Mahabharata · Chapter 5.121

atha pracalitaḥ sthānādāsanācca paricyutaḥ /
kampiteneva manasā dharṣitaḥ śekavāhninā //

mlānasragbhraṣṭavijñānaḥ prabhraṣṭamukuṭāṅgadaḥ /
vighūrṇansrastasarvāṅgaḥ prabhraṣṭābharaṇāmbaraḥ //

adṛśyamānastānpaśyannapaśyaṃśca punaḥ punaḥ /
śūnyaḥ śūnyena manasā prapatiṣyanmahītalam //

kiṃ mayā manasā dhyātamaśubhaṃ dharmadūṣaṇam /
yenāhaṃ calitaḥ sthānāditi rājā vyacintayat //

te tu tatraiva rājānaḥ siddhāścāpsarasastathā /
apaśyanta nirālambaṃ taṃ yayātiṃ paricyutam //

athaitya puruṣaḥ kaścitkṣīṇapuṇyanipātakaḥ /
yayātimabravīdrājandrevarājasya śāsanāt //

atīva madamattastvaṃ na kañcinnāvamanyase /
mānena bhraṣṭaḥ svargaste nārhastvaṃ pārthivātmaja //

na ca prajñāyase gaccha patasveti tamabravīt /
pateyaṃ satsviti vacastriruttkā nahuṣātmajaḥ //

patiṣyanntayāmāsa gatiṃ gatimatāṃ varaḥ /
etasminneva kāle tu naimiṣe pārthivarṣabhān //

caturo'paśyata nṛpasteṣāṃ madhye papāta ha /
pratardano vasumanāḥ śibirauśīnaro'ṣṭakaḥ //

vājapeyena yajñena tarpayanti sureśvaram /
teṣāmadhvarajaṃ dhūmaṃ svargadvāramupasthitam //

yayātirupajighranvai nipapāta mahīṃ prati . bhūmau svarge ca sambaddhāṃ nadīṃ dhūmamayīmiva /
gaṅgāṃ gāmiva gacchantīmālambya jagatīpatiḥ //

śrīmatsvavabhṛthāgr्yeṣu caturṣu pratibandhuṣu /
madhye nipatito rājā lokapālopameṣu saḥ //

caturṣu hutakalpeṣu rājasiṃhamahāgniṣu /
papāta madhye rājarṣiryayātiḥ puṇyasaṅkṣaye //

tamāhuḥ pārthivāḥ sarve dīpyamānamiva śriyā /
ko bhavānkasya vā bandhurdeśasya nagarasya vā //

yakṣo vā'pyathavā devo gandharvo rākṣaso'pi vā /
na hi mānuṣarūposi kovārthaḥ kāṅkṣyate tvayā //
yayātiruvāca /

yayātirasmi rājarṣiḥ kṣīṇapuṇyaścyuto divaḥ /
pateyaṃ satsviti dhyāyanbhavatsu patitastataḥ //
rājāna ūcuḥ /

satyametadbhavatu te kāṅkṣitaṃ puruṣarṣabha /
sarveṣāṃ naḥ kratuphalaṃ dharmaśca pratigṛhyatām //
yayātiruvāca /

nāhaṃ pratigrahadhano brāhmaṇaḥ kṣatriyo'hyaham /
na ca me pravaṇā buddhiḥ parapuṇyavināśane //
nārada uvāca /

etasminneva kāle tu mṛgacaryākramāgatām /
mādhavīṃ prekṣya rājānaste'bhivādyedamabruvan //

kimāgamanakṛtyaṃ te kiṃ kurmaḥ śāsanaṃ tava /
ājñāpyā hi vayaṃ sarve tava putrāstapodhane //
nārada uvāca /

teṣāṃ tadbhāṣitaṃ śrutvā mādhavī parayā mudā /
pitaraṃ samupāgacchadyayātiṃ sā vavanda ca //

spṛṣṭvā mūrdhani tānputrāṃstāpasī vākyamabravīt /
dauhitrāstava rājendra mama putrā na te parāḥ //

ime tvāṃ tārayiṣyanti diṣṭametatpurātanam /
ahaṃ te duhitā rājanmādhavī mṛgacāriṇī //

mayā'pyupacito dharmastato'rdhaṃ pratigṛhyatām /
yasmādrājannarāḥ sarve apatyaphalabhāginaḥ //

tasmādicchanti dauhitrānyathā tvaṃ vasudhādhipa /
nārada uvāca /
tataste pārthivāḥ sarve śirasā jananīṃ tadā //

abhivādya namaskṛtya mātāmahamathābruvan . uccairanupamaiḥ snigdhaiḥ svarairāpūrya medinīm /
mātāmahaṃ nṛpatayastārayanto divaścyutam /
rājāna ūcuḥ /

rājadharmaguṇopetāḥ satyadharmaguṇānvitāḥ /
dauhitrāste vayaṃ rājandivamāroha pārthiva //
nārada uvāca /

athākasmādupagato gālavo'pyāha pārthivam /
tapaso me'ṣṭabhāgena svargamārohatāṃ bhavān //