Mahabharata · Chapter 5.156

tataḥ śāntanavaṃ bhīṣmaṃ prāñjalirdhṛtarāṣṭrajaḥ /
saha sarvairmahīpālairidaṃ vacanamabravīt //

ṛte senāpraṇetāraṃ pṛtanā sumahatyapi /
dīryate yuddhamāsādya pipīlikapuṭaṃ yathā //

nahi jātu dvayorbuddhiḥ samā bhavati karhicit /
śauryaṃ ca valanetṝṇāṃ spardhate ca parasparam //

śrūyate ca mahāprājña haihayānamitaujasaḥ /
abhyayurbrāhmaṇāḥ sarve samucchritakuśadhvajāḥ //

tānabhyayustadā vaiśyāḥ śūdrāścaiva pitāmaha /
ekatastu trayo varṇā ekataḥ kṣatriyarṣabhāḥ //

te sma yuddhe prabhajyante trayo varṇāḥ punaḥ punaḥ /
kṣatriyāśca jayantyeva bahulaṃ caikato balam //

tataste kṣatriyāneva papracchurdvicasattamāḥ /
tebhyaḥ śaśaṃsurdharmajñā yāthātathyaṃ pitāmaha //

vayamekasya śrṛṇumo mahābuddhimato raṇe /
bhavantastu pṛthaksarve svabuddhivaśavartinaḥ //

tataste brāhmaṇāścakrurekaṃ senāpatiṃ dvijam /
naye sukuśalaṃ śūramajayankṣatriyāṃstataḥ //

evaṃ ye kuśalaṃ śūraṃ hitepsitamakalpaṣam /
senāpatiṃ prakurvanti te jayanti raṇe ripūn //

bhavānuśanasā tulyo hitaiṣī ca sadā mama /
asaṃhārthaḥ sthito dharme sa naḥ senāpatirbhava //

raśmīvatāmivādityo vīrudhāmiva candramāḥ /
kubera iva yakṣāṇāṃ devānāmiva vāsavaḥ //

parvatānāṃ yathā meruḥ suparṇaḥ pakṣiṇāṃ yathā /
kumāra iva devānāṃ vasūnāmiva havyavāṭ //

bhavatā hi vayaṃ guptāḥ śatreṇeva divaukasaḥ /
anādhṛṣyā bhaviṣyāmastridaśānāmapi dhruvam //

prayātu no bhavānagre devānāmiva pāvakiḥ /
vayaṃ tvāmanuyāsyāmaḥ saurabheyā ivarṣabham //
bhīṣma uvāca /

evametanmahābāho yathā vadasi bhārata /
yathaiva hi bhavanto me tathaiva mama pāṇḍavāḥ //

api caiva mayā śroyo vācyaṃ teṣāṃ narādhipa /
saṃyoddhavyaṃ tavārthāya yathā me samayaḥ kṛtaḥ //

na tu paśyāmi yoddhāramātmanaḥ sadṛśaṃ bhuvi /
ṛte tasmānnaravyāghrātkuntīputrāddhanañjayāt //

sa hi veda mahābuddhirdivyānyastrāṇyanekaśaḥ /
na tu māṃ vivṛto yuddhe jātu yudhyeta pāṇḍavaḥ //

ahaṃ sa ca kṣaṇenaiva nirmanuṣyamidaṃ jagat /
kuryāvāstrabalenaiva sasurāsurarākṣasam //

na tvevotsādanīyā me pāṇḍoḥ putrā janādhipa /
tasmādyodhānhaniṣyāmi prayogeṇāyutaṃ sadā //

evameṣāṃ phariṣyāmi nidhanaṃ kurunandana /
na cette māṃ haniṣyanti pūrvameva samāgame //

senāpatistvahaṃ rājansamayenāpareṇa te /
bhaviṣyāmi yathākāmaṃ tanme śrotumihārhasi //

karṇo vā yudhyatāṃ pūrvamahaṃ vā pṛthivīpate /
spardhate hi sadātyarthaṃ sūtaputro mayā raṇe //
karṇa uvāca /

nāhaṃ jīvati gāṅgeye rājanyotsye kathañcana /
hate bhīṣme tu yotsyāmi saha gāṇḍīvadhanvanā //
vaiśampāyana uvāca /

tataḥ senāpatiṃ cakre vidhivadbhūridakṣiṇam /
dhṛtarāṣṭrātmajo bhīṣmaṃ so'bhiṣikto vyarocata //

tato bherīśca śaṅkhāṃśca śataśo'tha sahasraśaḥ /
vādayāmāsuvyagrā vādakā rājaśāsanāt //

siṃhanādāśca vividhā vāhanānāṃ ca niḥsvanāḥ //

nirghārtāḥ pṛthivīkampā gajabṛṃhitaniḥsvanāḥ /
āsaṃśca sarvayodhānāṃ pātayanto manāṃsyuta //

vācaścāpyaśarīriṇyo divaścolkāḥ prapedire /
śivāśca bhayavedinyo nedurdīptatarā bhṛśam //

saināpatye yadā rājā gāṅgeyamabhiṣiktavān /
tadaitānyugrarūpāṇi babhūvuḥ śataśo nṛpa //

tataḥ senāpatiṃ kṛtvā bhīṣmaṃ parabalārdanam /
vācayitvā dvijaśreṣṭhāngobhirniṣkaiśca bhūriśaḥ //

vardhamāno jayāśīrbhirniryayau sainikairvṛtaḥ /
āpageyaṃ puraskṛtya bhrātṛbhiḥ sahitastadā //

skandhāvāreṇa mahatā kurukṣetraṃ jagāma ha //

parikramya kurukṣetraṃ karṇena saha kauravaḥ /
śibiraṃ māpayāmāsa same deśe janādhipa //

madhurānūṣare deśe prabhūtayavasendhane /
yathaiva hāstinapuraṃ tadvacchibiramābabhau //