Mahabharata · Chapter 5.164

ulūkasya vṛttaḥ śrutvā kuntīputro yudhiṣṭhiraḥ /
senāṃ niyāpayāmāsa dhṛṣṭadyumnapurogamām //

padātinīṃ nāgavatīṃ rathinīmaśvabṛndinīm /
caturvidhabalāṃ bhīmāmakampāṃ pṛthivīmiva //

bhīmasenādibhirguptāṃ sārjunaiśca mahārathaiḥ /
dhṛṣṭadyumnavaśāṃ durgāṃ sāgarastimitopamām //

tasyāstvagre maheṣvāsaḥ pāñcālyo yuddhadurmadaḥ /
droṇaprepsuranīkāni dhṛṣṭadyumno vyakarṣata //

yathābalaṃ yathotsāhaṃ rathinaḥ samupādiśat /
arjunaṃ sūtaputrāya bhīmaṃ duryodhanāya ca //

dhṛṣṭaketuṃ ca śalyāya gautamāyottamaujasam /
aśvātthāmne ca nakulaṃ śaibyaṃ ca kṛtavarmaṇe //

saindhavāya ca vārṣṇeyaṃ yuyudhānaṃ samādiśat /
śikhaṇḍinaṃ ca bhīṣmāya pramukhe samakalpayat //

sahadevaṃ śakunaye cekitānaṃ śalāya vai /
draupadeyāṃstathā pañca trigartebhyaḥ samādiśat //

vṛṣasenāya saubhadraṃ śeṣāṇāṃ ca mahīkṣitām /
sa samarthaṃ hi taṃ mene pārthādabhyadhikaṃ raṇe //

evaṃ vibhajya yodhāṃstānpṛthakva saha caiva ha /
jvālāvarṇo maheṣvāso droṇamaṃśamakalpayat //

dhṛṣṭadyumno maheṣvāsaḥ senāpatipatistataḥ /
vidhivadvyūhya medhāvī yuddhāya dhṛtamānasaḥ //

yathoddiṣṭāni sainyāni pāṇḍavānāmayojayat /
jayāya pāṇḍuputrāṇāṃ yattastasthau raṇājire //