Mahabharata · Chapter 5.123

sadbhirāropitaḥ svargaṃ pārthivairbhūridakṣiṇaiḥ /
abhyanujñāya dauhitrānyayātirdivamāsthitaḥ //

abhivṛṣṭaśca varṣeṇa nānāpuṣpasugandhinā /
pariṣvaktaśca puṇyena vāyunā puṇyagandhinā //

acalaṃ sthānamāsādya dauhitraphalanirjitam /
karmabhiḥ svairupacito jajvāla parayā śriyā //

upagītopanṛttaśca gandharvāpsarasāṃ gaṇaiḥ /
prītyā pratigṛhītaśca svarge dundubhiniḥsvanaiḥ //

abhiṣṭutaśca vividhairdevarājarṣicāraṇaiḥ /
arcitaścottamārgheṇa daivatairabhinanditaḥ //

prāptaḥ svargaphalaṃ caiva tamuvāca pitāmahaḥ /
nirvṛtaṃ śāntamanasaṃ vacobhistarpayanniva //

catuṣpādastvayā dharmaśrito lokyena karmaṇā /
akṣayastava loko'yaṃ kīrtiścaivākṣayā divi //

punastvayaiva rājarṣe svakṛtena vighātitam /
āvṛtaṃ tamasā cetaḥ sarveṣāṃ svargavāsinām //

yena tvāṃ nābhijānanti tato'jñātosi pātitaḥ /
prītyaiva cāsi dauhitraistāritastvamihāgataḥ //

sthānaṃ ca pratipanno'si karmaṇā svena nirjitam /
acalaṃ śāśvataṃ puṇyamuttamaṃ dhruvamavyayam //
yayātiruvāca /

bhagavansaṃśayo me'sti kaścitaṃ chettumarhasi /
na hyanyamahamarhāmi praṣṭuṃ lokapitāmaha //

bahuvarṣasahasrāntaṃ prajāpālanavardhitam /
anekakratudānaughairārjitaṃ me mahatphalam //

kathaṃ tadalpakālena kṣīṇaṃ yenāsmi pātitaḥ . bhagavanvettha lokāṃśca śāśvatānmama nirmitān /
kathaṃ nu mama tatsarvaṃ vipranaṣṭaṃ mahādyute //
pitāmaha uvāca /

bahuvarṣasahasrāntaṃ prajāpālanavardhitam /
anekakratudānaughairyattvayopārjitaṃ phalam //

tadanenaiva doṣeṇa kṣīṇaṃ yenāsi pātitaḥ /
abhimānena rājendra dhikkṛtaḥ svargavāsibhiḥ //

nāyaṃ mānena rājarṣe na balena na hiṃsayā /
na śāṭhyena na māyābhirloko bhavati śāśvataḥ //

nāvamānyāstvayā rājannadhamotkṛṣṭamadhyamāḥ /
na hi mānapradagdhānāṃ kaścidasti śamaḥ kvacit //

patanārohaṇamidaṃ kathayiṣyanti ye narāḥ /
viṣamāṇyapi te prāptāstariṣyanti na saṃśayaḥ //
nārada uvāca /

eṣa doṣo'bhimānena purā prāpto yayātinā /
nirbadhnatā'timātraṃ ca gālavena mahīpate //

śrotavyaṃ hitakāmānāṃ suhṛdāṃ hitamicchatām /
na kartavyo hi nirbandho nirbandho hi kṣayodayaḥ //

tasmāttvamapi gāndhāre mānaṃ krodhaṃ ca varjaya /
sandhatsva pāṇḍavairvīra saṃrambhaṃ tyaja pārthiva //

sa bhavānsuhṛdāṃ pathyaṃ vaco gṛhṇātu mā'nṛtam /
samarthairvigrahaṃ kṛtvā viṣamastho bhaviṣyasi //

dadāti yatpārthiva yatkarati yadvā tapastapyati yañjuhoti /
na tasya nāśo'sti na cāpakarṣo nānyastadaśnāti sa eva kartā //

idaṃ mahākhyānamanuttamaṃ hitaṃ bahuśrutānāṃ gataroṣarāgiṇām /
samīkṣya loke bahudhā pradhāritaṃ trivargadṛṣṭiḥ pṛthivīmupāśnute //

etatpuṇyatamaṃ rājanyayāteścaritaṃ mahat / yacchrutvā śrāvayitvā ca svargaṃ yāntīha mānavāḥ //