Mahabharata · Chapter 5.128

tataḥ prahasya dāśārhaḥ krodhaparyākulekṣaṇaḥ /
duryodhanamidaṃ vākyamabravītkurusaṃsadi //

lapsyase vīraśayanaṃ kāmametadavāpsyasi /
sthiro bhava sahāmātyo vimardo bhavitā mahān //

yaccaitanmanyase mūḍha na me kaścidvyatikramaḥ /
pāṇḍaveṣviti tatsarvaṃ nibodha tvaṃ narādhipa //

śriyāṃ santapyamānena pāṇḍavānāṃ mahātmanām /
tvayā durmantritaṃ dyūtaṃ saubalena ca bhārata //

kathaṃ ca jñātayastāta śreyāṃsaḥ sādhusammatāḥ /
tathā'nyāyyamupasthātuṃ jihmenājihmacāriṇaḥ //

akṣadyūtaṃ mahāprajña satāṃ mativināśanam /
asatāṃ tatra jāyante bhedāśca vyasanāni ca //

tadidaṃ vyasanaṃ ghoraṃ tvayā dyūtamukhaṃ kṛtam /
asamīkṣya sadācārānsārdhaṃ pāpānubandhanaiḥ //

kaścānyo bhrātṛbhāryāṃ vai viprakartṛṃ tathārhati /
ānīya ca sabhāṃ vyaktaṃ yathoktā draupadī tvayā //

kulīnā śīlasampannā prāṇebhyo'pi garīyasī /
mahiṣī pāṇḍuputrāṇāṃ tathā vinikṛtā tvayā //

jānanti kuravaḥ sarve yathoktāḥ kurusaṃsadi /
duḥśāsanena kaunteyāḥ pravrajantaḥ parantapāḥ //

samyagvṛtteṣvalubdheṣu satataṃ dharmacāriṣu /
sveṣu bandhuṣu kaḥ sādhuścaredevamasāmpratam //

nṛśaṃsānāmanāryāṇāṃ tathā paruṣabhāṣaṇam /
karṇaduḥśāsanābhyāṃ ca tvayā ca bahuśaḥ kṛtam //

saha mātrā pradagdhuṃ tānbālakānvāraṇāvate /
āsthitaḥ paramo yatno na samṛddhaśca tattava //

ūṣuśca suciraṃ kālaṃ pracchannāḥ pāṇḍavāstadā /
mātrā sahaikacakrāyāṃ brāhmaṇasya niveśane //

viṣeṇa sarpabandhaiśca yatitāḥ pāṇḍavāstvayā /
sarvopāyairvināśāya na samṛddhaṃ ca tattava //

evambuddhiḥ pāṇḍaveṣu mithyāvṛttiḥ sadā bhavān /
kathaṃ te nāparādho'sti pāṇḍaveṣu mahātmasu //

evaṃvṛttaḥ kathaṃ rājye sthātumarhasi pāpakṛt /
sa rājyācca sukhāccaiva hāsyase kulapāṃsana //

yaccaibhyo yācamānebhyaḥ pitryamaṃśaṃ na ditsati /
tacca pāpa pradātā'si bhraṣṭaiśvaryo nipātitaḥ //

kṛtvā bahūnyakāryāṇi pāṇḍaveṣu nṛśaṃsavat /
mithyāvṛttiranāryaḥ sannadya vipratipadyase //

mātāpitṛbhyāṃ bhīṣmeṇa droṇena vidureṇa ca /
śāmyeti muhuruktosi na ca śāmyasi pārthiva //

śame hi sumahām̐llābhastava pārthasya cobhayoḥ /
na ca rocayase rājankimanyadbuddhilāghavāt //

na śarma prāpsyase rājannutkramya suhṛdāṃ vacaḥ /
adharmyamayaśasyaṃ ca kriyate pārthiva tvayā //
vaiśampāyana uvāca /

evaṃ bruvati dāśārhe duryodhanamamarṣaṇam /
duḥśāsana idaṃ vākyamabravītkarusaṃsadi //

na cetsandhāsyase rājansvena kāmena pāṇḍavaiḥ /
baddhvā kila tvāṃ dāsyanti kuntīputrāya kauravāḥ //

vaikartanaṃ tvāṃ ca māṃ ca trīnetānmanujarṣabha /
pāṇḍavebhyaḥ pradāsyanti bhīṣmo droṇaḥ pitā ca te //

