Mahabharata · Chapter 5.104

mātalervacanaṃ śrutvā nārado munisattamaḥ /
abravīddevarājaṃ tamāryakaṃ kurunandana //

sūto'yaṃ mātalirnāma śakrasya dayitaḥ suhṛt /
śuciḥ śīlaguṇopetastejasvī vīryavānbalī //

śakrasyāyaṃ sakhā caiva mantrī sārathireva ca /
alpāntaraprabhāvaśca vāsavena raṇe raṇe //

ayaṃ harisahasreṇa yuktaṃ jaitraṃ rathottamam /
devāsureṣu yuddheṣu manasaiva niyacchati //

anena vijitānaśvairdorbhyāṃ jayati vāsavaḥ /
anena balabhitpūrvaṃ prahṛte praharatyuta //

asya kanyā varārohā rūpeṇāsadṛśī bhuvi /
satyaśīlaguṇopetā guṇakeśīti viśrutā //

tasyāsya yatnāccaratastrailokyamamaradyute /
sumukho bhavataḥ pautro rocate duhituḥ patiḥ //

yadi te rocate samyagbhujagottama mā ciram /
kriyatāmāryaka kṣipraṃ buddhiḥ kanyāparigrahe //

yathā viṣṇukule lakṣmīryathā svāhā vibhāvasoḥ /
kule tava tathaivāstu guṇakeśī sumadhyamā //

pautrasyārthe bhavāṃstasmādguṇakeśīṃ pratīcchatu /
sadṛśīṃ pratirūpasya vāsavasya śacīmiva //

pitṛhīnamapi hyenaṃ guṇato varayāmahe /
bahumānācca bhavatastathaivairāvatasya ca //

sumukhasya guṇaiścaiva śīlaśaucadamādibhiḥ . abhigamya svayaṃ kanyāmayaṃ dātuṃ samudyataḥ /
mātalistasya sammānaṃ kartumarho bhavānapi //
kaṇva uvāca /

sa tu dīnaḥ prahṛṣṭaśca prāha nāradamāryakaḥ /
vriyamāṇe tathā pautre putre ca nidhanaṃ gate //
āryaka uvāca /

manye naitadbahumataṃ maharṣe vacanaṃ tava / sakhā śakrasya saṃyuktaḥ kasyāyaṃ nepsito bhavet /
kāraṇasya tu daurbalyāccintayāmi mahāmune //

asya dehakarastāta mama putro mahādyute /
bhakṣito vainateyena duḥkhārtāstena vai vayam //

punareva ca tenoktaṃ vainateyena gacchatā /
māsenānyena sumukhaṃ bhakṣayiṣya iti prabho //

dhruvaṃ tathā tadbhavitā jānīmastasya niścayam /
tena harṣaḥ pranaṣṭo me suparṇavacanena vai //
kaṇva uvāca /

mātalistvabravīdenaṃ buddhiratra kṛtā mayā /
jāmātṛbhāvena vṛtaḥ sumukhastava putrajaḥ //

so'yaṃ mayā ca sahito nāradena ca pannagaḥ /
trilokeśaṃ surapatiṃ gatvā paśyatu vāsavam //

śeṣeṇaivāsya kāryeṇa prajñāsvāmyahamāyuṣaḥ /
suparṇasya vighāte ca prayatiṣyāmi sattama //

sumukhaśca mayā sārdhaṃ deveśamigacchatu /
kāryasaṃsādhanārthāya svasti te'stu bhujaṅgama //
kaṇva uvāca /

āryakeṇābhyanujñātā gamyatāmiti bhārata / tataste sumukhaṃ gṛhya sarva eva mahaujasaḥ /
dadṛśuḥ śakramāsīnaṃ devarājaṃ mahādyutim //

saṅgatyā tatra bhagavānviṣṇurāsīccaturbhujaḥ /
tatastatsarvamācakhyau nārado mātaliṃ prati //
vaiśampāyana uvāca /

tataḥ purandaraṃ viṣṇuruvāca bhuvaneśvaram /
amṛtaṃ dīyatāmasmai kriyatāmamaraiḥ samaḥ //

mātalirnāradaścaiva sumukhaścaiva vāsava /
labhantāṃ bhavataḥ kāmātkāmametaṃ yathepsitam //

purandaro'tha sañcintya vainateyaparākramam /
viṣṇumevābravīdenaṃ bhavāneva dadātviti //
viṣṇuruvāca /

īśastvaṃ sarvalokānāṃ carāṇāmacarāśca ye /
tvayā dattamadattaṃ kaḥ kartumutsahate vibho //

prādācchakrastatastasmai pannagāyāyuruttamam /
na tvenamamṛtaprāśaṃ cakāra balavṛtrahā //

labdhvā varaṃ tu sumukhaḥ sumukhaḥ sambabhūva ha /
kṛtadāro yathākāmaṃ jagāma ca gṛhānprati //

nāradastvāryakaścaiva kṛtakāryau mudā yutau /
abhijagmaturabhyarcya devarājaṃ mahādyutim //