Mahabharata · Chapter 4.75

yadyeṣa rājā kauravyaḥ kuntīputro yudhiṣṭhiraḥ /
katamo'syārjuno bhrātā bhīmaśca katamo balī //

nakulaḥ sahadevo vā draupadī vā yaśasvinī /
yadā hyakṣairjitā hyete nāntarā śrūyate kathā //
arjuna uvāca /

ya eṣa balalo'bhūtte sūpakāraśca te nṛpa /
eṣa bhīmo mahābhāga bhīmavegaparākramaḥ //

eṣa krodhavaśānhatvā parvate gandhamādane /
saugandhikāni puṣpāṇi kṛṣṇārthe samupānayat //

gandharva eṣa vai hantā kīcakānāṃ durātmanām /
vyāghrānṛkṣāngajāṃścaiva hatavāṃśca pure tava //

hiḍimbaṃ ca bakaṃ caiva kirmīraṃ ca jaṭāsuram /
hatvā niṣkaṇṭakaṃ cakre araṇyaṃ sarvataḥ śubham //

yaścāsīdaśvabandhaste nakulo'yaṃ parantapa /
gosaṅkhyaḥ sahadevaśca mādrīputrau mahābalau //

śṛṅgāraveṣāraṇau rūpavantau manasvinau /
nānārathasahasrāṇāṃ samarthau bharatarṣabhau //

eṣā padmapalāśākṣī sumadhyā cāruhāsinī /
sairandhrī draupadī rājanyakṛte kīcakā hatāḥ //

drupadasya priyā putrī dhṛṣṭyumnasya cānujā /
agnikuṇḍātsamudbhūtā draupadī tvavagamyatām //
bhīma uvāca /

astrajño durlabhaḥ kaścitkevalaṃ pṛthivīmanu /
dhanurbhṛtāmatiśreṣṭhaḥ kaunteyoyaṃ dhanañjayaḥ //

etena khāṇḍavaṃ tasya hyakāmasya śatakratoḥ /
dagdhaṃ nāgavanaṃ caiva saha nāgairnarādhipa //

varṣaṃ ca śaravarṣeṇa vāritaṃ durjayena vai /
karamāhāritāḥ sarve pārthivāḥ pṛthivītale //

strīveṣaṃ kṛtavāneṣa tava rājanniveśane /
bṛhannaleti yāmāhurarjunaṃ jayatāṃvaram //

uṣitāḥsma sukhaṃ sarve tava rājanniveśane /
ajñātavāse nibhṛtā garbhavāsa iva prajāḥ //
vaiśampāyana uvāca /

yadā'rjunena te vīrāḥ kathitāḥ pañca pāṇḍavāḥ /
punareva ca tānpārthāndarśayāmāsa cottaraḥ //
uttara uvāca /

ya eṣa jāmbūnadaśuddhagaura- tanurmahānsiṃha iva pravaddhaḥ /
pracaṇḍaghoṇaḥ pṛthudīrghanetra- stāmrāyatākṣaḥ kururāja eṣaḥ //

ayaṃ punarmattagajendragāmī prataptacāmīkaraśuddhagauraḥ /
pṛthvāyatāṃso gurudīrghabāhu- rvṛkodaraḥ paśyata paśyatainam //

yastveva pārśve'sya mahādhanuṣmā- ñśyāmo yuvā vāraṇayūthapopamaḥ /
siṃhonnatāṃso gajarājagāmī padmāyatākṣo'rjuna eṣa vīraḥ //

rājñaḥ samīpe puruṣottamau tu yamāvimau viṣṇumahendrakalau /
manuṣyaloke sakale samo'sti yayorna rūpe na bale na śīle //

ābhyāṃ tu pārśve kanakottamāṅgī yaiṣā prabhā mūrtimatīva gaurī /
nīlotpalābhā suradevateva kṛṣṇā sthitā mūrtimatīva lakṣmīḥ //
vaiśampāyana uvāca /

evaṃ nivedya tānpārthānpāṇḍavānpañca bhūpateḥ /
tato'rjunasya vairāṭiḥ kathayāmāsa vikramam //

ayaṃ sa dviṣatāṃ madhye mṛgāṇāmiva kesarī /
acaradrathabṛndeṣu nighnaṃsteṣāṃ parāvarān //

anena viddhā mātaṅgā mahāmeghopamāstadā / hiraṇyakakṣyāḥ sangrāme dantābhyāmagamanmahīm

anena vijitā gāvo nirjitāḥ kuravo yudhi /
asya śaṅkhasya śabdena karṇau me badhirīkṛtau //

jāyate romarṣo me saṃsmṛtyāsya dhanurdhvanim /
dhvajasya vānaraṃ bhūtairākrośantaṃ sahānugaiḥ //

nādadānaṃ śarānghorānna muñcantaṃ śarotkarān /
na kārmukaṃ vikarṣantamenaṃ paśyāmi saṃyuge //

etaddhanuḥpramuktāśca śarāḥ puṅkhānupuṅkhinaḥ /
nālakṣyeṣu raṇe peturnārācā raktabhojanāḥ //

tīkṣṇanārācasankṛttaśirobāhūruvakṣasām /
kalebarāṇi dṛśyante yodhānāṃ sāśvasādināṃ //

anena taṭinī tatra śoṇitāmbupravāhinī / pravartitā bhīmarūpā yāṃ smṛtvā'dyāpi me manaḥ /
prakampate caṇḍavāyukampitā kadalī yathā //

anena rājanvīreṇa bhīṣmadroṇamukhā rathāḥ /
duryodhanena sahitā nirjitā bhīmakarmaṇā //

ayaṃ bhītaṃ dravantaṃ māṃ devaputro nyavārayat /
yasya bāhubalenāsmi jīvanpratyāgataḥ puram //
vaiśampāyana uvāca /

tasya tadvacanaṃ śrutvā mātsyarājaḥ pratāpavān /
dhanañjayaṃ pariṣvajya pāṇḍavānatha sarvaśaḥ //

dharmarājaṃ namaskṛtya rājā rājye'bhiṣecitam /
nātṛpyaddarśane teṣāṃ virāṭo vāhinīpatiḥ //

samprīyamāṇo rājānāṃ yudhiṣṭhiramathābravīt / diṣṭyā bhavantaḥ samprāptāḥ sarve kuśalino vanāt /
diṣṭyā vicaritaṃ kṛcchramajñātaṃ ca durātmabhiḥ // idaṃ rājyaṃ ca vaḥ sarvaṃ yaccāpi vasu kiñcana . vibhaktametadbhavatāṃ notkaṇṭhāṃ kartumarhatha /
avibhaktaṃ bhavadbhirme na sandeho narādhipāḥ //