bhrāturetadvacaḥ śrutvā dhārtarāṣṭraḥ suyodhanaḥ /
kruddhaḥ prātiṣṭhatotthāya mahānāga iva śvasan //

viduraṃ ca somadattaṃ ca mahārājaṃ ca bāhlikam /
kṛpaṃ ca somadattaṃ ca bhīṣmaṃ droṇaṃ janārdanam //

sarvānetānanādṛtya durmatirnirapatrapaḥ /
aśiṣṭavadamaryādo mānī mānyāvamānitā //

taṃ prasthitamabhiprekṣya bhrātaro manujarṣabham /
anujagmuḥ sahāmātyā rājānaścāpi sarvaśaḥ //

sabhāyāmutthitaṃ kruddhaṃ prasthitaṃ bhrātṛbhiḥ saha /
duryodhanamabhiprekṣya bhīṣmaḥ śāntanavo'bravīt //

dharmārthāvabhisantyajya saṃrambhaṃ yo'numanyate /
hasanti vyasane tasya durhṛdo nacirādiva //

durātmā rājaputro'yaṃ dhārtarāṣṭro'nupāyavit /
mithyābhimānī rājyasya krodhalobhavaśānugaḥ //

kālapakvamidaṃ manye sarvaṃ kṣatraṃ janārdana /
sarve hyanusṛtā mohātpārthivāḥ saha mantribhiḥ //

bhīṣmasyātha vacaḥ śrutvā dāśārhaḥ puṣkarekṣaṇaḥ /
bhīṣmadroṇamukhānsarvānabhyabhāṣata vīryavān //

sarveṣāṃ kuruvṛddhānāṃ mahānayamatikramaḥ /
prasahya mandamaiśvarye na niyacchanti yannṛpam //

tatra kāryamahaṃ manye kālaprāptamarindamāḥ /
kriyamāṇe bhavecchreyastatsarvaṃ śrṛṇutānaghāḥ //

pratyakṣametadbhavatāṃ yadvakṣyāmi hitaṃ vacaḥ /
bhavatāmānukūlyena yadi roceta bhāratāḥ //

putro vai bhojarājasya durācāro hyanātmavān /
jīvataḥ pituraiśvaryaṃ hṛtvā mṛtyuvaśaṃ gataḥ //

ugrasenasutaḥ kaṃsaḥ parityaktaḥ sa bāndhavaiḥ /
jñātīnāṃ hitakāmena mayā śasto mahāmṛdhe //

āhukaḥ punarasmābhirjñātibhiścāpi satkṛtaḥ /
ugrasenaḥ kṛto rājā bhojarājanyavardhanaḥ //

saṃsamekaṃ parityajya kulārthe sarvayādavāḥ /
sambhūya sukhamedhante bhāratāndhakavṛṣṇayaḥ //

api cāpyavadadrājanparameṣṭhī prajāpatiḥ /
vyūḍhe devāsure yuddhe'bhyudyateṣvāyudheṣu ca //

dvaidhībhūteṣu lokeṣu vinaśyatsu ca bhārata /
abravīttu tadā devo bhagavām̐llokabhāvanaḥ //

parābhaviṣyantyasurā daiteyā dānavaiḥ saha /
ādityā vasavo rudrā bhaviṣyanti divausakaḥ //

devāsuramanuṣyāśca gandharvoragarākṣasāḥ /
asminyuddhe susankruddhā haniṣyanti parasparam //

vartamānaṃ jagatsarvaṃ muhūrtānna bhaviṣyati / iti matvā'bravīddharmaṃ parameṣṭhī prajāpatiḥ /
varuṇāya prayacchaitānbaddhvā daiteyadānavān //

evamuktastato dharmo niyogātparameṣṭhinaḥ /
varuṇāya dadau sarvānbaddhvā daiteyadānavān //

tānbaddhvā dharmapāśaiśca svaiśca pāśairjaleśvaraḥ /
varuṇaḥ sāgare yatto nityaṃ rakṣati dānavān //

tathā duryodhanaṃ karṇaṃ śakuniṃ cāpi saubalam /
baddhvā duḥśāsanaṃ cāpi pāṇḍavebhyaḥ prayacchata //

tyajetkulārthe puruṣaṃ grāmasyārthe kulaṃ tyajet /
grāmaṃ janapadasyārthe ātmārthe pṛthivīṃ tyajet //

rājanduryodhanaṃ baddhvā tataḥ saṃśāmya pāṇḍavaiḥ /
tvatkṛte na vinaśyeyuḥ kṣatriyāḥ kṣatriyarṣabha //