Mahabharata · Chapter 5.135

kṛṣṇāyasasyeva ca te saṃhatya hṛdayaṃ kṛtam /
mama mātastvakaruṇe vīraprajñe hyamarṣaṇe //

aho kṣatrasamācāro yatra māmitaraṃ yathā /
niyojayasi yuddhāya paramāteva māṃ tathā //

īdṛśaṃ vacanaṃ brūyādbhavatī putramekajam /
kiṃ nu te māmapaśyantyāḥ pṛthivyā api sarvayā //

kimābharaṇakṛtyena kiṃ bhogairjīvitena vā /
mayi vā saṅgarahate priyaputre viśeṣataḥ //
mātovāca /

sarvāvasthā hi viduṣāṃ tāta dharmārthakāraṇāt /
tāvevābhisamīkṣyāhaṃ sañjaya tvāmacūjudam //

sa samīkṣya kramopeto mukhyaḥ kālo'yamāgataḥ /
asmiṃścedāgate kāle kāryaṃ na pratipadyase //

asambhāvitarūpastvamānṛśaṃsyaṃ kariṣyasi /
taṃ tvāmayaśasā spṛṣṭaṃ na brūyāṃ yadi sañjaya //

kharīvātsalyamāhustanniḥsāmarthyamahetukam /
sadbhirvigarhitaṃ mārgaṃ tyaja mūrkhaniṣevitam //

avidyā vai mahatyasti yāmimāṃ saṃśritāḥ prajāḥ /
tava syādyadi sadvṛttaṃ tena me tvaṃ priyo bhaveḥ //

dharmārthaguṇayuktena netareṇa kathañcana /
daivamānuṣayuktena sadbhirācaritena ca //

yo hyevamavinītena ramate putranaptṛṇā /
anutthānavatā cāpi durvinītena durdhiyā //

ramate yastu putreṇa moghaṃ tasya prajāphalam /
akurvanto hi karmāṇi kurvanto ninditāni ca //

sukhaṃ naiveha nāmutra labhante puruṣādhamāḥ . yuddhāya kṣatriyaḥ sṛṣṭaḥ sañjayeha jayāya ca /
krūrāya karmaṇe nityaṃ prajānāṃ paripālane //

jayanvā vadhyamāno vā prāpnotīndrasalokatām . na śakrabhavane puṇye divi tadvidyate sukham /
yadamitrānvaśe kṛtvā kṣatriyaḥ sukhamedhate //

manyunā dahyamāneha puruṣeṇa manasvinā /
nikṛteneha bahuśaḥ śatrūnprati jigīṣayā //

ātmānaṃ vā parityajya śatruṃ vā vinipātya ca / prāpyate neha śāntirhi nityameva tu sañjaya /
atonyena prakāreṇa śāntirasya kuto bhavet //

iha prājño hi puruṣaḥ svalpamapriyamicchati /
yasya svalpaṃ priyaṃ loke dhruvaṃ tasyālpamapriyam //

priyābhāvācca puruṣo naiva prāpnoti śobhanam /
dhruvaṃ cābhāvamabhyeti gatvā gaṅgeva sāgaram //
putra uvāca /

neyaṃ matistvayā vācyā mātaḥ putre viśeṣataḥ /
kāruṇyameva paśya tvaṃ bhūtveha jaḍamūkavat //
mātovāca /

ato me bhūyasī nandiryadevamanupaśyasi /
codyaṃ māṃ codayasyetadbhṛśaṃ vai codayāmi te //

atha tvāṃ pūjayiṣyāmi hatvā vai sarvasaindhavān /
ahaṃ paśyāmi vijayaṃ kṛcchrabhāvinameva te //
putra uvāca /

akośasyāsahāyasya kutaḥ siddhirjayo mama /
ityavasthāṃ viditvaitāmātmanātmani dāruṇām //

rājyādbhāvo nivṛtto me tridivādiva dṛṣkṛtaḥ /
īdṛśaṃ bhavatī kañcidupāyamanupaśyati //

tanme pariṇataprajñe samyakprabrūhi pṛcchate /
kariṣyāmi hi tatsarvaṃ yathāvadanuśāsanam //
mātovāca /

putra nātmāvamantavyaḥ pūrvābhirasamṛddhibhiḥ . abhūtvā hi bhavantyarthā bhūtvā naśyanti cāpare /
amarṣeṇaiva cāpyarthā nārabdhavyāḥ subāliśaiḥ //

sarveṣāṃ karmaṇāṃ tāta phale nityamanityatā /
anityamiti jānanto na bhavanti bhavanti ca //

atha ye naiva kurvanti naiva jātu bhavanti te /
aikaguṇyamanīhāyāmabhāvaḥ karmaṇāṃ phalam //

atha dvaiguṇyamīhāyāṃ phalaṃ bhavati vā navā /
yasya prāgeva viditā sarvārthānāmanityatā //

nudedvṛddhisamṛddhī sa pratikūle nṛpātmaja /
utthātavyaṃ jāgṛtavyaṃ yoktavyaṃ bhūtikarmasu //

bhaviṣyatītyeva manaḥ kṛtvā satatamavyathaiḥ /
maṅgalāni puraskṛtya brāhmaṇāṃśceśvaraiḥ saha //

prājñasya nṛpaterāśu vṛddhirbhavati putraka /
abhivartati lakṣmīstaṃ prācīmiva divākaraḥ //

nidarśanānyupāyāṃśca bahūnyuddharṣaṇāni ca /
anudarśitarūpo'si paśyāmi kuru pauruṣam //

puruṣārthamabhipretaṃ samāhartumihārhasi /
kruddhānlubdhānparikṣīṇānavaliptānvimānitān //

spardhinaścaiva ye kecittānyukta upadhāraya / etena tvaṃ prakāreṇa mahato bhetsyase gaṇān /
mahāvega ivoddhūto mātariśvā balāhakān //

teṣāmagrapradāyī syāḥ kalpotthāyī priyaṃvadaḥ /
te tvāṃ priyaṃ kariṣyanti purodhāsyanti ca dhruvam //

yadaiva śatrurjānīyātsapatnaṃ tyaktajīvitam /
tadaivāsmādudvijeta sarpādveśmagatādiva //

taṃ viditvā parākrāntaṃ vaśe na kurute yadi /
nirvādairnirvadedenamantatastadbhaviṣyati //

nirvādādāspadaṃ labdhā dhanavṛddhirbhaviṣyati /
dhanavantaṃ hi mitrāṇi bhajante cāśrayanti ca //

skhalitārthaṃ punastāni santyajanti ca bāndhavāḥ /
nahyasminnāśrayante ca jugupsante ca tādṛśam //

śatruṃ kṛtvā yaḥ sahāyaṃ viśvāsamupagacchati /
sa na sambhāvyamevaitadyadrājyaṃ prāpnuyāditi //