Mahabharata · Chapter 5.108

anuśiṣṭo'smi devena gālava jñānayoninā /
brūhi kāmaṃ tu kāṃ yāmi draṣṭuṃ prathamamo diśam //

pūrvāṃ vā dakṣiṇāṃ vāhamathavā paścimāṃ diśam /
uttarāṃ vā dvijaśreṣṭha kuto gacchāmi gālava //

yasyāmudayate pūrvaṃ sarvalokaprabhāvanaḥ /
savitā yatra sandhyāyāṃ sādhyānāṃ vartate tapaḥ //

yasyāṃ pūrvaṃ matirjātā yayā vyāptamidaṃ jagat /
cakṣuṣī yatra dharmasya yatra caiṣa pratiṣṭhitaḥ //

kṛtaṃ yato hutaṃ havyaṃ sarpate sarvatodiśam //
etad्dvāraṃ dvijaśreṣṭha divasasya tathā'dhvanaḥ //

atra pūrvaṃ prasūtā vai dākṣāyaṇyaḥ prajāḥ striyaḥ /
yasyāṃ diśi pravṛddhāśca kaśyapasyātmasambhavāḥ //

adomūlā surāṇāṃ śrīryatra śakro'bhyaṣicyata /
surarājyena viprarṣe devaiścātra tapaścitam //

etasmātkāraṇādbrahmanpūrvetyeṣā digucyate /
yasmātpūrvatare kāle pūrvamevāvṛtāsuraiḥ //

ata eva ca sarveṣāṃ pūrvāmāśāṃ pracakṣate /
pūrvaṃ sarvāṇi kāryāṇi daivāni sukhamīpsatā //

atra vedāñjagau pūrvaṃ bhagavām̐llokabhāvanaḥ /
atraivoktā savitrāsītsāvitrī brahmavādiṣu //

atra dattāni sūryeṇa yajūṃṣi dvijasattama /
atra labdhavaraḥ somaḥ suraiḥ kratuṣu pīyate //

atra tṛptā hutavahāḥ svāṃ yonimupabhuñjate /
atra pātālamāśritya varuṇaḥ śriyamāpa ca //

atra pūrvaṃ vasiṣṭhasya paurāṇasya dvijarṣabha /
sūtiścaiva pratiṣṭhā ca nidhanaṃ ca prakāśate //

oṅkārasyātra jāyante sṛtayo daśatīrdaśa /
pibanti munayo yatra havirdhūmaṃ sma dhūmapāḥ //

prokṣitā yatra bahavo varāhādyā mṛgā vane /
śakreṇa yajñabhāgārthe daivateṣu prakalpitāḥ //

atrāhitāḥ kṛtaghnāśca mānuṣāścāsurāśca ye /
udayaṃstānhi sarvānvai krodhāddhanti vibhāvasuḥ //

etaddvāraṃ trilokasya svargasya ca sukhasya ca /
eṣa pūrvo diśāṃ bhāgo viśāvo'tra yadīcchasi //

priyaṃ kāryaṃ hi me tasya yasyāsmi vacane sthitaḥ /
brūhi gālava yāsyāmi śṛṇu cāpyaparāṃ diśam //