Mahabharata · Chapter 5.161

senāniveśaṃ samprāptaḥ kaitavyaḥ pāṇḍavasya ha /
samāgataḥ pāṇḍaveyairyudhiṣṭhiramabhāṣata //

abhijño dūtavākyānāṃ yathoktaṃ bruvato mama /
duryodhanasamādeśaṃ śrutvā na kroddhumarhasi //
yudhiṣṭhira uvāca /

ulūka na bhayaṃ te'sti brūhi tvaṃ vigatajvaraḥ /
yanmattaṃ dhārtarāṣṭrasya lubdhasyādīrghadarśinaḥ //
sañjaya uvāca /

tato dyutimatāṃ madhye pāṇḍavānāṃ mahātmanām /
sṛñjayānāṃ ca matsyānāṃ kṛṣṇasya ca yaśasvinaḥ //

drupadasya saputrasya virāṭasya ca sannidhau /
bhūmipānāṃ ca sarveṣāṃ madhye vākyaṃ jagāda ha //
ulūka uvāca /

idaṃ tvāmabravīdrājā dhārtarāṣṭro mahāmanāḥ /
śrṛṇvatāṃ kuruvīrāṇāṃ tannibodha yudhiṣṭhira //

parājito'si dyūtena kṛṣṇā cānāyitā sabhām /
śakyo'marṣo manuṣyeṇa kartuṃ puruṣamāninā //

dvādaśaiva tu varṣāṇi vane dhiṣṇyādvivāsitaḥ /
saṃvatsaraṃ virāṭasya dāsyamāsthāya coṣitaḥ //

amarṣaṃ rājyaharaṇaṃ vanavāsaṃ ca pāṇḍava /
draupadyāśca parikleśaṃ saṃsmaranpuruṣo bhava //

aśaktena ca yacchaptaṃ bhīmasenena pāṇḍava /
duḥśāsanasya rudhiraṃ pīyatāṃ yadi śakyate //

lohābhisāro nirvṛttaḥ kurukṣetramakardamam /
samaḥ panthā bhṛtāsteśvāḥ śvo yudhyasva sakeśavaḥ //

asamāgamya bhīṣmeṇa saṃyuge kiṃ vikatthase /
ārurukṣuryathā paṅguḥ parvataṃ gandhamādanam //

evaṃ katthasi kaunteya akatthanpuruṣo bhava /
sūtaputraṃ sudurgharṣaṃ śalyaṃ ca balināṃ varam //

droṇaṃ ca balināṃ śreṣṭhaṃ śacīpatisamaṃ yudhi /
ajitvā saṃyuge pārtha rājyaṃ kathamihecchasi //

brāhme dhanuṣi cācāryaṃ vedayorantagaṃ dvayoḥ /
yudhi dhuryamavikṣobhyamanīkacaramacyutam //

droṇaṃ mahādyutiṃ pārtha jetumicchasi tanmṛṣā /
na hi śuśruma vātena merumunmathitaṃ girim //

anilo vā vahenmeruṃ dyaurvāpi nipatenmahīm /
yugaṃ vā parivarteta yadyevaṃ syādyathāttha mām //

ko hyasti jīvitākāṅkṣī prāpyemamarimardanam /
gajo vājī ratho vāpi punaḥ svasti gṛhānvrajet //

kathamābhyāmabhidhyātaḥ saṃsṛṣṭo dāruṇena vā /
raṇe jīvanvimucyeta padā bhūmimupaspṛśan //

kiṃ durduraḥ kūpaśayo yathemāṃ na budhyame rājacamūṃ sametām /
durādharaṣāṃ devacamūprakāśāṃ guptāṃ narendraistridaśairiva dyām //

prācyaiḥ pratīcyairatha dākṣiṇātyai- rudīcyakāmbhojaśakaiḥ khaśaiśca /
sālvaiḥ samatsyaiḥ kurumukhyadeśyai- rmlecchaiḥ pulindairdraviḍāndhrakāñcyaiḥ //

