મહાભારત · અધ્યાય 5.153

યુધિષ્ઠિરં સહાનીકમુપાયાન્તં યુયુત્સયા ।
સન્નિવિષ્ટં કુરુક્ષેત્રે વાસુદેવેન પાલિતમ્ ॥

વિરાટદ્રુપદાભ્યાં ચ સપુત્રાભ્યાં સમન્વિતમ્ ।
કેકયૈર્વૃષ્ણિભિશ્ચૈવ પાર્થિવૈઃ શતશો વૃતમ્ ॥

મહેન્દ્રમિવ ચાદિત્યૈરભિગુપ્તં મહારથૈઃ ।
શ્રુત્વા દુર્યોધનો રાજા કિં કાર્યં પ્રત્યપદ્યત ॥

એતદિચ્છામ્યહં શ્રોતું વિસ્તરેણ મહામતે ।
સમ્ભ્રમે તુમુલે તસ્મિન્યદાસીત્કુરુજાઙ્ગલે ॥

વ્યથયેયુરિમે દેવાન્સેન્દ્રાનપિ સમાગમે ।
પાણ્ડવા વાસુદેવશ્ચ વિરાટદ્રુપદૌ તથા ॥

ધૃષ્ટદ્યુમ્નશ્ચ પાઞ્ચાલ્યઃ શિખણ્ડી ચ મહારથઃ ।
યુધામન્યુશ્ચ વિક્રાન્તો દેવૈરપિ દુરાસદઃ ॥

એતદિચ્છામ્યહં શ્રોતું વિસ્તરેણ તપોધન ।
કુરૂણાં પાણ્ડવાનાં ચ યદ્યદાસીદ્વિચેષ્ટિતમ્ ॥
વૈશમ્પાયન ઉવાચ ।

પ્રતિયાતે તુ દાશાર્હે રાજા દુર્યોધનસ્તદા ।
કર્ણં દુઃશાસનં ચૈવ શકુનિં ચાબ્રવીદિદમ્ ॥

અકૃતેનૈવ કાર્યેણ ગતઃ પાર્થાનધોક્ષજઃ ।
સ એનાન્મન્યુનાવિષ્ટો ધ્રુવં ધક્ષ્યત્યસંશયમ્ ॥

ઇષ્ટો હિ વાસુદેવસ્ય પાણ્ડવૈર્મમ વિગ્રહઃ ।
ભીમસેનાર્જુનૌ ચૈવ દાશાર્હસ્ય મતે સ્થિતૌ ॥

અજાતશત્રુરત્યર્થં ભીમસેનવશાનુગઃ ।
નિકૃતશ્ચ મયા પૂર્વં સહ સર્વૈઃ સહોદરૈઃ ॥

વિરાટદ્રુપદૌ ચૈવ કૃતવૈરૌ મયા સહ ।
તૌ ચ સેનાપ્રણેતારૌ વાસુદેવવશાનુગૌ ॥

ભવિતા વિગ્રહઃ સોયં તુમુલો લોમહર્ષણઃ ।
તસ્માત્સાઙ્ગ્રામિકં સર્વં કારયધ્વમતન્દ્રિતાઃ ॥

શિબિરાણિ કુરુક્ષેત્રે ક્રિયન્તાં વસુધાધિપાઃ ।
સ્વપર્યાપ્તાવકાશાનિ દુરાદેયાનિ શત્રુભિઃ ॥

આસન્નજલકોષ્ઠાનિ શતશોથ સહસ્રશઃ . અચ્છેદ્યાહારમાર્ગાણિ બન્ધોચ્છ્રયચિતાનિ ચ ।

વિવિધાયુધપૂર્ણાનિ પતાકાધ્વજવન્તિ ચ ।
સમાશ્ચ તેષાં પન્થાનઃ ક્રિયન્તાં નગરાદ્બહિઃ ॥

પ્રયાણં ઘુષ્યતામદ્ય શ્વોભૂત ઇતિ માચિરમ્ ।
વૈશમ્પાયન ઉવાચ ।
તે તથેતિ પ્રતિજ્ઞાય શ્વોભૂતે ચક્રિરે તથા ॥

હૃષ્ટરૂપા મહાત્માનો નિવાસાય મહીક્ષિતામ્ ।
તતસ્તે પાર્થિવાઃ સર્વે તચ્છ્રુત્વા રાજશાસનમ્ ॥

આસનેભ્યો મહાર્હેભ્ય ઉદતિષ્ઠન્નમર્ષિતાઃ ।
બાહૂન્પરિઘસઙ્કાશાન્સંસ્પૃશન્તઃ શનૈઃ શનૈઃ ॥

કાઞ્ચનાઙ્ગદદીપ્તાંશ્ચ ચન્દનાગરુભૂષિતાન્ । ઉષ્ણીષાણિ નિયચ્છન્તઃ પુણ્ડરીકનિભૈ કરૈઃ ।
અન્તરીયોત્તરીયાણિ ભૂષણાનિ ચ સર્વશઃ ॥

તે રથાન્રથિનઃ શ્રેષ્ઠા હયાંશ્ચ હયકોવિદાઃ ।
સજ્જયન્તિ સ્મ નાગાંશ્ચ નાગશિક્ષાસ્વનુષ્ઠિતાઃ ॥

અથ વર્માણિ ચિત્રાણિ કાઞ્ચનાનિ બહૂનિ ચ ।
વિવિધાનિ ચ શસ્ત્રાણિ ચક્રુઃ સર્વાણિ સર્વશઃ ॥

પદાતયશ્ચ પુરુષાઃ શસ્ત્રાણિ વિવિધાનિ ચ ।
ઉપાજહ્રુઃ શરીરેષુ હેમચિત્રાણ્યનેકશઃ ॥

તદુત્સવ ઇવોદગ્રં સમ્પ્રહૃષ્ટનરાવૃતમ્ ।
નગરં ધાર્તરાષ્ટ્રસ્ય ભારતાસીત્સમાકુલમ્ ॥

જનૌઘસલિલાવર્તો રથનાગાશ્વમીનવાન્ ।
શઙ્ખદુન્દુભિનિર્ઘોષઃ કોશસઞ્ચયરત્નવાન્ ॥

ચિત્રાભરણવર્મોર્મિઃ શસ્ત્રનિર્મલફેનવાન્ ।
પ્રાસાદમાલાદ્રિવૃતો રથ્યાપણમહાહ્રદઃ ॥

યોધચન્દ્રોદયોદ્ભૂતઃ કુરુરાજમહાર્ણવઃ ।
વ્યદૃશ્યત તદા રાજંશ્ચન્દ્રોદય ઇવોદધિઃ ॥