મહાભારત · અધ્યાય 5.127

શ્રુત્વા દુર્યોધનો વાક્યમપ્રિયં કુરુસંસદિ ।
પ્રત્યુવાચ મહાબાહું વાસુદેવં યશસ્વિનમ્ ॥

પ્રસમીક્ષ્ય ભવાનેતદ્વક્તુમર્હતિ કેશવ ।
મામેવ હિ વિશેષેણ વિભાષ્ય પરિગર્હસે ॥

ભક્તિવાદેન પાર્થાનામકસ્માન્મધુસૂદન ।
ભવાન્ગર્હયતિ નિત્યં કિં સમીક્ષ્ય બલાબલમ્ ॥

ભવાન્ક્ષત્તા ચ રાજા વાઽપ્યાચાર્યો વા પિતામહઃ ।
મામેવ પરિગર્હન્તે નાન્યં કઞ્ચન પાણ્ડવમ્ ॥

ન ચાહં લક્ષયે કઞ્ચિદ્વ્યભિચારમિહાત્મનઃ ।
અથ સર્વે ભવન્તો માં વિદ્વિષન્તિ સરાજકાઃ ॥

ન ચાહં કઞ્ચિદત્યર્થમપરાધમરિન્દમ ।
વિચિન્તયન્પ્રપશ્યામિ સુસૂક્ષ્મમપિ કેશવ ॥

પ્રિયાભ્યુપગતે દ્યૂતે પાણ્ડવા મધૂસૂદન ।
જિતાઃ શકુનિના રાજ્યં તત્ર કિં મમ દુષ્કૃતમ્ ॥

યત્પુનર્દ્રવિણં કિઞ્ચિત્તત્રાજીયન્ત પાણ્ડવાઃ ।
તેભ્ય એવાભ્યનુજ્ઞાતં તત્તદ મધુસૂદન ॥

અપરાધો ન ચાસ્માકં યત્તે હ્યક્ષૈઃ પરાજિતાઃ ।
અજેયા જયતાં શ્રેષ્ઠ પાર્થાઃ પ્રવ્રાજિતા વનમ્ ॥

કેન વાઽપ્યપવાદેન વિરુદ્ધ્યન્ત્યરિભિઃ સહ ।
અશક્તાઃ પાણ્ડવાઃ કૃષ્ણ પ્રહૃષ્ટાઃ પ્રત્યમિત્રવત્ ॥

કિમસ્માભિઃ કૃતં તેષાં કસ્મિન્વા પુનરાગસિ ।
ધાર્તરાષ્ટ્રાઞ્જિઘાંસન્તિ પાણ્ડવાઃ સૃઞ્જયૈઃ સહ ॥

ન ચાપિ વયમુગ્રેણ કર્મણા વચનેન વા ।
પ્રભ્રષ્ટાઃ પ્રણમામેહ ભયાદપિ શતક્રતુમ્ ॥

ન ચ તં કૃષ્ણ પશ્યામિ ક્ષત્રધર્મમનુષ્ઠિતમ્ ।
ઉત્સહેત યુધા જેતું યો નઃ શત્રુનિબર્હણ ॥

ન હિ ભીષ્મકૃપદ્રોણાઃ સકર્ણા મધુસૂદન ।
દેવૈરપિ યુધા જેતું શક્યાઃ કિમુત પાણ્ડવૈઃ ॥

સ્વધર્મમનુપશ્યન્તો યદિ માધવ સંયુગે ।
અસ્ત્રેણ નિધનં કાલે પ્રાપ્સ્યામઃ સ્વર્ગ્યમેવ તત્ ॥

મુખ્યશ્ચૈવૈષ નો ધર્મઃ ક્ષત્રિયાણાં જનાર્દન ।
યચ્છયીમહિ સઙ્ગ્રામે શરતલ્પગતા વયમ્ ॥

તે વયં વીરશયનં પ્રાપ્સ્યામો યદિ સંયુગે ।
અપ્રણમ્યૈવ શત્રૂણાં ન નસ્તપ્સ્યન્તિ માધવ ॥

કશ્ચ જાતુ કુલે જાતઃ ક્ષત્રધર્મેણ વર્તયન્ ।
ભયાદ્વૃત્તિં સમીક્ષ્યૈવં પ્રણમેદિહ કર્હિચિત્ ॥

ઉદ્યચ્છેદેવ ન નમેદુદ્યમો હ્યેવ પૌરુષમ્ ।
અપ્યપર્વણિ ભજ્યેત ન નમેદિહ કર્હિચિત્ ॥

ઇતિ માતઙ્ગવચનં પરિપ્સન્તિ હિતેપ્સવઃ ।
ધર્માય ચૈવ પ્રણમેદ્બ્રાહ્મણેભ્યશ્ચ મદ્વિધઃ ॥

અચિન્તયન્કઞ્ચિદન્યં યાવજ્જીવં તથા ચરેત્ ।
એષ ધર્મઃ ક્ષત્રિયાણાં મતમેતચ્ચ મે સદા ॥

રાજ્યાંશશ્ચાભ્યનુજ્ઞાતો યો મે પિત્રા પુરાઽભવત્ ।
ન સ લભ્યઃ પુનર્જાતુ મયિ જીવતિ કેશવ ॥

યાવચ્ચ રાજા ધ્રિયતે ધૃતરાષ્ટ્રો જનાર્દન . ન્યસ્તશસ્ત્રા વયં તે વાઽપ્યુપજીવામ માધવ ।
અપ્રદેયં પુરા દત્તં રાજ્યં પરવતો મમ ॥

અજ્ઞાનાદ્વા ભયાદ્વાઽપિ મયિ બાલે જનાર્દન ।
ન તદદ્ય પુનર્લભ્યં પાણ્ડવૈર્વૃષ્ણિનન્દન ॥

ધ્રિયમાણે મહાબાહૌ મયિ સમ્પ્રતિ કેશવ . યાવદ્ધિ તીક્ષ્ણયા સૂચ્યા વિદ્ધ્યેદગ્રેણ કેશવ ।
તાવદપ્યપરિત્યાજ્યં ભૂમેર્નઃ પાણ્ડવાન્પ્રતિ ॥