyāghrau ripusainyaṃ pradhakṣyataḥ /
gadāprāsāsinārācaistomaraiśca karacyataiḥ //

yuddhābhikāmau samare krīḍantāviva yūthapau /
yūthamadhye mahārāja vicarantau kṛtāntavat //

trigartā bhrātaraḥ pañca rathodārā matā mama /
kṛtavairāśca pārthaiste virāṭanagare tadā //

makarā iva rājendra samuddhatataraṅgiṇīm /
gaṅgāṃ vikṣobhayiṣyanti pārthānāṃ yudhi vāhinī //

te rathāḥ pañca rājendra yeṣāṃ satyaratho mukham /
ete yotsyanti saṅgrāme saṃsmarantaḥ purākṛtamak //

vyalīkaṃ pāṇḍaveyena bhīmasenānujena ha /
diśo vijayatā rājañśvetavāhena bhārata //

te haniṣyanti pārthānāṃ tānāsādya mahārathān /
varānvarānmaheṣvāsānkṣatriyāṇāṃ dhurandharān //

lakṣṇaṇastava putraśca tathā duḥśāsanasya ca /
ubhau tau puruṣavyāghrau sangrāmeṣvapalāyinau //

taruṇau sukumārau ca rājaputrau ratasvinau /
yuddhānāṃ ca viśeṣajñau praṇetārau ca sarvaśaḥ //

rathau tau kuruśārdūla matau me rathasattamau /
kṣatradharmaratau vīrau mahatkarma kariṣyataḥ //

daṇḍadhāro mahārāja ratha eko nararṣabha /
yotsyate tava saṅgrāme svena sainyena pālitaḥ //

bṛhadbalastathā rājā kausalyo rathasattamaḥ /
ratho mama matastāta mahāvegaparākramaḥ //

eṣa yotsyati saṅ्grāme svānbandhūnsampraharṣayan /
ugrāyudho maheṣvāso dhārtarāṣṭrahite rataḥ //

kṛpaḥ śāradvato rajanrathayūthapayūthapaḥ /
priyānprāṇānparityajya pradhakṣyati ripūṃstava //

gautamasya maharṣerya ācāryasya śaradvataḥ /
kārtikeya ivājayaḥ śarastambātsuto'bhavat //

eṣa senāḥ subahulā vividhāyudhakārmukāḥ /
agnivatsamare tāta cariṣyati vinirdahan //