Mahabharata · Chapter 5.109

iyaṃ vivasvadā pūrvaṃ śrautena vidhinā kila /
gurave dakṣiṇā dattā dakṣiṇetyucyate ca dik //

atra lokatrayasyāsya pitṛpakṣaḥ pratiṣṭhitaḥ /
atroṣmapāṇāṃ devānāṃ nivāsaḥ śrūyate dvija //

atra viśve sadā devāḥ pitṛbhiḥ sārdhamāsate /
ijyamānāḥ sma lokeṣu samprāptāstulyabhāgatām //

etaddvitīyaṃ devasya dvāramācakṣate dvija /
truṭiśo lavaśaścāpi gaṇyate kālaniścayaḥ //

atra devarṣayo nityaṃ pitṛlokarṣayastathā /
tathā rājarṣayaḥ sarve nivasanti gatavyathāḥ //

atra dharmaśca satyaṃ ca karma cātra nigadyate /
gatireṣā dvijaśreṣṭha karmaṇāmavasāyinām //

eṣā diksā dvijaśreṣṭha yāṃ sarvaḥ pratipadyate /
vṛtā tvanavabodhena sukhaṃ tena na gamyate //

nairṛtānāṃ sahasrāmi bahūnyatra dvijarṣabha /
sṛṣṭāni pratikūlāni draṣṭavyānyakṛtātmabhiḥ //

atra mandarakuñjeṣu viprarṣisadaneṣu ca /
gāyanti gāthā gandharvāścittabuddhiharā dvija //

atra sāmāni gāthābhiḥ śrutvā gītāni raivataḥ /
gatadāro gatāmātyo gatarājyo vanaṃ gataḥ //

atra sāvarminā caiva yavakrītātmajena ca /
maryādā sthāpitā brahmanyāṃ sūryo nātivartate //

atra rākṣasarājena paulastyena mahātmanā /
rāvaṇena tapaḥ kṛtvā surebhyo'maratā vṛtā //

atra vṛttena vṛtro'pi śakraśatrutvameyivān /
atra sarvāsavaḥ prāptāḥ punargacchanti pañcadhā //

atra duṣkṛtakarmāṇo narāḥ pacyanti gālava /
atra vaitaraṇī nāma nadī vaitaraṇairvṛtā //

atra gatvā sukhasyāntaṃ duḥkhasyāntaṃ prapadyate /
atrāvṛtto dinakaraḥ surasaṃ kṣarate payaḥ //

kāṣṭhāṃ cāsādya vāsiṣṭhīṃ himamutsṛjate punaḥ /
atrāhaṃ gālava purā kṣudhā'rtaḥ paricintayan //

labdhavānyudhyamānau dvau bṛhantau gajakacchapau /
atra cakradhanurnāma sūryāñjāto mahānṛṣiḥ //

viduryaṃ kapilaṃ devaṃ yenārtāḥ sagarātmajāḥ /
atra siddhāḥ śivā nāma brāhmaṇā vedapāragāḥ //

adhītya sakalānvedām̐llebhire mokṣamakṣayam /
atra bhogavatī nāma purī vāsukipālitā //

takṣakeṇa ca nāgena tathaivairāvatena ca /
atra niryāṇakāle'pi tamaḥ samprāpyate mahat //

abhedyaṃ bhāskareṇāpi svayaṃ vā kṛṣṇavartmanā . eṣa tasyāpi te mārgaḥ paricārasya gālava /
brūhi me yadi gantavyaṃ pratīcīṃ śṛṇu cāparām //