Mahabharata · Chapter 5.141

asaṃśayaṃ sauhṛdānme praṇayāccātha keśava /
sakhyena caiva vārṣṇeya śreyaskāmatayaiva ca //

sarvaṃ caivābhijānāmi pāṇḍoḥ putro'smi dharmataḥ /
niścayāddharmaśāstrāṇāṃ yathā tvaṃ kṛṣṇa manyase //

kanyā garbhaṃ samādhatta bhāskarānmāṃ janārdana /
ādityavacanāccaiva jātaṃ māṃ sā vyasarjayat //

sosmi kṛṣṇa tathājātaḥ pāṇḍoḥ putrosmi dharmataḥ /
kuntyā tvahamapākīrṇo yathā na kuśalaṃ tathā //

sūto hi māmadhiratho dṛṣṭvaivābhyānayadgṛhān /
rādhāyāścaiva māṃ prādātsauhārdānmadhusūdana //

matsnehāccaiva rādhāyāṃ sadyaḥ kṣīramavātarat /
sā me mūtraṃ purīṣaṃ ca pratijagrāha mādhava //

tasyāḥ piṇḍavyapanayaṃ kuryādasmadvidhaḥ katham /
dharmaviddharmaśāstrāṇāṃ śravaṇe satataṃ rataḥ //

tathā māmabhijānāti sūtaścādhirathaḥ sutam /
pitaraṃ cābhijānāmi tamahaṃ sauhṛdātsadā //

sa hi me jātakarmādi kārayāmāsa mādhava /
śāstradṛṣṭena vidhinā putraprītyā janārdana //

nāma vai vasuṣeṇeti kārayāmāsa vai dvijaiḥ /
bhāryāścoḍhā mama prāpte yauvane tatparigrahāt //

tāsu putrāśca pautrāśca mama jātā janārdana /
tāsu me hṛdayaṃ kṛṣṇa sañjātaṃ kāmabandhanam //

na pṛthivyā sakalayā na suvarṇasya rāśibhiḥ /
harṣādbhayādvā govinda mithyā kartuṃ tadutsahe //

dhṛtarāṣṭrakule kṛṣṇa duryodhanasamāśrayāt /
mayā trayodaśasamā bhuktaṃ rājyamakaṇṭakam //

iṣṭaṃ ca bahubhiryajñaiḥ sahasūtairmayā'sakṛt /
āvāhāśca vivāhāśca sahasūtairmayā kṛtāḥ //

māṃ ca kṛṣṇa samāsādya kṛtaḥ śastrasamudyamaḥ /
duryodhanena vārṣṇeya vigrahaścāpi pāṇḍavaiḥ //

tasmādraṇe dvairathe māṃ pratyudyātāramacyuta /
vṛtavānparamaṃ kṛṣṇa pratīpaṃ savyasācinaḥ //

vadhādbandhādbhayādvāpi lobhādvāpi janārdana /
anṛtaṃ notsahe kartuṃ dhārtarāṣṭrasya dhīmataḥ //

yadi hyadya na gaccheyaṃ dvairathaṃ savyasācinā /
akīrtiḥ syāddhṛpīkeśa mama pārthasya cobhayoḥ //

asaṃśayaṃ hitārthāya brūyāstvaṃ madhusūdana /
sarvaṃ ca pāṇḍavāḥ kuryustvadvaśitvānna saṃśayaḥ //

mantrasya niyamaṃ kuryāstvamatra madhusūdana /
etadatra hitaṃ manye sarvaṃ yādavanandana //

yadi jānāti māṃ rājā dharmātmā saṃyatendriyaḥ /
kuntyāḥ prathamajaṃ putraṃ na sa rājyaṃ grahīṣyati //

prāpya cāpi mahadrājyaṃ tadahaṃ madhusūdana /
sphītaṃ duryodhanāyaiva sampradadyāmarindama //

sa eva rājā dharmātmā śāśvato'stu yudhiṣṭhiraḥ /
netā yasya hṛṣīkeso yoddhā yasya dhanañjayaḥ //

pṛthivī tasya rāṣṭraṃ ca yasya bhīmo mahārathaḥ /
nakulaḥ sahadevaśca draupadeyāśca mādhava //

dhṛṣṭadyunmaśca pāñcalyaḥ sātyakiśca mahārathaḥ /
uttamaujā yudhāmanyuḥ satyadharmā ca saumakiḥ //

caidyaśca cekitānaśca śikhaṇḍī cāparājitaḥ . indragopakavarṇāśca kekayā bhrātarastathā /
indrāyudhasavarṇaśca kuntibhojo mahāmanāḥ //

mātulo bhīmasenasya śyenajicca mahārathaḥ /
śaṅkhaḥ putro virāṭasya nidhistvaṃ ca janārdana //

mahānayaṃ kṛṣṇa kṛtaḥ kṣatrasya samudānayaḥ /
rājyaṃ prāptamidaṃ dīptaṃ prathitaṃ sarvarājasu //

dhārtarāṣṭrasya vārṣṇeya śastrayajño bhaviṣyati /
asya yajñasya vettā tvaṃ bhaviṣyasi janārdana //

