Mahabharata · Chapter 5.120

sa tu rājā punastasyāḥ kartukāmaḥ svayaṃvaram /
upagamyāśramapadaṃ gaṅgāyāmunasaṅgame //

gṛhītamālyadāmāṃ tāṃ rathamāropya mādhavīm /
pūruryaduśca bhaginīmāśrame paryadhāvatām //

nāgayakṣamanuṣyāṇāṃ gandharvamṛgapakṣiṇām /
śailadrumavanaukānāmāsīttatra samāgamaḥ //

nānāpuruṣadeśyānāmīśvaraiśca samākulam /
ṛṣibhirbrahmakalpaiśca samantādāvṛtaṃ vanam //

nirdiśyamāneṣu tu sā vareṣu varavarṇinī /
varānutkramya sarvāstānvaraṃ vṛtavatī vanam //

avatīrya rathātkanyā namaskṛtya ca bandhuṣu /
upagamya vanaṃ puṇyaṃ tapastepe yayātijā //

upavasaiśca vividhairdīkṣābhirniyamaistathā /
ātmano laghutāṃ kṛtvā babhūva mṛgacāriṇī //

vaidūryāṅkurakalpāni mṛdūni haritāni ca /
carantī ślakṣṇaśaṣpāṇi tiktāni madhurāṇi ca //

sravantīnāṃ ca puṇyānāṃ surasāni sucīni ca /
pibantī vārimukhyāni śītāni vimalāni ca //

vaneṣu mṛgarājeṣu vyāghraviproṣiteṣu ca /
dāvāgniviprayukteṣu śūnyeṣu gahaneṣu ca //

carantī hariṇaiḥ sārdhaṃ mṛgīva vanacāriṇī /
cacāra vipulaṃ dharmaṃ brahmacaryeṇa saṃvṛtam //

yayātirapi pūrveṣāṃ rājñāṃ vṛttamanuṣṭhitaḥ /
bahuvarṣasahasrāyuryuyuje kāladharmaṇā //

pururyaduśca dvau vaṃśe vardhamānau narottamau /
tābhbhāṃ pratiṣṭhito loke paraloke ca nāhuṣaḥ //

mahīpate narapatiryayātiḥ svargamāsthitaḥ /
maharṣikalpo nṛpatiḥ svargāgryaphalabhugvibhuḥ //

bahuvarṣasahasrākhye kāle bahuguṇe gate /
rājarṣiṣu niṣaṇṇeṣu mahīyaḥsu mahardhiṣu //

avamene narānsarvāndevānṛṣigaṇāṃstathā /
yayātirmūḍhavijñāno vismayāviṣṭacetanaḥ //

tatastaṃ bubudhe devaḥ śakro balaniṣūdanaḥ /
te ca rājarṣayaḥ sarve dhigdhigityevamabruvan //

vicāraśca samutpanno nirīkṣya nahuṣātmajam /
ko'nvayaṃ kasya vā rājñaḥ kathaṃ vā svargamāgataḥ //

karmaṇā kenasiddho'yaṃ kva vā'nena tapaścitam /
kathaṃ vā jñāyate svarge kena vā jñāyate'pyuta //

evaṃ vicāsyantaste rājānaṃ svargavāsinaḥ /
dṛṣṭvā papracchuranyonyaṃ yayātiṃ nṛpatiṃ prati //

vimānapālāḥ śataśaḥ svargadvārābhirakṣiṇaḥ /
pṛṣṭā āsanapālāśca na jānīmetyathā'bruvan //

sarve te hyāvṛtajñānā nābhyajānanta taṃ nṛpam /
sa muhūrtādatha nṛpo hataujāścābhavattadā //