મહાભારત · અધ્યાય 5.145

રાધેયોઽહમાધિરથિઃ કર્ણસ્ત્વામભિવાદયે ।
પ્રાપ્તા કિમર્થં ભવતી બ્રૂહિ કિં કરવામિ તે ॥
કુન્ત્યુવાચ ।

કૌન્તેયસ્ત્વં ન રાધેયો ન તવાધિરથઃ પિતા ।
નાસિ સૂતકુલે જાતઃ કર્ણ તદ્વિદ્ધિ મે વચઃ ॥

કાનીનસ્ત્વં મયા જાતઃ પૂર્વજઃ કુક્ષિણા ધૃતઃ ।
કુન્તિરાજસ્ય ભવને પાર્થસ્ત્વમસિ પુત્રક ॥

પ્રકાશકર્મા તપનો યોઽયં દેવો વિરોચનઃ ।
અજીજનત્ત્વાં મય્યેષ કર્ણ શસ્ત્રભૃતાં વરમ્ ॥

કુણ્ડલી બદ્ધકવચો દેવગર્ભઃ શ્રિયા વૃતઃ ।
જાતસ્ત્વમસિ દુર્ધર્ષ મયા પુત્ર પિતુર્ગૃહે ॥

સ ત્વં ભ્રાતૄનસમ્બુદ્ધ્ય મોહદ્યદુપસેવસે ।
ધાર્તરાષ્ટ્રાન્ન તદ્યુક્તં ત્વયિ પુત્ર વિશેષતઃ ॥

એતદ્ધર્મફલં પુત્ર નરાણાં ધર્મનિશ્ચયે ।
યત્તુષ્યન્ત્યસ્ય પિતરો માતા ચાપ્યેકદર્શિની ॥

અર્જુનેનાર્જિતાં પૂર્વં હૃતાં લોભાદસાધુભિઃ ।
આચ્છિદ્ય ધાર્તરાષ્ટ્રેભ્યો ભુઙ્ક્ષ યૌધિષ્ઠિરીં શ્રિયમ્ ॥

અદ્ય પશ્યન્તુ કુરવઃ કર્ણાર્જુનસમાગમમ્ . સૌભ્રાત્રેણ સમાલક્ષ્ય સન્નમન્તામસાધવઃ ।

કર્ણાર્જુનૌ વૈ ભવતાં યથા રામજનાર્દનૌ ।
અસાધ્યં કિં નુ લોકે સ્યાદ્યુવયોઃ સંહિતાત્મનોઃ ॥

કર્ણ શોભિષ્યસે નૂનં પઞ્ચમિર્ભ્રાતૃભિર્વૃતઃ ।
દેવૈઃ પરિવૃતો બ્રહ્મા વેદ્યામિવ મહાધ્વરે ॥

ઉપપદ્યો ગુણૈઃ સર્વૈર્જ્યેષ્ઠઃ શ્રેષ્ઠેષુ બન્ધુષુ ।
સૂતપુત્રેતિ મા શબ્દઃ પાર્થસ્ત્વમસિ વીર્યવાન્ ॥