Mahabharata · Chapter 5.107

evamuktastadā tena viśvāmitreṇa dhīmatā /
nāste na śete nāhāraṃ kurute gālavastadā //

tvagasthibhūto hariṇāścintāśokaparāyaṇaḥ / śocamāno'timātraṃ sa dahyamānaśca manyunā /
gālavo duḥkhito duḥkhādvilalāpa suyodhana //

kutaḥ puṣṭāni mitrāṇi kuto'rthāḥ sañcayaḥ kṛtaḥ /
hayānāṃ candraśubhrāṇāṃ śatānyaṣṭau kuto mama //

kuto me bhojane śraddhā sukhaśraddhā kutaśca me /
śraddhā me jīvitasyāpi chinnā kiṃ jīvitena me //

ahaṃ pāre samudrasya pṛthivyā vā paraṃ parāt /
gatvā'tmānaṃ vimuñcāmi kiṃ phalaṃ jīvitena me //

adanasyākṛtārthasya tyaktasya vividhaiḥ phalaiḥ /
ṛṇaṃ dhārayamāṇasya kutaḥ sukhamanīhayā //

suhṛdāṃ hi dhanaṃ bhuktvā kṛtvā praṇayamīpsitam /
pratikartumaśaktasya jīvitānmaraṇaṃ varam //

pratiśrutya kariṣyeti kartavyaṃ tadakurvataḥ /
mithyāvacanadagdhasya iṣṭāpūrtaṃ praṇaśyati //

na rūpamanṛtasyāsti nānṛtasyāsti santatiḥ /
nānṛtasyādhipatyaṃ ca kuta eva gatiḥ śubhā //

kutaḥ kṛtaghnasya yaśaḥ kutaḥ sthānaṃ kutaḥ sukham /
aśraddheyaḥ kṛtaghno hi kṛtaghne nāsti niṣkṛtiḥ //

na jīvatyadhanaḥ pāpaḥ kutaḥ pāpasya tantraṇam /
pāpo dhruvamavāpnoti vināśaṃ nāśayankṛtam //

so'haṃ pāpaḥ kṛtaghnasya kṛpaṇaścānṛto'pi ca /
guroryaḥ kṛtakāryaḥ saṃstatkaromi na bhāṣitam //

so'haṃ prāṇānvimokṣyāmi kṛtvā yatnamanuttamam /
arthitā na mayā kācitkṛtapūrvā divaukasām //

mānayanti ca māṃ sarve tridaśā yajñasaṃstare / ahaṃ tu vibudhaśreṣṭhaṃ devaṃ tribhuvaneśvaram /
viṣṇuṃ gacchāmyahaṃ kṛṣṇaṃ gatiṃ gatimatāṃ varam //

bhogā yasmātpratiṣṭhante vyāpya sarvānsurāsurān /
praṇato draṣṭumicchāmi kṛṣṇaṃ yoginamavyayam //

evamukte sakhā tasya garuḍo vinatātmajaḥ /
darśayāmāsa taṃ prāha saṃhṛṣṭaḥ priyakāmyayā //

sahṛdbhavānmama mataḥ suhṛdāṃ ca mataḥ suhṛt /
īpsitenābhilāṣeṇa yoktavyo vibhave sati //

vibhavaścāsti me vipra vāsavāvarajo dvija /
pūrvamuktastvadarthaṃ ca kṛtaḥ kāmaśca tena me //

sa bhavānetu gacchāva nayiṣye tvāṃ yathāsukham . deśaṃ pāraṃ pṛthivyā vā gaccha gālava mā ciram //