Mahabharata · Chapter 5.125

tataḥ śāntanavo bhīṣmo duryodhanamamarṣaṇam /
keśavasya vacaḥ śrutvā provāca bharatarṣabha //

kṛṣṇena vākyamukto'si sṛhṛdāṃ śamamicchatā . anvapadyasva tattāta mā manyuvaśamanvagāḥ /

akṛtvā vacanaṃ tāta keśavasya mahātmanaḥ /
śreyo na jātu na sukhaṃ na kalyāṇamavāpsyasi //

dharmyamarthyaṃ mahābāhurāha tvāṃ tāta keśavaḥ /
tadarthamabhipadyasva mā rājannīnaśaḥ prajāḥ //

jvalitāṃ tvamimāṃ lakṣmīṃ bhāratīṃ sarvarājasu /
jīvato dhṛtarāṣṭrasya daurātmyādbhaṃśayiṣyasi //

ātmānaṃ ca sahāmātyaṃ saputrabhrātṛbāndhavam /
ahamityanayā buddhyā jīvitāddhaṃśayiṣyatasi //

atikrāmankeśavasya tathyaṃ vacanamarthavat /
pituśca bhārataśreṣṭha vidurasya ca dhīmataḥ //

mā kulaghnaḥ kupuruṣo durmatiḥ kāpathaṃ gamaḥ /
mātaraṃ pitaraṃ caiva mā mañjīḥ śokasāgare //

atha droṇo'bravīttatra duryodhanamidaṃ vacaḥ /
amarṣavaśamāpannaṃ niḥśvasantaṃ punaḥpunaḥ //

dharmārthayuktaṃ vacanamāha tvāṃ tāta keśavaḥ /
tathā bhīṣmaḥ śāntanavastañjuṣasva narādhipa //

prājñau medhāvinau dāntāvarthakāmau bahuśrutau /
āhatustvāṃ hitaṃ vākyaṃ tañjuṣasva narādhipa //

anutiṣṭha mahāprājña kṛṣṇabhīṣmau yadūcatuḥ /
mādhavaṃ buddhimohena mā'vamaṃsthāḥ parantapa //

ye tvāṃ protsāhayantyete naite kṛtyāya karhicit /
vairaṃ pareṣāṃ grīvāyāṃ pratimokṣyanti saṃyuge //

mā jīghanaḥ prajāḥ sarvāḥ putrānbhrātṝṃstathaiva ca /
vāsudevārjunau yatra viddhyajeyānalaṃ hi tān //

etaccaiva mataṃ satyaṃ suhṛdoḥ kṛṣṇabhīṣmayoḥ /
yadi nādāsyase tāta paścāttapsyasi bhārata //

yathoktaṃ jāmadagnyena bhūyāneṣa tato'rjunaḥ / kṛṣṇo hi devakīputro devairapi suduḥsahaḥ /
kiṃ te sukhapriyeṇeha proktena bharatarṣabha //

etatte sarvamākhyātaṃ yathecchasi tathā kuru /
na hi tvāmutsahe vaktuṃ bhūyo bharatasattama //
vaiśampāyana uvāca /

tasminvākyāntare vākyaṃ kṣattā'pi viduro'bravīt /
duryodhanamabhiprekṣya dhārtarāṣṭramamarṣaṇam //

duryodhana na śocāmi tvāmahaṃ bharatarṣabha /
imo tu vṛddhau śocāmi gāndhārīṃ pitaraṃ ca te //

yāvanāthau cariṣyete tvayā nāthena durhṛdā /
hatamitrau hatāmātyau lūnapakṣāvivāṇḍajau //

bhikṣukau vicariṣyete śocantau pṛthivīmimām /
kulaghnamīdṛśaṃ pāpaṃ janayitvā kupūruṣam //

atha duryodhaṃ rājā dhṛtarāṣṭro'bhyabhāṣata /
āsīnaṃ bhrātṛbhiḥ sārdhaṃ rājabhiḥ parivāritam //

duryodhana nibodhedaṃ śauriṇoktaṃ mahātmanā /
ādatsva śivamatyantaṃ yogakṣemavadavyayam //

anena hi sahāyena kṛṣṇenākliṣṭakarmaṇā /
iṣṭānsarvānabhiprāyānprāpsyāmaḥ sarvarājasu //

susaṃhataḥ keśavena tāta gaccha yudhiṣṭhiram /
cara svastyayanaṃ kṛtsnaṃ bharatānāmanāmayam //

vāsudevena tīrthena tāta gacchasva saṃśamam /
kālaprāptamidaṃ manye mā tvaṃ duryodhanātigāḥ //

śamaṃ cedyācamānaṃ tvaṃ pratyākhyāsyasi keśavam /
tvadarthamabhijalpantaṃ na tavāstyaparābhavaḥ //