Mahabharata · Chapter 5.100

hiraṇyapuramityetatkhyātaṃ puravaraṃ mahat /
daityānāṃ dānavānāṃ ca māyāśatavicāriṇām //

analpena prayatnena nirmitaṃ viśvakarmaṇā /
mayena manasā sṛṣṭaṃ pātālatalamāśritam //

atra māyāsahasrāṇi vavikurvāṇā mahaujasaḥ /
dānavā nivasanti sma śūrā dattavarāḥ purā //

naite śakreṇa nānyena yamena varuṇena vā /
śakyante vaśamānetuṃ tathaiva dhanadena ca //

asurāḥ kālakhañjāśca tathā vuṣṇupadodbhavāḥ /
nairṛtā yātudhānāśca brahmapādodbhavāśca ye //

daṃṣṭriṇo bhīmavegāśca vātavegaparākramāḥ /
māyāvīryopasampannā nivasantyatra mātale //

nivātakavacā nāma dānavā yuddhadurmadāḥ /
jānāsi ca yathā śakro naitāñśakroti bādhituṃ //

bahuśo mātale tvaṃ ca tava putraśca gomukhaḥ /
nirbhagno devarājaśca sahaputraḥ śacīpatiḥ //

paśya veśmāni raukmāṇi mātale rājatāni ca /
karmaṇā vidhiyuktena yuktānyupagatāni ca //

vaidūryamaṇicitrāṇi pravālarucirāṇi ca /
arkasphaṭikaśubhrāṇi vajrasāroñjvalāni ca //

pārthivānīva cābhāsti padmarāgamayāni ca /
śailānīva ca dṛśyante dāravāṇīva cāpyuta //

sūryarūpāṇi cābhānti dīptāgnisadṛśāni ca /
maṇijālavicitrāṇi prāṃśūni nibiḍāni ca //

naitāni śakyaṃ nirdeṣṭu rūpato dravyatastathā /
guṇataścaiva siddhāni pramāṇaguṇavanti ca //

ākrīḍānpaśya daityānāṃ tathaiva śayanānyuta /
ratnavanti mahārhāṇi bhājanānyāsanāni ca //

jaladābhāṃstathā śailāṃstoyaprasravaṇāni ca /
kāmapuṣpaphalāṃścāpi pādapānkāpacāriṇaḥ //

mātale kaścidatrāpi ruciraste varo bhavet /
athavā'nyāṃ diśaṃ bhūmergacchāva yadi manyase //

mātalistvabravīdenaṃ bhāṣamāṇaṃ tathāvidham /
devarṣe naiva me kāryaṃ vipriyaṃ tridivaukasām //

nityānuṣaktavairā hi bhrātaro devadānavāḥ /
parapakṣeṇa sambandhaṃ rocayiṣyāmyahaṃ katham //

anyatra sādhu gacchāva draṣṭuṃ nārhāmi dānavān /
jānāmi tava cātmānaṃ hiṃsātmakamanaṃ tathā //