Mahabharata · Chapter 4.73

pradāya vastrāṇi kirīṭamālī virāṭagehe muditaḥ sakhībhyaḥ /
kṛtvā mahartarma tadā'jimadhye didṛkṣayā so'bhijagāma pārtham //

taṃ prekṣamāṇastvatha dharmarājaṃ papraccha pārtho'tha sa bhīmasenam /
kiṃ dharmarājo hi yathāpuraṃ māṃ mukhaṃ praticchādya na cāha kiñcit //

tamevamuktvā pariśaṅkamānaṃ dṛṣṭvā'rjunaṃ bhīmasenaṃ ca rājā /
tadā'bravīttāvabhivīkṣya rāja- nyudhiṣṭhirastatparimṛjya raktam //

durātmanā tvayyabhipūjyamāne virāṭarājñā'bhihato'smi pārtha /
tasmātprahārādrudhirasya bindū- npaśyanna ceme pṛthivīṃ spṛśeyuḥ . iti praticchādya mukhaṃ tato'haṃ manyuṃ niyacchannupaviṣṭa āsam //

śubhārha rāṣṭraṃ na khilīkṛtaṃ bhave- dvayaṃ tu yasminsukhino'bhavāma /
kruddhe tu vīre tvayi cāpratīte rājā virāṭo na labheta śarma //

ajānatā tena ca śauryamājau channasya satreṇa balaṃ ca pārtha /
idaṃ virāṭena mayi prayuktaṃ tvāṃ vīkṣamāṇo na gatosmi harṣam //
vaiśampāyana uvāca

tenāprameyena mahābalena tasmiṃstathokte śamamāsthitena /
taṃ bhīmaseno balavānamarṣī dhanañjayaṃ kruddhamuvāca vākyam //

na pārtha nityaṃ kṣamakālamāha bṛhaspatirjñānavatāṃ variṣṭhaḥ /
kṣamīha sarvaiḥ paribhūyatesau yathā bhuḍaṅgo viṣavīryahīnaḥ //

virāṭamadyaiva nihatya śīghraṃ saputrapautraṃ sakulaṃ sasainyam /
yokṣyāmahe dharmasutaṃ ca rājye adyaiva śīghraṃ tvarireṣa mātsyaḥ //

anena pāñcālasutā'tha kṛṣṇā upekṣitā kīcakenābhiyuktā /
tasmādayaṃ nārhati rājaśabdaṃ rājā bhava tvaṃ nṛpa pārthavīryāt //

rājā kurūṇāṃ ca yudhiṣṭhiro'yaṃ mātsyeṣu rājā bhavatu pravīraḥ
taṃ mātsyadehaṃ śatadhā bhinadmi pūrṇodakaṃ kumbhamivāśmanīha //
arjuna uvāca /

bhavataḥ kṣamayā rājantsarve doṣāśca no'bhavan / taṃ mātsyaṃ sabalaṃ hatvā saputrajñātibāndhavam /
paścāccaiva kurūnsarvānhaniṣyāmi na saṃśayaḥ //

bhīmasenaśca ye cānye tathaiveti tamabruvan //

tamabravīddharmasuto mahātmā kṣamī vadānyaḥ kupitaṃ ca bhīmam /
na pratyupasthāsyati cetsadāraḥ prasādane samyagathāstu vadhyaḥ //

na hantavyo durātmā'yaṃ virāṭaścāpi te'rjuna //

śvaḥ prabhāte pravekṣyāmaḥ sabhāṃ siṃhāsaneṣvapi /
rājaveṣeṇa saṃyuktāḥ sthānamasva svalankṛtāḥ //

virāṭo yadi tatrasthānrājālaṅkāraśobhitān / rājalakṣaṇasampannānyadi tatra na maṃsyate /
paścāddhanyāmahe pārtha virāṭaṃ sahabāndhavam //

itikartavyatāṃ sarve mantrayitvā tu pāṇḍavāḥ /
nyavasaṃścaiva tāṃ rātriṃ dharmajñā dharmavatsalāḥ //

sahaputreṇa mātsyaḥ sa samprahṛṣṭo narādhipaḥ /
tāṃ rātrimavasatprītaḥ samprahṛṣṭena cetasā //