Mahabharata · Chapter 5.15

evamuktaḥ sa bhagavāñśacyā tāṃ punarabravīt /
vikramasya na kālo'yaṃ nahuṣo balavattaraḥ //

vivarddhitaśca ṛṣibhirhavyakavyaiśca bhāmini /
nītimatra vidhāsyāmi devi tāṃ kartumarhasi //

guhyaṃ caitattvayā kāryaṃ nākhyātavyaṃ śubhe kvacit /
gatvā nahuṣamekānte bravīhi ca sumadhyame //

ṛṣiyānena divyena māmupaihi jagatpate /
evaṃ tava vaśe prītā bhaviṣyāmīti taṃ vada //

ityuktā devarājena patnī sā kamalekṣaṇā /
evamastvityathoktvā tu jagāma nahuṣaṃ prati //

nahuṣastāṃ tato dṛṣṭvā sasmito vākyamabravīt /
svāgataṃ te varārohe kiṃ karomi śucismite //

bhaktaṃ māṃ bhaja kalyāṇi kimicchasi manasvini /
tava kalyāṇi yatkāryaṃ tatkariṣye sumadhyame //

na ca vrīḍā tvayā kāryā suśroṇi mayi viśvaseḥ /
satyena vai paśe devi kariṣye vacanaṃ tava //
indrāṇyuvāca /

yo me kṛtastvayā kālastamākāṅkṣe jagatpate /
tatastvameva bhartā me bhaviṣyasi surādhima //

kāryaṃ ca hṛdi me yattaddevarājāvadhāraya /
vakṣyāmi yadi me rājanpriyametatkariṣyasi //

vākyaṃ praṇayasaṃyuktaṃ tataḥ syāṃ vaśagā tava /
indrasya vājino vāhā hastino'tha rathāstathā //

icchāmyahamathāpūrvaṃ vāhanaṃ te surādhipa /
yanna viṣṇorna rudrasya na surāṇāṃ na rakṣasām //

vahantu tvāṃ mahābhāgā ṛṣayaḥ saṅgatā vibho /
sarve śibikayā rājannetaddhi mama rocate //

nāsureṣu na deveṣu tulyo bhavitumarhasi /
sarveṣāṃ teja ādatse svena vīryeṇa darśanāt //

na te pramukhataḥ sthātuṃ kaścicchaknoti vīryavān /
śalya uvāca /
evamuktastu nahuṣaḥ prāhṛṣyata tadā kila /
uvāca vacanaṃ cāpi surendrastāmaninditām //
nahuṣa uvāca /

apūrvaṃ vāhanamidaṃ tvayoktaṃ varavarṇini /
dṛḍhaṃ me ruciraṃ devi tvadvaśo'smi varānane //

na hyalpavīryo bhavati yo vāhānkurute munīn /
ahaṃ tapasvī balavānbhūtabhavyabhavatprabhuḥ //

mayi kruddhe jaganna syānmayi sarvaṃ pratiṣṭhitam /
devadānavagandharvāḥ kinnaroragarākṣasāḥ //

na me kruddhasya paryāptāḥ sarve lokāḥ śucismite /
cakṣuṣā yaṃ prapaśyāmi tasya tejo harāmyaham //

ahamindro'smi devānāṃ lokānāṃ ca maheśvaraḥ / mayi havyaṃ ca kavyaṃ ca lokāścaiva sanātanāḥ /
tasmātte vacanaṃ devi kariṣyāmi na saṃśayaḥ //

saptarṣayo māṃ vakṣyanti sarve brahmarṣayastathā /
paśya māhātmyayogaṃ me ṛddhiṃ ca varavarṇini //
śalya uvāca /

evamuktvā tu tāṃ devīṃ visṛjya ca varānanām . 5-15-22b atha sañcintya nahuṣo balavīryeṇa bhārata //

visṛjya supratīkaṃ ca nāgamairāvataṃ tathā /
haṃsayuktaṃ vimānaṃ ca hariyuktaṃ tathā ratham //

sa tu darpeṇa mahatā paribhūya mahāmunīn / vimāne yojayitvā ca ṛṣīnniyamāmāsthitān //

abrahmaṇyo balopeto matto madabalena ca /
kāmavṛttaḥ sa duṣṭātmā vāhayāmāsa tānṛṣīn //

nahuṣeṇa visṛṣṭā ca bṛhaspatimathābravīt /
samayo'lpāvaśeṣo me nahuṣeṇeha yaḥ kṛtaḥ //

śakraṃ mṛgaya śīghraṃ tvaṃ bhaktāyāḥ kuru me dayām /
bāḍhamityeva bhagavānbṛhaspatiruvāca tām //

na bhetavyaṃ tvayā devi nahuṣādduṣṭacetasaḥ /
na hyeṣa sthāsyati ciraṃ gata eṣa narādhamaḥ //

adharmajño maharṣīṇāṃ vāhanācca hataḥ śubhe /
iṣṭiṃ cāhaṃ kariṣyāmi vināśāyāsya durmateḥ //

śakraṃ cādhigamiṣyāmi mābhaistvaṃ bhadramastu te /
tataḥ prajvālya vidhivajjuhāva paramaṃ haviḥ //

bṛhaspatirmahātejā devarājopalabdhaye /
hutvā'gniṃ sobravīdrājañchakra anviṣyatāmiti //

tasmācca bhagavāndevaḥ svayameva hutāśanaḥ /
strīveṣamadbhutaṃ kṛtvā tatraivāntaradhīyata //

sa diśaḥ pradiśaścaiva parvatāṃśca vanāni ca / pṛthivīṃ cāntarikṣaṃ ca vicityātha manogatiḥ /
nimeṣāntaramātreṇa bṛhaspatimupāgamat //
agniruvāca /

bṛhaspate na paśyāmi devarājamiha kvacit /
āpaḥ śeṣāḥ sadā cāpaḥ praveṣṭuṃ notsahāmyaham //

na me tatra gatirbrahmankimanyatkaravāṇi te /
tamabravīddevagururapo viśa mahādyute //
agniruvāca /

nāpaḥ praveṣṭuṃ śakṣyāmi kṣayo me'tra bhaviṣyati /
śaraṇaṃ tvāṃ prapanno'smi svasti testu mahādyute //

adybho'gnirbrahmataḥ kṣatramaśmano lohamutthitam /
teṣāṃ sarvatragaṃ tejaḥ svāsu yoniṣu śāmyati //