Mahabharata · Chapter 5.99

etattu nāgalokasya nābhisthāne sthitaṃ puram /
pātālamiti vikhyātaṃ daityadānavasevitam //

idamadbhiḥ samaṃ prāptā ye kecidbhuvi jaṅgamāḥ /
praviśanto mahānādaṃ nadanti bhayapīḍitāḥ //

atrāsuro'gniḥ satataṃ dīpyate vāribhojanaḥ /
vyāpāreṇa dhṛtātmānaṃ nibaddhaṃ samabudhyata //

atrāmṛtaṃ suraiḥ pītvā nihitaṃ nihatāribhiḥ //
ataḥ somasya hāniśca vṛddhiścaiva pradṛśyate //

atrādityo hayaśirāḥ kāle parvaṇi parvaṇi /
uttiṣṭhati suvarṇākhyo vāgbhirāpūrayañjagat //

yasmādalaṃ samastāstāḥ patanti jalamūrtayaḥ /
tasmātpātālamityeva khyāyate puramuttamam //

airāvaṇo'smātsalilaṃ gṛhītvā jagato hitaḥ /
megheṣvāmuñcate śītaṃ yanmahendraḥ pravarṣati //

airāvato nāgarājo vāmanaḥ kumudo'ñjanaḥ /
prasūtāḥ supratīkasya vaṃśe vāraṇasattamāḥ //

atra nānāvidhākārāstimayo naikarūpiṇaḥ /
apsu somaprabhāṃ pītvā vasanti jalacāriṇaḥ //

atra sūryāṃśubhirbhinnāḥ pātālatalamāśritāḥ /
mṛtā hi divase sūta punarjīvanti vai niśi //

udayannityaśaścātra candramā raśmibāhubhiḥ /
amṛtaṃ spṛśya saṃsparśātsañjīvayatidehinaḥ //

atra te'dharmaniratā baddhāḥ kālena pīḍitāḥ /
daiteyā nivasanti sma vāsavena hṛtaśriyaḥ //

atra bhūtapatirnāma sarvabhūtamaheśvaraḥ /
bhūtaye sarvabhūtānāmacarattapa uttamam //

atra govratino viprāḥ svādhyāyāmnāyakarśitāḥ /
tyaktaprāṇā jitasvargā nivasanti maharṣayaḥ //

yatratatraśayo nityaṃ yenakenacidāśitaḥ /
yenakenacidācchannaḥ sa govrata ihocyate //

paśya yadyatra te kaścidrocate guṇato varaḥ /
varayiṣyāmi taṃ gatvā yatnamāsthāya mātale //

aṇḍametañjale nyastaṃ dīpyamānamiva śriyā /
āprajānāṃ nisargādvai nodbhidyati na sarpati //

nāsya jātiṃ nisargaṃ vā kathyamānaṃ śrṛṇomi vai /
pitaraṃ mātaraṃ cāpi nāsya jānāti kaścana //

ataḥ kila mahānagnirantakāle samutthitaḥ /
dhakṣyate mātale sarvaṃ trailokyaṃ sacarācaram //

mātalistvabravīcchrutvā nāradasyātha bhāṣitam /
na me'tra rocate kaścidanyato vraja māciram //