Mahabharata · Chapter 5.127

śrutvā duryodhano vākyamapriyaṃ kurusaṃsadi /
pratyuvāca mahābāhuṃ vāsudevaṃ yaśasvinam //

prasamīkṣya bhavānetadvaktumarhati keśava /
māmeva hi viśeṣeṇa vibhāṣya parigarhase //

bhaktivādena pārthānāmakasmānmadhusūdana /
bhavāngarhayati nityaṃ kiṃ samīkṣya balābalam //

bhavānkṣattā ca rājā vā'pyācāryo vā pitāmahaḥ /
māmeva parigarhante nānyaṃ kañcana pāṇḍavam //

na cāhaṃ lakṣaye kañcidvyabhicāramihātmanaḥ /
atha sarve bhavanto māṃ vidviṣanti sarājakāḥ //

na cāhaṃ kañcidatyarthamaparādhamarindama /
vicintayanprapaśyāmi susūkṣmamapi keśava //

priyābhyupagate dyūte pāṇḍavā madhūsūdana /
jitāḥ śakuninā rājyaṃ tatra kiṃ mama duṣkṛtam //

yatpunardraviṇaṃ kiñcittatrājīyanta pāṇḍavāḥ /
tebhya evābhyanujñātaṃ tattada madhusūdana //

aparādho na cāsmākaṃ yatte hyakṣaiḥ parājitāḥ /
ajeyā jayatāṃ śreṣṭha pārthāḥ pravrājitā vanam //

kena vā'pyapavādena viruddhyantyaribhiḥ saha /
aśaktāḥ pāṇḍavāḥ kṛṣṇa prahṛṣṭāḥ pratyamitravat //

kimasmābhiḥ kṛtaṃ teṣāṃ kasminvā punarāgasi /
dhārtarāṣṭrāñjighāṃsanti pāṇḍavāḥ sṛñjayaiḥ saha //

na cāpi vayamugreṇa karmaṇā vacanena vā /
prabhraṣṭāḥ praṇamāmeha bhayādapi śatakratum //

na ca taṃ kṛṣṇa paśyāmi kṣatradharmamanuṣṭhitam /
utsaheta yudhā jetuṃ yo naḥ śatrunibarhaṇa //

na hi bhīṣmakṛpadroṇāḥ sakarṇā madhusūdana /
devairapi yudhā jetuṃ śakyāḥ kimuta pāṇḍavaiḥ //

svadharmamanupaśyanto yadi mādhava saṃyuge /
astreṇa nidhanaṃ kāle prāpsyāmaḥ svargyameva tat //

mukhyaścaivaiṣa no dharmaḥ kṣatriyāṇāṃ janārdana /
yacchayīmahi saṅgrāme śaratalpagatā vayam //

te vayaṃ vīraśayanaṃ prāpsyāmo yadi saṃyuge /
apraṇamyaiva śatrūṇāṃ na nastapsyanti mādhava //

kaśca jātu kule jātaḥ kṣatradharmeṇa vartayan /
bhayādvṛttiṃ samīkṣyaivaṃ praṇamediha karhicit //

udyacchedeva na namedudyamo hyeva pauruṣam /
apyaparvaṇi bhajyeta na namediha karhicit //

iti mātaṅgavacanaṃ paripsanti hitepsavaḥ /
dharmāya caiva praṇamedbrāhmaṇebhyaśca madvidhaḥ //

acintayankañcidanyaṃ yāvajjīvaṃ tathā caret /
eṣa dharmaḥ kṣatriyāṇāṃ matametacca me sadā //

rājyāṃśaścābhyanujñāto yo me pitrā purā'bhavat /
na sa labhyaḥ punarjātu mayi jīvati keśava //

yāvacca rājā dhriyate dhṛtarāṣṭro janārdana . nyastaśastrā vayaṃ te vā'pyupajīvāma mādhava /
apradeyaṃ purā dattaṃ rājyaṃ paravato mama //

ajñānādvā bhayādvā'pi mayi bāle janārdana /
na tadadya punarlabhyaṃ pāṇḍavairvṛṣṇinandana //

dhriyamāṇe mahābāhau mayi samprati keśava . yāvaddhi tīkṣṇayā sūcyā viddhyedagreṇa keśava /
tāvadapyaparityājyaṃ bhūmernaḥ pāṇḍavānprati //