Mahabharata · Chapter 4.74

tato dvitīye divase bhrātaraḥ pañca pāṇḍavāḥ /
snātāḥ śuklāmbaradharāḥ sarve sucaritavratāḥ //

yudhiṣṭhiraṃ puraskṛtya sarvābharaṇabhūṣitāḥ /
abhipannā mahābhāgā bhrājamānā mahārathāḥ //

virāṭasya sabhāṃ prāpya bhūmipālāsaneṣu te /
niṣeduḥ pāvakaprakhyāḥ satre dhiṣṇyeṣvivāgnayaḥ //

teṣu tatropaviṣṭeṣu virāṭaḥ pṛthivīpatiḥ /
tasyāṃ rātryāṃ vyatītāyāṃ prātaḥkṛtyaṃ samāpya ca //

gosuvarṇādikaṃ dattvā brāhmaṇebhyo yathāvidhi /
ājagāma sabhāṃ rājā uttareṇa saha prabho //

sa tāndṛṣṭvā mahāsatvāñjvalataḥ pāvakāniva / rājaveṣānupādāya pārthivo vismito'bhavat /

kimidaṃ ko vidhistveṣa bhayārta iva pārthivaḥ /
puruṣapravarāndṛṣṭvā viṣādamagamannṛpaḥ //

atha mātsyo'bravītkaṅkhaṃ devarājamiva sthitam /
marudgaṇairupāsīnaṃ tridaśānāmiveśvaram //

sa kilākṣanivāpastvaṃ sabhāstāro mayā kṛtaḥ /
atha rājāsane kasmādupaviṣṭo'syalankṛtaḥ //
vaiśampāyana uvāca /

parihāsecchayā rājño virāṭasya niśamya tat /
smayamāno'bravīdvākyamarjunaḥ paravīrahā //

indrasyārdhāsanaṃ rājannayamāroḍhumarhati /
brahmaṇyaḥ śrutavāṃstyāgī sarvalokābhipūjitaḥ //

eṣa vigrahavāndharma eṣa vīryavatāṃ varaḥ /
eṣa buddhyādhiko loke tapasāṃ ca parāyaṇam //

eṣo'straṃ vividhaṃ vetti trailokye sacarācare /
na caivānyaḥ pumānvetti na vetsyati kadācana //

na devā nāsurāḥ kecinna manuṣyā na rākṣasāḥ /
gandharvayakṣapravarāḥ sakinnaramahoragāḥ //

dīrghadarśī mahātejāḥ pāraijānapadapriyaḥ /
pāṇḍavānāmatiratho yajñadharmaparo vaśī //

maharṣikalpo rājarṣiḥ sarvalokeṣu viśrutaḥ /
balavāndhṛtimāndakṣaḥ satyavādī jitendriyaḥ //

dhanaiśca sañcayaiścaiva śakravaiśravaṇopamaḥ . yathā manurmahātejā lokānāṃ parirakṣitā /
evameva mahātejāḥ prajānugrahakārakaḥ //

ayaṃ kurūṇāmṛṣabhaḥ kuntīputro yudhiṣṭhiraḥ /
yasya kīrtiḥ sthitā loke sūryasyevodyataḥ prabhā //

saṃsaranti diśaḥ sarvā yaśasosya gabhastayaḥ /
uditasyeva sūryasya tejaso'nugabhastayaḥ //

enaṃ triṃśatsahasrāṇi kuñjarāṇāṃ tarasvinām /
anvayuḥ pṛṣṭhato rājanyāvadadhyāvasatkurūn //

triṃśaccaiva sahasrāṇi rathānāṃ rathināṃ varam /
sadaśvairupasampannāḥ pṛṣṭhato'nuyayustadā //

vājināṃ ca śataṃ rājantsahasrāṇyayutāni ca / imamaṣṭaśataṃ sūtāḥ sumṛṣṭamaṇikuṇḍalāḥ /
tuṣṭuvurmāgadhaiḥ sārdhaṃ purā śakramivarṣayaḥ //

imaṃ nityapumātiṣṭhankuravaḥ kinkarāstadā /
sarve ca nṛpa rājānaṃ dhaneśvaramivāmarāḥ //

eṣa sarvānmahīpālānkaramāhārayattadā /
vaiśyāniva mahārāja vivaśānsvavaśānapi //

aṣṭāśītisahasrāṇi snātakānāṃ mahātmanām /
upajīvanti rājānamenaṃ sucaritavratāḥ //

eṣa vṛddhānanāthāṃśca vyaṅgānpaṅgūścaṃ vāmanān /
putravatpālayāmāsa prajādharmeṇa cābhibhūḥ //

eṣa dharme dame caiva dāne satye rataḥ sadā /
mahāprasādo brahmaṇyaḥ satyavādī ca pārthivaḥ //

śrīmatsampatprabhāvena tapyate yasya kauravaḥ /
ragaṇaḥ saha karṇena saubalena ca vīryavān //

guṇā na śakyāḥ saṃkhyātumetasyaiva nareśvara /
eṣa dharmaparo nityamanṛśaṃsaḥ suśīlavān //

evaṃ yukto mahārājā pāṇḍavaḥ puruṣarṣabhaḥ /
kathaṃ nārhati rājārhamāsanaṃ pṛthivīpatiḥ //