Mahabharata · Chapter 5.145

rādheyo'hamādhirathiḥ karṇastvāmabhivādaye /
prāptā kimarthaṃ bhavatī brūhi kiṃ karavāmi te //
kuntyuvāca /

kaunteyastvaṃ na rādheyo na tavādhirathaḥ pitā /
nāsi sūtakule jātaḥ karṇa tadviddhi me vacaḥ //

kānīnastvaṃ mayā jātaḥ pūrvajaḥ kukṣiṇā dhṛtaḥ /
kuntirājasya bhavane pārthastvamasi putraka //

prakāśakarmā tapano yo'yaṃ devo virocanaḥ /
ajījanattvāṃ mayyeṣa karṇa śastrabhṛtāṃ varam //

kuṇḍalī baddhakavaco devagarbhaḥ śriyā vṛtaḥ /
jātastvamasi durdharṣa mayā putra piturgṛhe //

sa tvaṃ bhrātṝnasambuddhya mohadyadupasevase /
dhārtarāṣṭrānna tadyuktaṃ tvayi putra viśeṣataḥ //

etaddharmaphalaṃ putra narāṇāṃ dharmaniścaye /
yattuṣyantyasya pitaro mātā cāpyekadarśinī //

arjunenārjitāṃ pūrvaṃ hṛtāṃ lobhādasādhubhiḥ /
ācchidya dhārtarāṣṭrebhyo bhuṅkṣa yaudhiṣṭhirīṃ śriyam //

adya paśyantu kuravaḥ karṇārjunasamāgamam . saubhrātreṇa samālakṣya sannamantāmasādhavaḥ /

karṇārjunau vai bhavatāṃ yathā rāmajanārdanau /
asādhyaṃ kiṃ nu loke syādyuvayoḥ saṃhitātmanoḥ //

karṇa śobhiṣyase nūnaṃ pañcamirbhrātṛbhirvṛtaḥ /
devaiḥ parivṛto brahmā vedyāmiva mahādhvare //

upapadyo guṇaiḥ sarvairjyeṣṭhaḥ śreṣṭheṣu bandhuṣu /
sūtaputreti mā śabdaḥ pārthastvamasi vīryavān //