Mahabharata · Chapter 5.105

garuḍastatra śuśrāva yathāvṛttaṃ mahābalaḥ /
āyuḥpradānaṃ śakreṇa kṛtaṃ nāgasya bhārata //

pakṣavātena mahatā ruddhvā tribhuvanaṃ khagaḥ /
suparṇaḥ paramakruddho vāsavaṃ samupādravat //
garuḍa uvāca /

bhagavankimavajñānādvṛttiḥ pratihatā mama /
kāmakāravaraṃ dattvā punaścalitavānasi //

nisargātsarvabhūtānāṃ sarvabhūteśvareṇa me /
āhāro vihito dhātrā kimarthaṃ vāryate tvayā //

vṛtaścaiṣa mahānāgaḥ sthāpitaḥ samayaśca me /
anena ca mayā deva bhartavyaḥ prasavo mahān //

etasmiṃstu tathābhūte nānyaṃ hiṃsitumutsahe /
krīḍase kāmakāreṇa devarāja yathecchakam //

so'haṃ prāṇānvimokṣyāmi tathā parijano mama /
ye ca bhṛtyā mama gṛhe prītimānbhava vāsava //
kaṇva uvāca /

śrutvā suparṇavacanaṃ sumukho durmukhastadā / tyaktvā rūpaṃ vivarṇastu sarparūpadharo'bhavat /
gatvā viṣṇusamīpaṃ tu pādapīṭhaṃ samāśliṣat //
indra uvāca /

na matkṛtaṃ vainateya na māṃ kroddhuṃ tvamarhasi / dattābhayaḥ sa sumukho viṣṇunā prabhaviṣṇunā /
śratvā purandareṇoktamuvāca vinatāsutaḥ //

etaccaivāhamarhāmi bhūyaśca balavṛtrahan /
trailokyasyeśvaro yo'haṃ parabhṛtyatvamāgataḥ //

tvayi tiṣṭhati deveśa na viṣṇuḥ kāraṇaṃ mama /
trailokyarājarājyaṃ hi tvayi vāsava śāśvatam //

mamāpi dakṣasya sutā jananī kaśyapaḥ pitā /
ahamatyutsahe lokānsamantādvoḍhumojasā //

asahyaṃ sarvabhūtānāṃ mamāpi vipulaṃ balam /
mayā'pi sumahatkarma kṛtaṃ daiteyavigrahe //

śrutaśrīḥ śrutasenaśca vivasvānrocanāmukhaḥ /
prasrutaḥ kālakākṣaśca mayā'pi ditijā hatāḥ //

yattu dhvajasthānagato yatnātparicarāmyaham /
vahāmi caivānujaṃ te tena māmavamanyase //

ko'nyo bhārasaho hyasti ko'nyosti balavattaraḥ /
mayā yo'haṃ viśiṣṭaḥ sanvahāmīmaṃ sabāndhavaṃ //

avajñāya tu yatte'haṃ bhojanādvyaparopitaḥ /
tena me gauravaṃ naṣṭaṃ tvattaścāsmācca vāsava //

adityāṃ ya ime jātā balavikramaśālinaḥ /
tvameṣāṃ kila sarveṣāṃ balena balavattaraḥ //

so'haṃ pakṣaikadeśena vahāmi tvāṃ gataklamaḥ /
vimṛśa tvaṃ śanaistāta ko'nvatra balavāniti //
kaṇva uvāca /

sa tasya vacanaṃ śrutvā khagasyodarkadāruṇam /
akṣobhyaṃ kṣobhayaṃstārkṣyamuvāca rathacakrabhṛt //

garutmanmanyasetmānaṃ balavantaṃ sudurbalam /
alamasmatsamakṣaṃ te stotumātmānamaṇḍaja //

trailokyamapi me kṛtsnamaśaktaṃ dehadhāraṇe /
ahamevātmanātmānaṃ vahāmi tvāṃ ca dhāraye //

na tvaṃ vahasi māṃ dorbhyāṃ moghaṃ tava vikatthanam . imaṃ tāvanmamaikaṃ tvaṃ bāhuṃ savyetaraṃ vaha /
yadyenaṃ dhārayasyekaṃ saphalaṃ te vikatthitam //

ityuktvā bhagavāṃstasya skandhe bāhuṃ samāsajat . āropitaṃ samudvoḍhuṃ bhāraṃ taṃ nāśakadbalāt /
nipapāta sa bhārārto vihalo naṣṭacetanaḥ //

yāvānhi bhāraḥ kṛtsnāyāḥ pṛthivyāḥ parvataiḥ saha /
ekasyā dehaśākhāyāstāvadbhāramamanyata //

na tvenaṃ pīḍayāmāsa balena balavattaraḥ /
tato hi jīvitaṃ tasya na vyanīnaśadacyutaḥ //

vyāttāsyaḥ srastakāyaśca vicetā vihvalaḥ khagaḥ /
mumoca patrāṇi tadā gurubhāraprapīḍitaḥ //

sa viṣṇuṃ śirasā pakṣī praṇamya vinatāsutaḥ /
vicetā vihvalo dīnaḥ kiñcidvacanamabravīt //

bhagavam̐llokasārasya sadṛśena vapuṣmatā /
bhujena svairamuktena niṣpiṣṭo'smi mahītale //

kṣantumarhasi me deva vihvalasyālpacetasaḥ /
baladāhavidagdhasya pakṣiṇo dhvajavāsinaḥ //

na hi jñātaṃ balaṃ deva mayā te parama vibho /
tena manyāmyahaṃ vīryamātmano na samaṃ paraiḥ //
kaṇva uvāca /

tataścakre sa bhagavānprasādaṃ vai garutmataḥ /
maivaṃ bhūya iti snehāttadā cainamuvāca ha //

pādāṅguṣṭhena cikṣepa sumukhaṃ garuḍorasi /
tataḥ prabhṛti rājendra sahasarpeṇa vartate //

evaṃ viṣṇubalākrānto garvanāśamupāgataḥ /
garuḍo balavānrājanvainateyo mahāyaśāḥ //
kaṇva uvāca /

tathā tvamapi gāndhāre yāvatpāṇḍusutānraṇe /
nāsādayasi tānvīrāṃstāvajjīvasi putraka //

bhīmaḥ praharatāṃ śreṣṭho vāyuputro mahābalaḥ /
dhanañjayaścendrasuto na hanyātāṃ tu kaṃ raṇe //

viṣṇurvāyuśca śakraśca dharmastau cāśvināvubhau /
ete devāstvayā kena hetunā vīkṣituṃ kṣamāḥ //

tadalaṃ te virodhena śamaṃ gaccha nṛpātmaja /
vāsudevena tīrthena kulaṃ rakṣitumarhasi //

pratyakṣadarśī sarvasya nārado'yaṃ mahātapāḥ /
māhātmyasya tadā viṣṇoḥ so'yaṃ cakragadādharaḥ //
vaiśampāyana uvāca /

duryodhanastu tacchrutvā niśvasanbhṛkuṭīmukhaḥ /
rādheyamabhisamprekṣya jahāsa svanavattadā //

kadarthīkṛtya tadvākyamṛṣeḥ kaṇvasya durmatiḥ /
ūruṃ gajakarākāraṃ tāḍayannidamabravīt //

yathaiveśvarasṛṣṭo'smi yadbhāvi yā ca me gatiḥ /
tathā maharṣe vartāmi kiṃ pralāpaḥ kariṣyati //

tataḥ kaṇvo'bravītkruddho duryodhanamapaṇḍitam . yasmādūkaṃ tāḍayasi ūrau mṛtyurbhaviṣyati //