ādhvaryavaṃ ca te kṛṣṇa ṛtāvasminbhaviṣyati /
hotā caivātra bībhatsuḥ sannaddhaḥ sa kapidhvajaḥ //

gāṇḍīvaṃ sruk tathā cājyaṃ vīryaṃ puṃsāṃ bhaviṣyati / aindraṃ pāśupataṃ brāhmaṃ sthūṇākarṇaṃ ca mādhava /
mantrāstatra bhaviṣyanti prayuktāḥ savyasācinā //

anuyātaśca pitaramadhiko vā parākrame /
gītaṃ stotraṃ sa saubhadraḥ samyak tatra bhaviṣyati //

udgātātra punarbhīmaḥ prastotā sumahābalaḥ /
vinadansa naravyāghro nāgānīkāntakṛdraṇe //

sa caiva tatra dharmātmā śaśvadrājā yudhiṣṭhiraḥ /
japairhomaiśca saṃyukto brahmatvaṃ kārayiṣyati //

śaṅkhaśabdāḥ samurajā bheryaśca madhusūdana /
utkṛṣṭaḥ siṃhanādaśca subrahmaṇyo bhaviṣyati //

nakulaḥ sahadevaśca mādrīputrau yaśasvinau . śāmitraṃ tau mahāvīryau samyak tatra bhaviṣyataḥ /
tau maitrāvaruṇāgnīdhrau mahāvīryau bhaviṣyataḥ //

kalmāṣadaṇḍā govinda vimalā rathapaṅktayaḥ /
yūpāḥ samupakalpantāmasminyajñe janārdana //

karṇinālīkanārācā vatsadantopabṛṃhaṇāḥ /
tomarāḥ somakalaśāḥ pavitrāṇi dhanūṃṣi ca //

asayo'tra kapālāni puroḍāśāḥ śirāṃsi ca /
havistu rudhiraṃ kṛṣṇa tasminyajñe bhaviṣyati //

idhmāḥ paridhayaścaiva śaktayo vimalā gadāḥ /
sadasyā droṇaśiṣyāśca kṛpasya ca śaradvataḥ //

iṣavo'tra paristomā muktā gāṇḍīvadhanvanā /
mahārathaprayuktāśca droṇadrauṇipracoditāḥ //

pratiprāsthānikaṃ karma sātyakistu kariṣyati /
dīkṣito dhārtarāṣṭro'tra patnī cāsya mahācamūḥ //

ghaṭotkaco'tra śāmitraṃ kariṣyati mahābalaḥ /
atirātre mahābāho vitate yajñakarmaṇi //

dakṣiṇā tvasya yajñasya dhṛṣṭadyumnaḥ pratāpavān /
vaitānike karmamukhe jāto yatkṛṣṇa pāvakāt //

yadabruvamahaṃ kṛṣṇa kaṭukāni sma pāṇḍavān /
priyārthaṃ dhārtarāṣṭrasya tena tapye hyakarmaṇā //

yadā drakṣyasi māṃ kṛṣṇa nihataṃ savyasācinā /
punaścitistadā cāsya yajñasyātha bhaviṣyati //

duḥśāsanasya rudhiraṃ yadā pāsyati pāṇḍavaḥ /
ānardaṃ nardataḥ samyak tadā sūyaṃ bhaviṣyati //

yadā droṇaṃ ca bhīṣmaṃ ca pāñcālyau pātayiṣyataḥ /
tadā yajñāvasānaṃ tadbhaviṣyati janārdana //

duryodhanaṃ yadā hantā bhīmaseno mahābalaḥ /
tadā samāpsyate yajño dhārtarāṣṭrasya mādhava //

snuṣāśca prasnuṣāścaiva dhṛtarāṣṭrasya saṅgatāḥ /
hateśvarā naṣṭaputrā hatanāthāśca keśava //

rudantyaḥ sahagāndhāryā śvagṛdhrakurarākule /
sa yajñe'sminnavabhṛtho bhaviṣyati janārdana //

vidyāvṛddhā vayovṛddhāḥ kṣatriyāḥ kṣatriyarṣabha /
vṛthā mṛtyuṃ na kurvīraṃstvatkṛte madhusūdana //

śastreṇa nidhanaṃ gacchetsamṛddhaṃ kṣatramaṇḍalam /
karukṣetre puṇyatame trailokyasyāpi keśava //

tadatra puṇḍarīkākṣa vidhatsva yadabhīpsitam /
yathā kārtsnyena vārṣṇeya kṣatraṃ svargamavāpnuyāt //

yāvatsthāsyanti girayaḥ saritaśca janārdana /
tāvatkīrtibhavaḥ śabdaḥ śāśvatoyaṃ bhaviṣyati //

brāhmaṇāḥ kathayiṣyanti mahābhāratamāhavam /
samāgameṣu vārṣṇeya kṣatriyāṇāṃ yaśodhanam //

samupānaya kaunteyaṃ yuddhāya mama keśava /
mantrasaṃvaraṇaṃ kurvannityameva parantapa //