Mahabharata · Chapter 5.146

tataḥ sūryānniścaritāṃ karṇaḥ śuśrāva bhāratīm /
duratyayāṃ praṇayinīṃ pitṛvadbhāskareritām //
sūrya uvāca /

satyamāha pṛthā vākyaṃ karṇa mātṛvacaḥ kuru /
śreyaste syānnaravyāghra sarvamācaratastathā //
vaiśampāyana uvāca /

evamuktasya mātrā ca svayaṃ pitrā ca bhānunā /
cacāla naiva karṇasya matiḥ satyadhṛtestadā //
karṇa uvāca /

na caitacchraddadhe vākyaṃ kṣatriye bhāṣitaṃ tvayā /
dharmadvāraṃ mamaitatsyānniyogakaraṇaṃ tava //

akaronmayi yatpāpaṃ bhavatī sumahātyayam /
apākīrṇo'smi yanmātastadyaśaḥkīrtināśanam //

ahaṃ cetkṣatriyo jāto na prāptaḥ kṣatrasatkriyām /
tvatkṛte kiṃ nu pāpīyaḥ śatruḥ kuryānmamāhitam //

kriyākāle tvanukrośamakṛtvā tvamimaṃ mama /
hīnasaṃskrāsamayamadya māṃ samacūcudaḥ //

na vai mama hitaṃ pūrvaṃ mātṛvacceṣṭitaṃ tvayā /
sā māṃ sambodhayasyadya kevalātmahitaiṣiṇī //

kṛṣṇena sahitātko vai na vyatheta dhanañjayāt /
kodya bhītaṃ na māṃ vidyātparthānāṃ samitiṃ gatam //

abhrātā viditaḥ pūrvaṃ yuddhakāle prakāśitaḥ /
pāṇḍavānyadi gacchāmi kiṃ māṃ kṣatraṃ vadiṣyati //

sarvakāmaiḥ saṃvibhaktaḥ pūjitaśca yathāsukham /
ahaṃ vai dhārtarāṣṭrāṇāṃ kuryāṃ tadaphalaṃ katham //

upanahya parairvairaṃ ye māṃ nityamupāsate /
namaskurvanti ca sadā vasavo vāsavaṃ yathā //

mama prāṇena ye śatrūñśaktāḥ pratisamāsitum /
manyante te kathaṃ teṣāmahaṃ chindyāṃ manoratham //

mayā plavena sangrāmaṃ titīrṣanti duratyayam /
apāre pārakāmā ye tyajeyaṃ tānahaṃ katham //

ayaṃ hi kālaḥ samprāpto dhārtarāṣṭropajīvinām /
nirveṣṭavyaṃ mayā tatra prāṇānaparirakṣatā //

kṛtārthāḥ subhṛtā ye hi kṛtyakāle hyupasthite /
anavekṣya kṛtaṃ pāpā vikurvantyanavasthitāḥ //

rājakilbiṣiṇāṃ teṣāṃ bhartṛpiṇḍāpahāriṇām / naivāyaṃ na paro loko vidyate pāpakarmaṇām /

dhṛtarāṣṭrasya putrāṇāmarthe yotsyāmi te sutaiḥ /
balaṃ ca śaktiṃ cāsthāya na vai tvayyanṛtaṃ vade //

ānṛśaṃsyamatho vṛttaṃ rakṣansatpuruṣocitam /
ato'rthakaramapyetanna karomyadya te vacaḥ //

na ca te'yaṃ samārambho mayi mogho bhaviṣyati /
vadhyānviṣahyānsangrāme na haniṣyāmi te sutān //

yudhiṣṭhiraṃ ca bhīmaṃ ca yamau caivārjunādṛte /
arjunena samaṃ yuddhamapi yaudhiṣṭhire bale //

arjunaṃ hi nihatyājau samprāptaṃ syātphalaṃ mayā /
yaśasā cāpi yujyeyaṃ nihataḥ savyasācinā //

na te jātu naśiṣyanti putrāḥ pañca yaśasvini /
nirarjunāḥ sakarṇā vā sārjunā vā hate mayi //

iti karṇavacaḥ śrutvā kuntī duḥkhātpraveṣatī /
uvāca putramāśliṣya karṇaṃ dhairyādakampanam //

evaṃ vai bhāvyametena kṣayaṃ yāsyanti kauravāḥ /
yathā tvaṃ bhāṣase karṇa daivaṃ tu balavattaram //

tvayā caturṇāṃ bhrātṝṇāmabhayaṃ śatrukarśana /
dattaṃ tatpratijānīhi saṅgarapratimocanam //

anāmayaṃ svasti ceti pṛthātho karṇamabravīt /
tāṃ karṇo'bhyavadatprītastatastau jagmatuḥ pṛthak //