Mahabharata · Chapter 5.165

pratijñāte phālgunena vadhe bhīṣmasya saṃyuge /
kimakurvata me mandāḥ putrā duryodhanādayaḥ //

hatameva hi paśyāmi gāṅgeyaṃ pitaraṃ raṇe /
vāsudevasahāyena pārthena dṛḍhadhanvanā //

sa cāparimitaprajñastacchrutvā pārthabhāṣitam /
kimuktavānmaheṣvāso bhīṣmaḥ praharatāṃ varaḥ //

saināpatyaṃ ca samprāpya kauravāṇāṃ dhurandharaḥ /
kimaceṣṭata gāṅgeyo mahābuddhiparākramaḥ //
vaiśampāyana uvāca /

tatastatsañjayastasmai sarvameva nyavedayat /
yathoktaṃ kuruvṛddhena bhīṣmeṇāmitatejasā //
sañjaya uvāca /

saināpatyamanuprāpya bhīṣmaḥ śāntanavo nṛpa /
duryodhanamuvācedaṃ vacanaṃ harṣayanniva //

namaskṛtya kumārāya senānye śaktipāṇaye . ahaṃ senāpatiste'dya bhaviṣyāmi na saṃśayaḥ /

senākarmaṇyijño'smi vyūheṣu vividheṣu ca /
karma kārayituṃ caiva bhṛtānapyabhṛtāṃstathā //

yātrāyāne ca yuddhe ca tathā praśamaneṣu ca /
bhṛśaṃ veda mahārāja yathā veda bṛhaspatiḥ //

vyūhānāṃ ca samārambhāndaivagāndharvamānuṣān /
tairahaṃ mohayiṣyāmi pāṇḍavānvyetu te jvaraḥ //

so'haṃ yotsyāmi tattvena pālayaṃstava vāhinīm /
yathāvacchāstrato rājanvyetu te mānaso jvaraḥ //
duryodhana uvāca /

vidyate me na gāṅgeya bhayaṃ devāsureṣvapi /
samasteṣu mahābāho satyametadbravīmi te //

kiṃ punastvayi durdharpe saināpatye vyavasthite /
droṇe ca puruṣavyāghre sthite yuddhābhinandini //

bhavadryāṃ puruṣāgryābhyāṃ sthitābhyāṃ vijayo mama /
na durlabhaṃ kuruśreṣṭha devarājyamapi dhruvam //

rathasaṅkhyāṃ tu kārtsnyena pareṣāmātmanastathā /
tathaivātirathānāṃ ca vettumicchāmi kaurava //

pitāmaho hi kuśalaḥ pareṣāmātmanastathā /
śrotumicchāmyahaṃ sarvaiḥ sahaibhirvasudhādhipaiḥ //
bhīṣma uvāca /

gāndhāre śrṛṇu rājendra rathasaṃkhyāṃ svake bale /
ye rathāḥ pṛthivīpāla tathaivātirathāśca ye //

bahūnīha sahasrāṇi prayutānyarbudāni ca /
rathānāṃ tava senāyāṃ yathāmukhyaṃ tu me śruṇu //

bhavānagre rathodāraḥ saha sarvaiḥ sahodaraiḥ /
duḥśāsanaprabhṛtibhirbhrātṛbhiḥ śatasammitaiḥ //

sarve kṛtapraharaṇāśchedabhedaviśāradāḥ /
rathopasthe gajaskandhe gadāprāsāsicarmaṇi //

saṃyantāraḥ prahartāraḥ kṛtāstrā bhārasādhanāḥ /
iṣvastre droṇaśiṣyāśca kṛpasya ca śaradvataḥ //

ete haniṣyanti raṇe pāñcālānyuddhadurmadān /
kṛtakilbiṣāḥ pāṇḍaveyairdhārtarāṣṭrā manasvinaḥ //

tathā'haṃ bharataśreṣṭha sarvasenāpatistava /
śatrūnvidhvaṃsayiṣyāmi kadarthīkṛtya pāṇḍavān //

na tvātmano guṇānvaktumarhāmi vidito'smi te /
kṛtavarmā tvayiratho bhojaḥ śastrabhṛtāṃ varaḥ //

arthasiddhiṃ tava raṇe kariṣyati na saṃśayaḥ /
śastravidbhiranādhṛṣyo dūrapātī dṛḍhāyudhaḥ //

haniṣyati camūṃ teṣāṃ mahendro dānavāniva /
madrarājo maheṣvāsaḥ śalyo me'tiratho mataḥ //

spardhate vāsudevena nityaṃ yo vai raṇeraṇe / bhāgineyānnijāṃstyaktvā śalyaste'tiratho mataḥ /
eṣa yotsyati sangrāme pāṇḍavāṃśca mahārathān //

sāgarormisamairbāṇaiḥ plāvayanniva śātavān /
bhūriśravāḥ kṛtāsraśca tava cāpi hitaḥ suhṛt //

saumadattirmaheṣvāso rathayūthapayūthapaḥ /
valakṣayamamitrāṇāṃ sumahāntaṃ kariṣyati //

sindhurājo mahārāja mato me dviguṇo rathāḥ /
yotsyate samare rājanvikrānto rathasattamaḥ //

draupadīharaṇe rājanparikliṣṭaśca pāṇḍavaiḥ /
saṃsmaraṃstaṃ parikleśaṃ yotsyate paravīrahā //

etena hi tadā rājaṃstapa āsthāya dāruṇam /
sudurlabho varo labdhaḥ pāṇḍavānyoddhrumāhave //

sa eṣa rathaśārdūlastadvairaṃ saṃsmaranraṇe /
yotsyate pāṇḍavaistāta prāṇāṃstyaktvā sudustyajān //