Mahabharata · Chapter 5.152

tato deśe same snigdhe prabhūtayavasendhane /
niveśayāmāsa tadā senāṃ rājā yudhiṣṭhiraḥ //

parihṛtya śmaśānāni devatāyatanāni ca /
āśramāṃśca maharṣīṇāṃ tīrthānyāyatanāni ca //

madhurānūṣare deśe śucau puṇye mahāmatiḥ /
niveśaṃ kārayāmāsa kuntīputro yudhiṣṭhiraḥ //

tataśca punarutthāya sukhī viśrāntavāhanaḥ /
prayayau pṛthivīpālairvṛtaḥ śatasahasraśaḥ //

vidrāvya śataśo gulmāndhārtarāṣṭrasya sainikān /
paryakrāmatsamantācca pārthena saha keśavaḥ //

śibiraṃ māpayāmāsa dhṛṣṭadyumnaśca pārṣataḥ /
sātyakiśca rathodāro yuyudhānaśca vīryavān //

āsādya saritaṃ puṇyāṃ kurukṣetre hiraṇvatīm /
sūpatīrthāṃ śucijalāṃ śarkarāpaṅkavarjitām //

khānayāmāsa parikhāṃ keśavastratra bhārata /
guptyarthamapi cādiśya balaṃ tatra nyaveśayat //

vidhiryaḥ śibirasyāsītpāṇḍavānāṃ mahātmanām /
tadvidhāni narendrāṇāṃ kārayāmāsa keśavaḥ //

prabhūtatarakāṣṭhāni durādharṣatarāṇi ca /
bhakṣyabhojyānnapānāni śataśo'tha sahasraśaḥ //

śibirāṇi mahārhāṇi rājñāṃ tatra pṛthakpṛthak /
vimānānīva rājendra niviṣṭāni mahītale //

tatrāsañśilpinaḥ prājñāḥ śataśo dattavetanāḥ /
sarvāpakaraṇairyuktā vaidyāḥ śāstraviśāradāḥ //

jyādhanurvarmaśastrāṇāṃ tathaiva madhusarpiṣoḥ /
sasarjarakasapāṃsūnāṃ rāśayaḥ parvatopamāḥ //

bahūdakaṃ suyavasaṃ tuṣāṅgārasamanvitam /
śibire śibire rājā sañcakāra yudhiṣṭhiraḥ //

mahāyantrāṇi nārācāstomarāṇi paraśvadhāḥ /
dhanūṃṣi kavacādīni ṛṣṭayastūṇasaṃyutāḥ //

gajāḥ kaṇṭakasannāhā lohavarmottaracchadāḥ /
dṛśyante tatra giryābhāḥ sahasraśatayodhinaḥ //

niviṣṭānpāṇḍavāṃstatra jñātvā mitrāṇi bhārata /
abhisasruryathādeśaṃ sabalāḥ sahavāhanāḥ //

caritabrahmacaryāste somapā bhūridakṣiṇāḥ /
jayāya pāṇḍuputrāṇāṃ samājagmurmahīkṣitaḥ //