Mahabharata · Chapter 5.136

naiva rājñā daraḥ kāryo jātu kasyāñcidāpadi /
atha cedapi dīrṇaḥ syānnaiva varteta dīrṇavat //

dīrṇaṃ hi dṛṣṭvā rājānaṃ sarvamevānudīryate /
rāṣṭraṃ balamamātyāśca pṛthakkurvanti te matīḥ //

śatruneke prapadyante prajahatyapare punaḥ /
anye tu prajihīrṣanti ye purastādvimānitāḥ //

ya evātyantasuhṛdasta enaṃ paryupāsate /
aśaktayaḥ svastikāmā baddhavatsā ilā iva //

śocantamanuśocanti patitāniva bāndhavān /
api te pūjitāḥ pūrvamapi te suhṛdo matāḥ //

ye rāṣṭramabhimanyante rājño vyasanamīyuṣaḥ /
mā dīdarastvaṃ suhṛdo mā tvāṃ dīrṇaṃ prahāsiṣuḥ //

prabhāvaṃ pauruṣaṃ buddhiṃ jijñāsantyā mayā tava /
vidadhatyā samāśvāsamuktaṃ tejovivṛddhaye //

yadetatsaṃvijānāsi yadi samyagbravīmyaham /
kṛtvā saumyamivātmānaṃ jāyāyottiṣṭha sañjaya //

asti naḥ kośanicayo mahānaviditastava /
tamahaṃ veda nānyastamupasampādayāmi te //

santi naikaśatā bhūyaḥ suhṛdastava sañjaya /
sukhaduḥkhasahā vīra sangrāmādanivartinaḥ //

tādṛśā hi sahāyā vai puruṣasya bubhūṣataḥ /
iṣṭaṃ jihīrṣataḥ kiñcitsacivāḥ śatrukarśana //

tasyāstvīdṛśakaṃ vākyaṃ śrutvāpi svalpacetasaḥ /
tamastvapāgamattasya sucitrārthapadākṣaram //
putra uvāca /

udake nauriyaṃ dhāryā vaktavyaṃ pravaṇe mayā /
yasya me bhavatī netrī bhaviṣyadbhūtidarśinī //

ahaṃ hi vacanaṃ tvattaḥ śuśrūṣuraparāparam /
kiñcitkiñcitprativadaṃstūṣṇīmāsaṃ muhurmuhuḥ //

atṛpyannamṛtasyeva kṛcchrāllabdhasya bāndhavāt /
udyacchāmyeṣa śatrūṇāṃ niyamārthaṃ jāyaya ca //
kuntyuvāca /

sadaśca iva sa kṣiptaḥ praṇunno vākyasāyakaiḥ /
taccakāra tathā sarvaṃ yathāvadanuśāsanam //

idamuddharṣaṇaṃ bhīmaṃ tejovardhanamuttamam /
rājānaṃ śrāvayenmantrī sīdantaṃ śatrupīḍitam //

jayo nāmetihāso'yaṃ śrotavyo vijigīṣuṇā /
mahīṃ vijayate kṣipraṃ śrutvā śatrūṃśca mardati //

idaṃ puṃsavanaṃ caiva vīrājananameva ca /
abhīkṣṇaṃ garbhiṇī śrutvā dhruvaṃ vīraṃ prajāyate //

vidyāśūraṃ tapaḥśūraṃ dānaśūraṃ tapasvinam /
brāhmayā śriyā dīpyamānaṃ sādhuvāde ca sammatam //

arciṣmantaṃ balopetaṃ mahābhāgaṃ mahāratham /
dhṛtimantamanādhṛṣyaṃ jetāramaparājitam //

niyantāramasādhūnāṃ goptāraṃ dharmacāriṇām /
īdṛśaṃ kṣatriyā sūte vīraṃ satyaparākramam //