Mahabharata · Chapter 5.154

vāsudevasya tadvākyamanusmṛtya yudhiṣṭhiraḥ /
punaḥ papraccha vārṣṇeyaṃ kathaṃ mando'bravīdidam //

asminnabhyāgate kāle kiñca naḥ kṣamamacyuta /
kathaṃ ca vartamānā vai svadharmānna cyavemahi //

duryodhanasya karṇasya śakuneḥ saubalasya ca /
vāsudeva matajño'si mama sabhrātṛkasya ca //

vidurasyāpi tadvākyaṃ śrutaṃ bhīṣmasya cobhayoḥ /
kuntyāśca vipulaprajña prajñā kārtsnyena te śrutā //

sarvametadatikramya vicārya ca punaḥ punaḥ /
kṣamaṃ yanno mahābāho tadbravīhyavicārayan //

śrutvaitaddharmarājasya dharmārthasahitaṃ vacaḥ /
meghadundubhinirghoṣaḥ kṛṣṇo vākyamathābravīt //

uktavānasmi yadvākyaṃ dharmārthasahitaṃ hitam /
na tu tannikṛtiprajñe kauravye pratitiṣṭhati //

na ca bhīṣmasya durmedhāḥ śṛṇoti vidurasya vā /
mama vā bhāṣitaṃ kiñcitsarvamevātivartate //

naiṣa kāmayate dharmaṃ naiṣa kāmayate yaśaḥ /
jitaṃ sa manyate sarvaṃ durātmā karṇamāśritaḥ //

bandhamājñāpayāmāsa mama cāpi suyodhanaḥ /
na ca taṃ labdhavānkāmaṃ durātmā pāpaniścayaḥ //

na ca bhīṣmo na ca droṇo yuktaṃ tatrāhaturvacaḥ /
sarve tamanuvartante ṛte viduramucyuta //

śakuniḥ saubalaścaiva karṇaduḥśāsanāvapi /
tvayyayuktānyabhāṣanta mūḍhā mūḍhamamarṣaṇam //

kiñca tena mayoktena yānyabhāṣata kauravaḥ /
sankṣepeṇa durātmāsau na yuktaṃ tvayi vartate //

pārthiveṣu na sarveṣu ya ime tava sainikāḥ /
yatpāpaṃ yanna kalyāṇaṃ sarvaṃ tasminpratiṣṭhitam //

na cāpi vayamatyarthaṃ parityāgena karhicit /
kauravaiḥ śamamicchāmastatra yuddhamanantaram //
vaiśampāyana uvāca /

tacchrutvā pārthivāḥ sarve vāsudevasya bhāṣitam /
abruvanto mukhaṃ rājñaḥ samudaikṣanta bhārata //

yudhiṣṭhirastvabhiprāyamabhilakṣya mahīkṣitām /
yogamājñāpayāmāsa bhīmārjunayamaiḥ saha //

tataḥ kilakilābhūtamanīkaṃ pāṇḍavasya ha /
ājñāpite tadā yoge samahṛṣyanta sainikāḥ //

avadhyānāṃ vadhaṃ paśyandharmarājo yudhiṣṭhiraḥ /
niśvasanbhīmasenaṃ ca vijayaṃ cedamabravīt //

yadarthaṃ vanavāsaśca prāptaṃ duḥkhaṃ ca yanmayā /
soyamasmānupaityeva paro'narthaḥ prayatnataḥ //

yasminyatnaḥ kṛto'smābhiḥ sa no hīnaḥ prayatnataḥ /
akṛte tu prayatne'smānupāvṛttaḥ kalirmahān //

kathaṃ hyavadhyaiḥ saṅgrāmaḥ kāryaḥ saha bhaviṣyati /
kathaṃ hatvā gurūnvṛddhānvijayo no bhaviṣyati //
vaiśampāyana uvāca /

tacchrutvā dharmarājasya savyasācī parantapaḥ /
yaduktaṃ vāsudevena śrāvayāmāsa tadvacaḥ //

uktavāndevakīputraḥ kuntyāśca vidurasya ca /
vacanaṃ tattvayā rājannikhilenāvadhāritam //

na ca tau vakṣyato'dharmamiti me naiṣṭhikī matiḥ /
nāpi yuktaṃ ca kaunteya nivartitumayudhyataḥ //

tacchrutvā vāsudevo'pi savyasācivacastadā /
smayamāno'bravīdvākyaṃ pārthamevamiti bruvan //

tataste dhṛtasankalpā yuddhāya saha sainikāḥ /
pāṇḍaveyā mahārāja tāṃ rātriṃ sukhamāvasan //