Mahabharata · Chapter 5.126

dhṛtarāṣṭravacaḥ śrutvā bhīṣmadroṇau samavyathau /
duryodhanamidaṃ vākyamūcatuḥ śāsanātigam //

yāvatkṛṣṇāvasannaddhau yāvattiṣṭhati gāṇḍivam /
yāvaddhaumyo na medhāgnau juhotīha dviṣadbalam //

yāvanna prekṣate krūddhaḥ senāṃ tava yudhiṣṭhiraḥ /
hrīniṣevo maheṣvāsastāvacchāmyatu vaiśasam //

yāvanna dṛśyate pārthaḥ sve'pyanīke vyavasthitaḥ /
bhīmaseno maheṣvāsastāvacchāmyatu vaiśasam //

yāvanna carate mārgānpṛtanāmabhidharṣayan /
bhīmaseno gadāpāṇistāvatsaṃśāmya pāṇḍavaiḥ //

yāvanna śātayatyājau śirāṃsi gajayodhinām . gadayā vīraghātinyā phalānīva vanaspateḥ /
kālena paripakvāni tāvacchāmyatu vaiśasam //

nakulaḥ sahadevaśca dhṛṣṭadyumnaśca pārṣataḥ //
virāṭaśca śikhaṇḍī ca śaiśupāliśca daṃśitāḥ //

yāvanna praviśantyete nakrā iva mahārṇavam /
kṛtāstrāḥ kṣipramasyantastāvacchāmyatu vaiśasam //

yāvanna sukumāreṣu śarīreṣu mahīkṣitām /
gārdhrapatrāḥ patantyugrāstāvacchāmyatu vaiśasam //

candanāgurudigdheṣu hāraniṣkadhareṣu ca /
norassu yāvadyodhānāṃ maheṣvāsairmaheṣavaḥ //

kṛtastraiḥ kṣipramasyadbhirdūrapātibhirāyasāḥ /
abhilakṣyairnipātyante tāvacchāmyatu vaiśasam //

abhivādayamānaṃ tvāṃ śirasā rājakuñjaraḥ /
pāṇibhyāṃ pratigṛhṇātu dharmarājo yudhiṣṭhiraḥ //

dhvajāṅkuśapatākāṅkaṃ dakṣiṇaṃ te sudakṣiṇaḥ /
skandhe nikṣipatāṃ bahuṃ śāntaye bharatarṣabha //

ratnauṣadhisametena ratnāṅgulitalena ca /
upaviṣṭasya pṛṣṭhaṃ te pāṇinā parimārjatu //

śālaskandho mahābahustvāṃ svajāno vṛkodaraḥ . 5-126-15bsāmnā'bhivadatāṃ cāpi śāntaye bharatarṣabha //

arjunena yamābhyāṃ ca tribhistairabhivāditaḥ /
mūrdhni tānsamupāghrāya premṇā'bhivada pārthiva //

dṛṣṭvā tvāṃ pāṇḍavairvīrairbhrātṛbhiḥ saha sangatam /
yāvadānandajāśrūṇi pranmuñcantu narādhipāḥ //

ghuṣyatāṃ rājadhānīṣu sarvasampanmahīkṣitām /
pṛthivī bhrātṛbhāvena bhujyatāṃ vijvaro bhava //