Mahabharata · Chapter 5.150

evamukte tu bhīṣmeṇa droṇena vidureṇa ca /
gāndhāryā dhṛtarāṣṭreṇa na vai mando'nvabuddhyata //

avadhūyotthito mandaḥ krodhasaṃraktalocanaḥ /
anvadravanta taṃ paścādrājānastyaktajīvitāḥ //

ājñāpayacca rājñastānpārthivānnaṣṭacetasaḥ /
prayāta vai kurukṣetraṃ puṣyo'dyeti punaḥ punaḥ //

tataste pṛthivīpālāḥ prayayuḥ sahasainikāḥ /
bhīṣmaṃ senāpatiṃ kṛtvā saṃhṛṣṭāḥ kālacoditāḥ //

akṣauhiṇyo daśaikā ca kauravāṇāṃ samāgatāḥ /
tāsāṃ pramukhato bhīṣmastālaketurvyarocata //

yadatra yuktaṃ prāptaṃ ca tadvidhatsva viśāmpate /
uktaṃ bhīṣmeṇa yadvākyaṃ droṇena vidureṇa ca //

gāndhāryā dhṛtarāṣṭreṇa samakṣaṃ mama bhārata /
etatte kathitaṃ rājanyadvṛttaṃ kurusaṃsadi //

sāma cādau prayuktaṃ me rājansaubhrātramicchatā /
abhedāyāsya vaṃśasya prajānāṃ ca vivṛddhaye //

punarbhedaśca me yukto yadā sāma na gṛhyate /
karmānukīrtanaṃ caiva devamānupasaṃhitam //

yadā nādriyate vākyaṃ sāmapūrvaṃ suyodhanaḥ /
tadā mayā samānīya bheditāḥ sarvapārthivāḥ //

adbhutāni ca ghorāṇi dāruṇāni ca bhārata /
amānuṣāṇi karmāṇi darśitāni mayā vibho //

nirbhartsayitvā rājñastāṃstṛṇīkṛtya suyodhanam /
rādheyaṃ bhīṣayitvā ca saubalaṃ ca punaḥ punaḥ //

dyūtato dhārtarāṣṭrāṇāṃ nindāṃ kṛtvā tathā punaḥ /
bhedayitvā nṛpāsnarvānvāgbhirmantrema cāsakṛt //

punaḥ sāmābhisaṃyuktaṃ sampradānamathābruvam /
abhedātkuruvaṃśasya kāryayogāttathaiva ca //

te śūrā dhṛtarāṣṭrasya bhīṣmasya vidurasya ca /
tiṣṭheyuḥ pāṇḍavāḥ sarve hitvā mānamadhaścarāḥ //

prayacchantu ca te rājyamanīśāste bhavantu ca /
yathāha rājā gāṅgeyo viduraśca hitaṃ tava //

sarvaṃ bhavatu te rājyaṃ pañca grāmānvisarjaya /
avaśyaṃ bharaṇīyā hi pituste rājasattama //

evamukto'pi duṣṭātmā naiva bhāgaṃ vyamuñcata /
daṇḍaṃ caturthaṃ paśyāmi teṣu pāpeṣu nānyathā //

niryātāśca vināśāya kurukṣetraṃ narādhipāḥ /
etatte kathitaṃ rājanyadvṛttaṃ kurusaṃsadi //

na te rājyaṃ prayacchanti vinā yuddhena pāṇḍava /
vināśahetavaḥ sarve pratyupasthitamṛtyavaḥ //