Mahabharata · Chapter 5.102
idaṃ rasātalaṃ nāma saptamaṃ pṛthivītalam /
yatrāste surabhirmātā gavāmamṛtasambhavā //
kṣarantī satataṃ kṣīraṃ pṛthivīsārasambhavam /
ṣaṇṇaṃ rasānāṃ sāreṇa rasamekamanuttamam //
amṛtenābhitṛptasya sāramudgirataḥ purā /
pitāmahasya vadanādudatiṣṭhadaninditā //
yasyāḥ kṣīrasya dhārāyā nipatantyā mahītale /
hradaḥ kṛtaḥ kṣīranidhiḥ pavitraṃ paramucyate //
puṣpitasyeva phenena paryantamanuveṣṭitam /
pibanto nivasantyatra phenapā munisattamāḥ //
phenapā nāma te khyātāḥ phenāhārāśca mātale /
ugre tapasi vartante yeṣāṃ bibhyati devatāḥ //
asyāścatasro dhenvo'nyā dikṣu sarvāsu mātale /
nivasanti diśāṃ pālyo dhārayantyodiśaḥsma tāḥ //
pūrvāṃ diśaṃ dhārayate surūpā nāma saurabhī /
dakṣiṇāṃ haṃsikā kanāma dhārayatyaparāṃ diśam //
paścimā vāruṇī dikca dhāryate vai subhadrayā /
mahānubhāvayā nityaṃ mātale viśvarūpayā //
sarvakāmadughā nāma dhenurdhārayate diśam /
uttarāṃ mātale dharmyāṃ tathailavilasaṃśritām //
āsāṃ ta payasā miśraṃ payo nirmathya sāgare /
manthānaṃ mandaraṃ kṛtvā devairasurasaṃhitaiḥ //
addhṛtā vāruṇī lakṣmīramṛtaṃ cāpi mātale /
uccaiḥśravāścāśvarājo maṇiratnaṃ ca kaustubham //
sudhāhāreṣu ca sudhāṃ svadhābhojiṣu ca svadhām /
amṛtaṃ cāmṛtāśeṣu surabhī kṣarate payaḥ //
atra gāthā purā gītā rasātalanivāsibhiḥ /
paurāṇī śrūyate loke gīyate yā manīṣibhiḥ //
na nāgaloke na svarge na vimāne triviṣṭape /
parivāsaḥ sukhastādṛk rasātalatale yathā //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0