Mahabharata · Chapter 5.122

pratyabhijñātamātro'tha sadbhistairnarapuṅgavaḥ / samāruroha nṛpatiraspṛśanvasudhātalam /
yayātirdivyasaṃsthāno babhūva vigatajvaraḥ //

divyamālyāmbaradharo divyābharaṇabhūṣitaḥ /
divyagandhaguṇopeto na pṛthvīmaspṛśatpadā //

tato vasumanāḥ pūrvamuccairuccārayanvacaḥ //
khyāto dānapatirloke vyājahāra nṛpaṃ tadā //

prāptavānasmi yalloke sarvavarṇeṣvagarhayā /
tadapyatha ca dāsyāmi tena saṃyujyatāṃ bhavān //

yatphalaṃ dānaśīlasya kṣamāśīlasya yatphalam /
yacca me phalamādhāne tena saṃyujyatāṃ bhavān //

tataḥ pratardano'pyāha vākyaṃ kṣatriyapuṅgavaḥ /
yathā dharmaratirnityaṃ nityaṃ yuddhaparāyaṇaḥ //

prāptavānasmi yalloke kṣatravaṃśodbhavaṃ yaśaḥ . vīraśabdaphalaṃ caiva tena saṃyujyatāṃ bhavān /
yathā dharme ratirnityaṃ tena satyena khaṃ vraja //

śibirauśīnaro dhīmānuvāca madhurāṃ giram /
yathā bāleṣu nārīṣu vaivāhyeṣu tathaiva ca //

saṅgareṣu nipāteṣu tathā tadvyasaneṣu ca /
anṛtaṃ noktapūrvaṃ me tena satyena khaṃ vraja //

yathā prāṇāṃśca rājyaṃ ca rājankāmasukhāni ca /
tyajeyaṃ na punaḥ satyaṃ tena satyena khaṃ vraja //

yathā satyena me dharmo yathā satyena pāvakaḥ /
prītaḥ śatakratuścaiva tena satyena khaṃ vraja //

aṣṭakastvatha rājarṣiḥ kauśiko mādhavīsutaḥ /
anekaśatayajvānaṃ nāhuṣaṃ prāha dharmavit //

śataśaḥ puṇḍarīkā me gosavāścaritāḥ prabho /
kratavo vājapeyāśca teṣāṃ phalamavāpnuhi //

na me ratnāni na dhanaṃ na tathā'nye paricchadā /
kratuṣvanupayuktāni tena satyena khaṃ vraja //
nārada uvāca /

yathāyathā hi jalpanti dauhitrāstaṃ narādhipam /
tathatathā vasumatīṃ tyaktvā rājā divaṃ yayau //

evaṃ sarve samastaiste rājānaḥ sukṛtaistadā /
yayātiṃ svargato bhraṣṭaṃ tārayāmāsurañjasā //

dauhitrāḥ svena dharmeṇa yajñadānakṛtena vai . caturṣu rājavaṃśeṣu sambhūtāḥ kulavardhanāḥ /
mātāmahaṃ mahāprājñaṃ divamāropayanta te //
rājāna ūcuḥ /

rājadharmaguṇopetāḥ sarvadharmaguṇānvitāḥ /
dauhitrāste vayaṃ rājandivamāroha pārthiva //