Mahabharata · Chapter 5.153

yudhiṣṭhiraṃ sahānīkamupāyāntaṃ yuyutsayā /
sanniviṣṭaṃ kurukṣetre vāsudevena pālitam //

virāṭadrupadābhyāṃ ca saputrābhyāṃ samanvitam /
kekayairvṛṣṇibhiścaiva pārthivaiḥ śataśo vṛtam //

mahendramiva cādityairabhiguptaṃ mahārathaiḥ /
śrutvā duryodhano rājā kiṃ kāryaṃ pratyapadyata //

etadicchāmyahaṃ śrotuṃ vistareṇa mahāmate /
sambhrame tumule tasminyadāsītkurujāṅgale //

vyathayeyurime devānsendrānapi samāgame /
pāṇḍavā vāsudevaśca virāṭadrupadau tathā //

dhṛṣṭadyumnaśca pāñcālyaḥ śikhaṇḍī ca mahārathaḥ /
yudhāmanyuśca vikrānto devairapi durāsadaḥ //

etadicchāmyahaṃ śrotuṃ vistareṇa tapodhana /
kurūṇāṃ pāṇḍavānāṃ ca yadyadāsīdviceṣṭitam //
vaiśampāyana uvāca /

pratiyāte tu dāśārhe rājā duryodhanastadā /
karṇaṃ duḥśāsanaṃ caiva śakuniṃ cābravīdidam //

akṛtenaiva kāryeṇa gataḥ pārthānadhokṣajaḥ /
sa enānmanyunāviṣṭo dhruvaṃ dhakṣyatyasaṃśayam //

iṣṭo hi vāsudevasya pāṇḍavairmama vigrahaḥ /
bhīmasenārjunau caiva dāśārhasya mate sthitau //

ajātaśatruratyarthaṃ bhīmasenavaśānugaḥ /
nikṛtaśca mayā pūrvaṃ saha sarvaiḥ sahodaraiḥ //

virāṭadrupadau caiva kṛtavairau mayā saha /
tau ca senāpraṇetārau vāsudevavaśānugau //

bhavitā vigrahaḥ soyaṃ tumulo lomaharṣaṇaḥ /
tasmātsāṅgrāmikaṃ sarvaṃ kārayadhvamatandritāḥ //

śibirāṇi kurukṣetre kriyantāṃ vasudhādhipāḥ /
svaparyāptāvakāśāni durādeyāni śatrubhiḥ //

āsannajalakoṣṭhāni śataśotha sahasraśaḥ . acchedyāhāramārgāṇi bandhocchrayacitāni ca /

vividhāyudhapūrṇāni patākādhvajavanti ca /
samāśca teṣāṃ panthānaḥ kriyantāṃ nagarādbahiḥ //

prayāṇaṃ ghuṣyatāmadya śvobhūta iti māciram /
vaiśampāyana uvāca /
te tatheti pratijñāya śvobhūte cakrire tathā //

hṛṣṭarūpā mahātmāno nivāsāya mahīkṣitām /
tataste pārthivāḥ sarve tacchrutvā rājaśāsanam //

āsanebhyo mahārhebhya udatiṣṭhannamarṣitāḥ /
bāhūnparighasaṅkāśānsaṃspṛśantaḥ śanaiḥ śanaiḥ //

kāñcanāṅgadadīptāṃśca candanāgarubhūṣitān / uṣṇīṣāṇi niyacchantaḥ puṇḍarīkanibhai karaiḥ /
antarīyottarīyāṇi bhūṣaṇāni ca sarvaśaḥ //

te rathānrathinaḥ śreṣṭhā hayāṃśca hayakovidāḥ /
sajjayanti sma nāgāṃśca nāgaśikṣāsvanuṣṭhitāḥ //

atha varmāṇi citrāṇi kāñcanāni bahūni ca /
vividhāni ca śastrāṇi cakruḥ sarvāṇi sarvaśaḥ //

padātayaśca puruṣāḥ śastrāṇi vividhāni ca /
upājahruḥ śarīreṣu hemacitrāṇyanekaśaḥ //

tadutsava ivodagraṃ samprahṛṣṭanarāvṛtam /
nagaraṃ dhārtarāṣṭrasya bhāratāsītsamākulam //

janaughasalilāvarto rathanāgāśvamīnavān /
śaṅkhadundubhinirghoṣaḥ kośasañcayaratnavān //

citrābharaṇavarmormiḥ śastranirmalaphenavān /
prāsādamālādrivṛto rathyāpaṇamahāhradaḥ //

yodhacandrodayodbhūtaḥ kururājamahārṇavaḥ /
vyadṛśyata tadā rājaṃścandrodaya ivodadhiḥ //