Mahabharata · Chapter 5.155

vyuṣṭāyāṃ vai rajanyāṃ hi rājā duryodhanastataḥ /
vyabhajattānyanikāni daśa caikaṃ ca bhārata //

narahastirathāśvānāṃ sāraṃ madhyaṃ ca phalgu ca /
sarveṣveteṣvanīkeṣu sandideśa narādhipaḥ //

sānukarṣāḥ satūṇīrāḥ savarūthāḥ satomarāḥ / sopāsaṅgāḥ saśaktīkāḥ saniṣaṅgāḥ saharṣṭayaḥ /

sadhvajāḥ sapatākāśca saśarāsanatomarāḥ /
rajjubhiśca vicitrābhiḥ sapāśāḥ saparicchadāḥ //

sakacagrahavikṣepāḥ satailaguḍavālukāḥ /
sāśīviṣaghaṭāḥ sarve sasarjarasapāṃsavaḥ //

saghaṇṭaphalakāḥ sarve sāyoguḍajalopalāḥ //
saśālabhindipālāśca samadhūcchiṣṭamudgarāḥ //

sakāṇḍadaṇḍakāḥ sarve sasīraviṣatomarāḥ /
saśūrpapiṭakāḥ sarve sadātrāṅkuśatomarāḥ //

sakīlakavacāḥ sarve vāśīvṛkṣādanānvitāḥ /
vyāghracarmaparīvārā dvīpicarmāvṛtāśca te //

saharṣṭayaḥ saśrṛṅgāśca saprāsavividhāyudhāḥ /
sakuṭhārāḥ sakuddālāḥ satailakṣaumasarpiṣaḥ //

rukmajālapraticchannā nānāmaṇivibhūṣitāḥ /
citrānīkāḥ suvapuṣo jvalitā iva pāvakāḥ //

tathā kavacinaḥ śūrāḥ śastreṣu kṛtaniścayāḥ /
kulīnā hayayonijñāḥ sārathye viniveśitāḥ //

baddhāriṣṭā baddhakakṣā baddhadhvajapatākinaḥ /
baddhābharaṇaniryūhā baddhacarmāsipaṭṭiśāḥ //

caturyujo rathāḥ sarve sarve cottamavājinaḥ /
saprāsaṛṣṭikāḥ sarve sarve śataśarāsanāḥ //

dhuryayorhakayayorekastathānyau parṣṇisārathī /
tau cāpi rathināṃ śreṣṭhau rathī ca hayavittathā //

nagarāṇīva guptāni durādharṣāṇi śatrubhiḥ /
āsanrathasahasrāṇi hemamālīni sarvaśaḥ //

yathā rathāstathā nāgā baddhakakṣāḥ svalaṅkṛtāḥ /
babhūvuḥ saptapuruṣā ratnavanta ivādrayaḥ //

dvāvaṅkuśadharau tatra dvāvuttamadhanurdharau /
dvau varāsidharau rājannekaḥ śaktipinākadhṛt //

gajairmattaiḥ samākīrṇaṃ sarvamāyudhakośakaiḥ /
tadbabhūva balaṃ rājankauravyasya mahātmanaḥ //

āmuktakavacairyuktaiḥ sapatākaiḥ svalaṅkṛtaiḥ /
sādibhiścopapannāstu tathā cāyutaśo hayāḥ //

asaṅgrāhāḥ susampannā hemabhāṇḍaparicchadāḥ /
anekaśatasāhasrāḥ sarve sādivaśe sthitāḥ //

nānārūpavikārāśca nānākavacaśastriṇaḥ /
padātino narāstatra babhūvurhemamālinaḥ //

rathasyāsandaśa gajā gajasya daśa vājinaḥ /
narā daśa hayasyāsanpādarakṣāḥ samantataḥ //

rathasya nāgāḥ pañcāśannāgasyāsañśataṃ hayāḥ /
hayasya puruṣāḥ sapta bhinnasandhānakāriṇaḥ //

senā pañcaśataṃ nāgā rathāstāvanta eva ca /
daśasenā ca pṛtanā pṛtanā daśa vāhinī //

senā ca vāhinī caiva pṛtanā dhvajinī camūḥ /
akṣauhiṇīti paryāyairniruktā ca varūthinī //

evaṃ vyūḍhānyanīkāni kauraveyeṇa dhīmatā /
akṣauhiṇyo daśaikā ca saṅkhyātāḥ sapta caiva ha //

akṣauhiṇyastu saptaiva pāṇḍavānāmabhūdbalam /
akṣauhiṇyo daśaikā ca kauravāṇāmabhūdbalam //

narāṇāṃ pañcapañcāśadeṣā pattirvidhīyate /
senāmukhaṃ ca tisrastā gulma ityabhiśabditam //

trayo gulmā gaṇastvāsīdgaṇāstvayutaśo'bhavan /
duryodhanasya senāsu yotsyamānāḥ prahāriṇaḥ //

tatra duryodhano rājā śūrānbuddhimato narān / prasamīkṣya mahābāhuścakre senāpatīṃstadā /

pṛthagakṣauhiṇīnāṃ ca praṇetṝnnarasattamān /
vidhivatpūrvamānīya pārthivānabhyaṣecayat //

kṛpaṃ droṇaṃ ca śalyaṃ ca saindhavaṃ ca jayadratham /
sudakṣiṇaṃ ca kāmbhojaṃ kṛtavarmāṇameva ca //

droṇaputraṃ ca karṇaṃ ca bhūriśravasameva ca /
śakuniṃ saubalaṃ caiva bāhlīkaṃ ca mahābalam //

divase divase teṣāṃ prativelaṃ ca bhārata /
cakre sa vividhāḥ pūjāḥ pratyakṣaṃ ca punaḥ punaḥ //

tathā viniyatāḥ sarve ye ca teṣāṃ padānugāḥ /
babhūvuḥ sainikā rājñāṃ priyaṃ rājñaścikīrṣavaḥ //