મહાભારત · અધ્યાય 5.150

એવમુક્તે તુ ભીષ્મેણ દ્રોણેન વિદુરેણ ચ ।
ગાન્ધાર્યા ધૃતરાષ્ટ્રેણ ન વૈ મન્દોઽન્વબુદ્ધ્યત ॥

અવધૂયોત્થિતો મન્દઃ ક્રોધસંરક્તલોચનઃ ।
અન્વદ્રવન્ત તં પશ્ચાદ્રાજાનસ્ત્યક્તજીવિતાઃ ॥

આજ્ઞાપયચ્ચ રાજ્ઞસ્તાન્પાર્થિવાન્નષ્ટચેતસઃ ।
પ્રયાત વૈ કુરુક્ષેત્રં પુષ્યોઽદ્યેતિ પુનઃ પુનઃ ॥

તતસ્તે પૃથિવીપાલાઃ પ્રયયુઃ સહસૈનિકાઃ ।
ભીષ્મં સેનાપતિં કૃત્વા સંહૃષ્ટાઃ કાલચોદિતાઃ ॥

અક્ષૌહિણ્યો દશૈકા ચ કૌરવાણાં સમાગતાઃ ।
તાસાં પ્રમુખતો ભીષ્મસ્તાલકેતુર્વ્યરોચત ॥

યદત્ર યુક્તં પ્રાપ્તં ચ તદ્વિધત્સ્વ વિશામ્પતે ।
ઉક્તં ભીષ્મેણ યદ્વાક્યં દ્રોણેન વિદુરેણ ચ ॥

ગાન્ધાર્યા ધૃતરાષ્ટ્રેણ સમક્ષં મમ ભારત ।
એતત્તે કથિતં રાજન્યદ્વૃત્તં કુરુસંસદિ ॥

સામ ચાદૌ પ્રયુક્તં મે રાજન્સૌભ્રાત્રમિચ્છતા ।
અભેદાયાસ્ય વંશસ્ય પ્રજાનાં ચ વિવૃદ્ધયે ॥

પુનર્ભેદશ્ચ મે યુક્તો યદા સામ ન ગૃહ્યતે ।
કર્માનુકીર્તનં ચૈવ દેવમાનુપસંહિતમ્ ॥

યદા નાદ્રિયતે વાક્યં સામપૂર્વં સુયોધનઃ ।
તદા મયા સમાનીય ભેદિતાઃ સર્વપાર્થિવાઃ ॥

અદ્ભુતાનિ ચ ઘોરાણિ દારુણાનિ ચ ભારત ।
અમાનુષાણિ કર્માણિ દર્શિતાનિ મયા વિભો ॥

નિર્ભર્ત્સયિત્વા રાજ્ઞસ્તાંસ્તૃણીકૃત્ય સુયોધનમ્ ।
રાધેયં ભીષયિત્વા ચ સૌબલં ચ પુનઃ પુનઃ ॥

દ્યૂતતો ધાર્તરાષ્ટ્રાણાં નિન્દાં કૃત્વા તથા પુનઃ ।
ભેદયિત્વા નૃપાસ્નર્વાન્વાગ્ભિર્મન્ત્રેમ ચાસકૃત્ ॥

પુનઃ સામાભિસંયુક્તં સમ્પ્રદાનમથાબ્રુવમ્ ।
અભેદાત્કુરુવંશસ્ય કાર્યયોગાત્તથૈવ ચ ॥

તે શૂરા ધૃતરાષ્ટ્રસ્ય ભીષ્મસ્ય વિદુરસ્ય ચ ।
તિષ્ઠેયુઃ પાણ્ડવાઃ સર્વે હિત્વા માનમધશ્ચરાઃ ॥

પ્રયચ્છન્તુ ચ તે રાજ્યમનીશાસ્તે ભવન્તુ ચ ।
યથાહ રાજા ગાઙ્ગેયો વિદુરશ્ચ હિતં તવ ॥

સર્વં ભવતુ તે રાજ્યં પઞ્ચ ગ્રામાન્વિસર્જય ।
અવશ્યં ભરણીયા હિ પિતુસ્તે રાજસત્તમ ॥

એવમુક્તોઽપિ દુષ્ટાત્મા નૈવ ભાગં વ્યમુઞ્ચત ।
દણ્ડં ચતુર્થં પશ્યામિ તેષુ પાપેષુ નાન્યથા ॥

નિર્યાતાશ્ચ વિનાશાય કુરુક્ષેત્રં નરાધિપાઃ ।
એતત્તે કથિતં રાજન્યદ્વૃત્તં કુરુસંસદિ ॥

ન તે રાજ્યં પ્રયચ્છન્તિ વિના યુદ્ધેન પાણ્ડવ ।
વિનાશહેતવઃ સર્વે પ્રત્યુપસ્થિતમૃત્યવઃ ॥