Mahabharata · Chapter 5.101

ayaṃ lokaḥ suparṇānāṃ pakṣiṇāṃ pannagāśinām /
vikrame gamane bhāre naiṣāmasti pariśramaḥ //

vainateyasutaiḥ sūta paṅbhistatamidaṃ kulam /
sumukhena sunāmnā ca sunetreṇa suvarcasā //

surucā pakṣirājena subalena ca mātale /
vardhitāni prasṛtyā vai vinātākulakartṛbhiḥ //

pakṣirājābhijātyānāṃ sahasrāṇi śatāni ca /
kaśyapasya tato vaṃśe jātairbhūtivivardhanaiḥ //

sarve hyete śriyā yuktāḥ sarve śrīvatsalakṣaṇāḥ /
sarve śriyamabhīpsanto dhārayanti balānyuta //

karmaṇā kṣatriyāścaite nirghṛṇā bhogibhojinaḥ /
jñātisaṅkṣayakartṛtvādbrāhmaṇyaṃ na labhanti vaiḥ //

nāmāni caiṣāṃ vakṣyāmi yathāprādhānyataḥ śrṛṇu /
mātale ślāghyametaddhi kulaṃ viṣṇuparigraham //

daivataṃ viṣṇureteṣāṃ viṣṇureva parāyaṇam /
hṛdi caiṣāṃ sadā viṣṇurviṣṇureva sadā gatiḥ //

suvarṇacūḍo nāgāśī dāruṇaścaṇḍatuṇḍakaḥ /
anilaścānalaścaiva viśālākṣo'tha kuṇḍalī //

paṅkajidvajraviṣkambho vainateyo'tha vāmanaḥ /
vātavego diśācakṣurnimeṣo'nimiṣastathā //

trirāvaḥ saptarāvaśca vālmīkirdīpakastathā /
daityadvīpaḥ sariddvīpaḥ sārasaḥ padmaketanaḥ //

sumukhaścitraketuśca citrabarhastathā'naghaḥ /
meṣahṛtkumudo dakṣaḥ sarpāntaḥ somabhojanaḥ //

gurubhāraḥ kapotaśca sūryanetraścirāntakaḥ /
viṣṇudharmā kumāraśca paribarho haristathā //

susvaro madhuparkaśca hemavarṇastathaiva ca /
mālayo mātariśvā ca niśākaradivākarau //

ete pradeśamātreṇa mayoktā garuḍātmajāḥ /
prādhānyataste yaśasā kīrtitāḥ prāṇinaścaye //

yadyatra na ruciḥ kācidehi gacchāva mātale /
taṃ nayiṣyāmi deśaṃ tvāṃ varaṃ yatropalapsyase //