nānājanaughaṃ yudhi sampravṛddhaṃ nāṅgaṃ yathā vegamapārakaṇīyam /
māṃ ca sthitaṃ nāgabalasya madhye yuyutsame manda kimalpabuddhe //

ityevamuktvā rājānaṃ dharmaputraṃ yudhiṣṭhiram /
abhyavṛtya punarjiṣṇumulūkaḥ pratyabhāṣata //

akatthamāno yudhyasva katthese'rjuna kiṃ bahu /
paryāyātsiddhiresya naitatsidhyati katthanāt //

yadīdaṃ katthanālloke sidhyetkarma dhanañjaya /
sarve bhaveyuḥ siddhārthāḥ katthane ko hi durgataḥ //

jānāmi te vāsudevaṃ sahāyaṃ jānāmi te gāṇḍivaṃ tālamātram /
jānāmyetattvādṛśo nāsti yoddhā jānānaste rājyametaddharāmi //

na tu paryāyadharmeṇa rājyaṃ prāpnoti mānuṣaḥ /
manasaivānukūlāni vidhātā kurute vaśe //

trayodaśa samā bhuktaṃ rājyaṃ vilapatastava /
bhūyaścaiva praśāsiṣye nihatya tvāṃ sabāndhavam //

kva tadā gāṇḍivaṃ te'bhūdyattvaṃ dāsapaṇairjitaḥ /
kva tadā bhīmasenasya balamāsīcca phālgunā //

sagadādbhīmasenādvā pārthādvāpi sagāṇḍivāt /
na vai mokṣastadā vobhūdvinā kṛṣṇāmaninditām //

sā vo dāsye samāpannānmocayāmāsa pārṣatī /
amānuṣyaṃ samāpannāndāsakarmaṇyavasthitān //

avocaṃ yatṣaṇḍatilānahaṃ vastathyameva tat /
dhṛtā hi veṇī pārthena virāṭanagare tadā //

sūdakarmaṇi ca śrāntaṃ virāṭasya mahānase /
bhīmasenena kaunteya yacca tanmama pauruṣam //

evametatsadāṃ daṇḍaṃ kṣatriyāḥ kṣatriye dadhuḥ /
veṇīṃ kṛtvā ṣaṇḍaveṣaḥ kanyāṃ nartitavānasi //

na bhayādvāsudevasya na cāpi tava phālguna /
rājyaṃ pratipradākasyāmi yuddhyasva sahakeśavaḥ //

na māyā hīndrajālaṃ vā kuhakā vāpi bhīṣaṇā /
āttaśastrasya me yuddhe vahanti pratigarjanāḥ //

vāsudevasahasraṃ vā phālgunānāṃ śatāni vā /
āsādya māmamogheṣuṃ draviṣyanti diśo daśaḥ //

saṃyugaṃ gaccha bhūṣmeṇa bhindhi vā śirasā girim /
taremaṃ vā mahāgādhaṃ saumadattitimiṅgilam //

śāradvatamahāmīnaṃ viviṃśatimahoragam . bṛhadbalamahodvelaṃ saumadattikatimiṅgitam //

bhīṣmavegamaparyantaṃ droṇagrāhadurāsadam /
karṇaśalyajhaṣāvartaṃ kāmbhojabaḍabāsukham //

duḥśāsanaughaṃ śalaśalyamatsyaṃ suṣeṇacitrāyudhanāganakram /
jayadrathādriṃ purumitragādhaṃ durmarṣaṇodaṃ śakuniprapātam //

śastraughamakṣayyamatipravṛddhaṃ yadāvagāhya śramanaṣṭacetāḥ /
bhaviṣyasi tvaṃ hatasarvabāndhava- stadā manaste paritāpameṣyati //

tadā manaste tridivādivāśuce- rnivartitā pārtha mahīpraśāsanāt /
praśāmya rājyaṃ hi sudurlabhaṃ tvayā bubhūṣitaḥ svarga ivātapasvinā //