Mahabharata · Chapter 5.119

gālavaṃ vainateyo'tha prahasannidamabravīt /
diṣṭyā kṛtārthaṃ paśyāmi bhavantamiha vai dvija //

gālavastu vacaḥ śrutvā vainateyena bhāṣitam /
caturbhāgāvaśiṣṭaṃ tadācakhyau kāryamasya hi //

suparṇastvabravīdenaṃ gālavaṃ vadatāṃ varaḥ /
prayatnaste na kartavyo naiṣa sampatsyate tava //

purā hi kānyakubje vai gādheḥ satyavatīṃ sutām /
bhāryārthe varayatkanyāmṛcīkastena bhāṣitaḥ //

ekataḥśyāmakarṇānāṃ hayānāṃ candravarcasām /
bhagavandīyatākaṃ mahyaṃ mahasramiti gālava //

ṛcīkastu tathetyuktvā varuṇasyālayaṃ gataḥ /
aśvatīrthe hayām̐llabdhvā dattavānpārthivāya vai //

iṣṭvā te puṇḍarīkeṇa dattā rājñā dvijātiṣu /
tebhyo dve dve śate krītvā prāpte taiḥ pārthivaistadā //

aparāṇyapi catvāri śatāni dvijasattama /
nīyamānāni santāre hṛtānyāsannitastataḥ //

evaṃ na śakyamaprāpyaṃ prāptuṃ gālava karhicit /
imāmaśvaśatābhyāṃ vai dvābhyāṃ tasmai nivedaya //

viśvāmitrāya dharmātmanṣaṅbhiraśvaśataiḥ saha /
tato'si gatasammohaḥ kṛtakṛtyo dvijottama //

gālavastaṃ tathetyuktvā suparṇasahitastataḥ /
ādāyāśvāṃśca kanyāṃ ca viśvāmitrapupāgamat //

aśvānāṃ kāṅkṣitārthānāṃ ṣaḍimāni śatāni vai /
śatadvayena kanyeyaṃ bhavatā pratigṛhyatām //

asyāṃ rājarṣibhiḥ putrā jātā vai dhārmikāstrayaḥ /
caturthaṃ janayatvekaṃ bhavānapi narottamam //

pūrṇānyevaṃ śatānyaṣṭau turagāṇāṃ bhavantu te /
bhavato hyanṛṇo bhūtvā tapaḥ kuryāṃ yathāsukham //

viśvāmitrastu taṃ dṛṣṭvā gālavaṃ saha pakṣiṇā /
kanyāṃ ca tāṃ varārohāmidamityabravīdvacaḥ //

kimiyaṃ pūrvameveha na dattā mama gālava /
putrā mamaiva catvāro bhaveyuḥ kulabhāvanāḥ //

pratigṛhṇāmi te kanyāmekaputraphalāya vai /
aśvāścāśramamāsādya carantu mama sarvaśaḥ //
nārada uvāca /

sa tayā ramamāṇo'tha viśvāmitro mahādyutiḥ /
ātmajaṃ janayāmāsa mādhavīputramaṣṭakam //

jātamātraṃ sutaṃ taṃ ca viśvāmitro mahāmuniḥ /
saṃyojyārthaistathā dharmairaśvaistaiḥ samayojayat //

athāṣṭakaḥ puraṃ prāyāttadā somapuraprabham /
niryātya kanyāṃ śiṣyāya kauśikopi vanaṃ yayau //

gālavopi suparṇena saha niryātya dakṣiṇām /
manasā'tipratītena kanyāmidamuvāca ha //

jāto dānapatiḥ putrastvayā śūrastathā'paraḥ /
satyadharmarataścānyo yajvā cāpi tathā'paraḥ //

tadāgaccha varārohe tāritaste pitā sutaiḥ /
catvāraścaiva rājānastathā cāhaṃ sumadhyame //
nārada uvāca /

gālavastvabhyanujñāya suparṇaṃ pannagāśanam /
piturniryātya tāṃ kanyāṃ prayayau vanameva ha //